Mirvari Qəhrəmanlı: “Hökumət işsizliklə bağlı proqramm qəbul etməlidir”
“Neft sənayesini gücləndirmək üçün bütün artıq strukturlar Dövlət Neft Şirkətindən çıxarılmalıdır”
Neftçilərin Hüquqlarını Müdafiə Təşkilatı İctimai Birliyi ölkənin neft sektorunda insan hüquqlarının vəziyyətinə dair növbəti hesabatını açıqlayıb. 2014-cü ilin yanvar-mart aylarını əhatə edən hesabatda əsas diqqət son aylar Dövlət Neft Şirkətində həyata keçirilən ixtisarlara yönəlib. Belə ki, 2013-cü il dekabr ayının 29-da ölkənin neft sektorunda fəaliyyət göstərən bir çox şirkətlərdə çalışan 10 min işçiyə tutduqları vəzifənin ixtisarı ilə əlaqədar bildiriş verilib. İlin sonuna qədər davam edən ixtisarlar ümumilikdə 20 min adamı əhatə edəcək.
Qeyd etmək lazımdır ki, ARDNŞ işçi ixtisarı ilə əlaqədar xüsusi proqram qəbul edib. Lakin bu, yaranan problemi tam həll etmir.
Neftçilərin Hüquqlarını Müdafiə Təşkilatı İctimai Birliyinin rəhbəri Mirvari Qəhrəmanlı aparılan struktur islahatlarının labüd olduğunu, lakin işdən çıxarılanların işlə təmin olunmasında problem yarandığını deyir: “Hasilat aşağı düşüb. Bunun müqabilində struktur islahatları labüddür. ARDNŞ-nin tərkibindən bir çox idarə və müəssisələrin çıxarılmasının vacibliyini zaman-zaman demişik. Nəqliyyat departamenti, informasiya texnologiyaları idarəsi, Sosial inkişaf idarəsi, qazma idarələri Dövlət Neft Şirkətindən çıxarılmalıdır. Neft sənayesini gücləndirmək üçün bütün artıq strukturlar Dövlət Neft Şirkətindən çıxarılmalıdır və ARDNŞ sırf biznes qurumuna çevrilməlidir. “Azərneft”, “Azəriqaz”, “Azərkimya” MMC formasında Energetika Nazirliyinin tərkibinə verilməlidir. Bunun da nəticəsində ixtisarlar olacaq. Çoxlu sayda insan işdən çıxacaq”.
M.Qəhrəmanlının sözlərinə görə, ixtisara düşən insanların işlə təminatı məsələsi həllini tapmır. Bununla bağlı şikayətlər gəlməkdədir. ARDNŞ-nin proqramına uyğun təklif edilən iş yerləri bir çox hallarda vətəndaşları qane etmir. Təklif olunan işdən imtina edənlər isə proqramdan çıxarılır: “Proqramda nəzərdə tutulub ki, ixtisara düşən bir il ərzində 50 faiz əmək haqqı alacaq. Bu müsbət haldır. Amma həmin adamlara iş təklif edirlər, işdən imtina edəndə isə proqramdan çıxarırlar. Proqram birinci ixtisarlara aid edildi, ancaq hazırda gedən ixtisarlara bu proqram şamil olunmur. İlin axırına qədər davam edəcək ixtisarlarda 20 min adamın işsiz qalacağı gözlənilir. Ona görə də hökumət işsizliklə bağlı proqramm qəbul etməlidir”.
Fizzə