Ədliyyə Nazirliyi Penitensiar Xidməti həbsdə olan jurnalist Əfqan Muxtarlının vəkili Nemət Kərimli barəsində tədbir görülməsi üçün Vəkillər Kollegiyasına müraciət edib. Müraciətdə deyilir ki, vəkilin Əfqan Muxtarlı ilə görüşə gedərkən cəzaçəkmə müəssisəsində qanunsuz axtarışa və zorakılığa məruz qaldığı barədə yaydığı məlumat həqiqətə uyğun deyil. Bildirilib ki, Cəzaların İcrası Məcəlləsinin 75.5-ci maddəsinin, Cəzaçəkmə Müəssisələrinin Daxili İntizam Qaydalarının və “Müəyyən müddətə azadlıqdan məhrumetmə və ömürlük azadlıqdan məhrumetmə növündə cəzaları icra edən müəssisələrə daxilolma Qaydası”nın tələblərinə uyğun olaraq cəzaçəkmə müəssisələrinə daxil olan və çıxan şəxslərə, eləcə də onların əşyalarına baxış keçirilə bilər.
