Milli Şuranın prezidentliyə namizədi on minlərlə insanı 28 sentyabrda toplayacaq
İlham Əliyev seçki debatlarına gələ bilmir. Onu bu diskussiyalarda təmsil edən Əli Əhmədov, Siyavuş Novruzov və Mübariz Qurbanlı isə Cəmil Həsənlinin arqumentləri qarşısında sıradan çıxdılar. Iqtidar özünün yalançı namizədləri vasitəsilə Cəmil Həsənliyə hücum çəkdi, amma bunun bütün ictimai qınağı Ilham Əliyevin üstünə yönəldi.
Bir sözlə, hakimiyyət bütün imkan və vasitələrilə birgə Cəmil Həsənliyə məğlub oldu. Hakimiyyət demək olar ki, tele-debatlarda ciddi ziyanla irəliləyir. Nəinki Ilham Əliyevin plan və proqramı, hətta onun namizəd olmasıyla bağlı hüquqi sualları da cavablandıra bilmirlər. Cəmil Həsənli hər dəfə Ilham Əliyevi efirə çağırsa da, dövlət başçısı hələ də ortalıqda görünmür.
İkinci qələbə və ardı…
Mübarizənin ikinci mərhələsi isə mitinq meydanlarında davam edir. Cəmil Həsənli seçicilərlə ilk görüş mitinqində hakimiyyəti əməllicə sarsıtdı. On mindən çox insan metronun “Inşaatçılar” stansiyası yaxınlığındakı “Məhsul” stadionuna gəldi və Cəmil Həsənlinin mitinqində iştirak etdi.
Meydandakı coşqu, insanların sona kimi mitinqdə eyni əhval-ruhiyyədə gözləməsi namizədə inam və marağın göstəricisi idi. Başlıca məqamlardan biri bu idi ki, hakimiyyət bu müstəvidə də geridə qaldı. Hələ də açıq havada Ilham Əliyevin hər hansı görüşü təşkil edilməyib. Onu rayonlarda Bakıdan təlimatlandırılaraq aparılmış xüsusi dəstə qarşılayır və yola salır. Bu mənada, bölgələrdə görüş adı ilə təqdim olunan prosesin özü də mahiyyətcə saxtadır və heç bir ciddi rezonans doğurmur. Üstəlik, Ilham Əliyev hansı bölgəyə gedirsə, o istiqamətdə magistral yollar saatlarla bağlandığı üçün əhali arasında narazılıq yaranır və belə səfərlər əslində, iki-üç qat Ilham Əliyevin əleyhinə işləyir.
Bu cür təşviqat prosesinin sonunda Ilham Əliyevin seçki qutusundan çıxmayacağını hamı bilir. Cəmil Həsənli isə hər bir vətəndaşın probleminə diqqətlə yanaşır və hərtərəfli platforması ilə problemlərə diqqətli olduğunu ortaya qoyur. Üstəlik, ilk mitinqində on mindən çox insanı bir araya topalamaqla, hakimiyyəti bir addım da geridə qoydu. Yəni, bütün parametrlər üzrə öndə…
Qarşıdakı böyük addım
Amma məsələ bununla bitmir. Cəmil Həsənli növbəti görüş-mitinqini sentyabrın 28-nə, yenə “Məhsul” stadionuna təyin edib. Bu aksiya Azərbaycanda siyasi gücün tərəfini müəyyən etmək baxımından çox ciddi bir fürsət olacaq. Əgər bundan əvvəlki mitinqlə biz hakimiyyətdən fərqli olaraq, mitinq keçirmək imkanımızı ortaya qoyduqsa, qarşıdakı mitinqlə biz Əliyevlərin çarxını geri döndərmək gücünü nümayiş etdirməliyik. Buna görə də hər bir vətəndaş, bu yazını oxuyan hər kəs mitinqə özü ilə yanaşı, minimum beş seçici gətirməyi qarşısına məqsəd qoymalıdır. Bu vəzifənin öhdəsindən gəlməlidir. Biz düşünməməliyik ki, dayanaq, bu fəallığı kimsə etsin. Biz özümüz bir nəfər kimi bu işi insanlar arasında yaymalıyıq. Azərbaycanın taleyi bizim əlimizdədir. Təşkilatçı olmaq fövqəladə bir bacarıq deyil. Sadəcə, yanındakına həqiqəti göstərib onu inandırmaqdır. Bunu etmək isə bu gün Azərbaycanda ən asan işdir. Çünki hər kəs hər şeyi görür. Biz isə “bir mənimlə heç nə dəyişməz” deyənlərə bu mitinqə gəlsə, görəcəyi on minlərdən danışmalıyıq. Narazıların və etirazçıların meydanlara görüş verməsini təmin etməliyik.
Seymur Həzi