Düdənginski – «Camali xaç ilə qızıl yıldız arasında»
«Vaxtilə AzadlıqRadiosunda çalışmış əməkdaşlar haqqında daha geniş bilgilərə ehtiyac var».
Bu sözləri AzadlıqRadiosunun «İz» proqramına «Münhendə qətl» radiodastanının bələdçisi Nəsiman Yaqublu söyləyib.
«DÜDƏNGİNSKİ HAQQINDA KİTAB ÜZƏRİNDƏ İŞLƏRKƏN…»
Onun dediyinə görə, Əbdürrəhman Fətəlibəyli-Düdənginskinin həyat və fəaliyyəti geniş araşdırılmayıb: «Onun haqqında kitab üzərində işlərkən, diqqətimi çəkən bir neçə məqam oldu. Birincisi, AzadlıqRadiosunda çalışmış azərbaycanlılar barədə geniş bilgilər əldə etməyə ehtiyac var. İkincisi, o dövrdə AzadlıqRadiosunda gedən lent yazılarını toplamaq lazımdır, axı bu, bizim tariximizdir. Görün, ilk vaxtlarda orda kimlər çıxış edib, – Fətəlibəylinin baş redaktor olduğu dövrü deyirəm, – Məhəmməd Əmin Rəsulzadə AzadlıqRadiosunda çıxış edib! Ceyhun Hacıbəyli, Əkbərağa Şeyxülislamov… Məndə onların siyahısı var. Çıxışların mətni qalıb. Altında da yazıblar ki, bu yazı AzadlıqRadiosunda səsləndirilib (AzadlıqRadiosunun arxivi indi ABŞ-da qorunur – S.İ.). İsmayıl Əkbərin, Məcid Musazadənin, Mustafa Vəkillinin, Süleyman Təkinərin, Məhəmməd Kəngərlinin səsləri, – bunlar bizim tariximizdir. Bu zəngin sərvəti toplamaq, Azərbaycana gətirmək və yeni nəslə çatdırmaq lazımdır».
«ALMANİYA VƏ RUSİYA ARXİVLƏRİ ARAŞDIRILMALIDIR»
Nəsiman Yaqublu Almaniya arxivlərini də ciddi şəkildə öyrənmək zərurətini vurğuladı: «Özəlliklə Potsdam arxivini. Həm Fətəlibəyli-Düdənginski, həm də Azərbaycan legionerləri ilə bağlı materiallar olduğu üçün. Rusiyada da bu insanların fəaliyyətinə dair ciddi sənədlər var, xüsusən hərbi arxivlərdə. Çünki Fətəlibəyli hərbi akademiyada oxuyub. Bütün bunları dövlət səviyyəsində həll edib Azərbaycana gətirmək lazımdır».
«CAMALİ XAÇ İLƏ QIZIL YILDIZ ARASINDA»
Nəsiman Yaqublu cümhuriyyət dönəmini araşdırarkən tez-tez Fətəlibəyli-Düdənginskinin adına rastladığını deyir: «Mühacirlərin çoxunun xatirələrində və nəşr edilən mühacirət mətbuatında, xüsusən, «Azərbaycan», «Mücahid» jurnallarında mən tez-tez «Düdənginski» imzasına rast gəlirdim. Beləcə, onun haqqında məlumat toplamağa başladım. İlk geniş informasiyanı vaxtilə Türkiyədə yaşayan hörmətli ağsaqqalımız – mərhum Məhəmməd Kəngərlidən aldım. 1989-cu ildə Türkiyədə Rəsulzadə ilə bağlı araşdırmalar apararkən Düdənginski barədə də bəzi faktlar öyrəndim. Bir qədər sonra Türkiyədə maraqlı bir kitaba – alman müəllifi Mühlenin «Camali xaç ilə qızıl yıldız arasında» kitabına rast gəldim. Bu kitab almanca çıxıb və 1984-cü ildə Türkiyə türkcəsinə çevrilib. Legionerlər haqqında Türkiyədə çıxan ən sanballı kitabdır. O kitabdan Düdənginski haqqında daha geniş məlumatlar əldə etdim. Bir müddətdən sonra legioner həyatı yaşamış insanlarla təmas qurdum və onlardan Fətəlibəyli- Düdənginski haqqında məlumat topladım. Maraqlıdır ki, 1990-91-ci ildə belə bu adamlar Düdənginski haqqında ehtiyatla, qorxa-qorxa danışırdılar. Beləcə, bütün bu bilgilər 2008-ci ildə Düdənginski haqqında kitabı ortaya çıxardı».
ADI AVROPANI DOLAŞAN DÜDƏNGƏ KƏNDİ…
Nəsiman Yaqublu Fətəlibəylinin sayəsində bütün Avropanı dolaşan Düdəngə kəndindən, qəhrəmanımızın ata-babalarından da söz açdı: «Düdəngə kəndi Naxçıvanın, ümumiyyətlə Şərurun kəndlərindən fərqlənir. Çünki kitabla bağlı faktlar toplayarkən həmin kənddə olmuşam, adamlarla görüşmüşəm. Buranın camaatı sərhəd kəndi olduğu üçün həmişə hərbə meylli olub. Azərbaycanı işğal edəndən sonra Rusiya burada müəyyən hərbi qüvvələr saxlayıb və maraqlıdır ki, yerlilərdən də bu işə cəlb edib. Odur ki, bu bölgədən döyüşən, vuruşan insanlar yetişib. Fətəlibəyli də belə bir hərbçi ailəsində dünyaya göz açıb – 1908-ci il iyunun 12-də. Deyilənə görə, Arpaçayın sağ sahilində məskunlaşmış Səfəvilər nəslindəndir. Düdəngə və Zeyvə kəndlərinin bəyi sayılan atası Əli bəy çar zabiti, həm də cəsarətli zabit olub. Bəzi mənbələrə görə, Əli bəy bir rus zabitinin müsəlman dinini təhqir etdiyini eşidib, xəncəri çıxarıb ona xəsarət yetirib. Elə bunun nəticəsində də sonradan Əli bəyi zəhərləyib öldürüblər… Fətəlibəyli həyatda ilk addımlarını atarkən – iki yaşında atasını itirib. Babası Fətəli bəy haqqında da məlumatlar qalıb. O, savadlı, açıqfikirli insan olub. Hətta Rusiyanın bir sıra tanınmış şairləri ilə əlaqələri haqqında da söhbətlər gəzir. Yəni Fətəlibəyli belə əsilli-köklü bir ailədə dünyaya göz açmışdı».
«NÖQSANLARLA BARIŞMIRDI»
Nəsiman Yaqublu Əbdürrəhman bəyin lap uşaqlıqdan rus şovinizminə nifrət ruhunda böyüdüyünü deyir: «Sovet hökumətinin gəlişi rus şovinizmini dəyişmədi. Bolşevizm adı ilə bu şovinizm yenidən ölkələri əsarət altına aldı… Fətəlibəylinin komsomol sıralarından çıxarılması barədə məlumatlar var, çünki nöqsanlara etiraz edir, narazılığını bildirirdi. Bütün bunlar onun həyatında ciddi problemlər yaradıb. Amma Əbdürrəhman bəy çox savadlı adam idi. Oxuduğu ilk məktəblərdə, sonra Tiflisdəki hərbi məktəbdə, daha sonra Moskvada təhsil aldığı hərbi akademiyada özünü savadlı zabit kimi göstərmişdi. Görünür, bir müddət bu savad onun xarakterinin bu yönünü kompensasiya edirdi…».
«QIZIL ULDUZ» ORDENLİ FƏTƏLİBƏYLİ…
«Maraqlıdır ki, Fətəlibəylinin həm məktubları qalıb, həm də sovet dövründəki fəaliyyəti barədə məlumatlar. Sovet-fin müharibəsində iştirak edib Fətəlibəyli. Onun gözəl bir məqaləsi var bu müharibə haqqında. Həmin yazıda sovet hökumətinin apardığı müharibənin taktiki xətlərini ciddi tənqid edir. Fətəlibəyli o qədər bacarıqlı hərbçi idi ki, «Qızıl ulduz» ordeni ilə təltif edilmişdi… Amma Stalin rejiminə nifrət edirdi, onu qəbul etmirdi. Bu insanlar hökumətdən, rejimdən narazı idilər və ümid edirdilər ki, Almaniya Sovetlərə qalib gələcək, Stalini məhv edəcək, bolşevizm yox olacaq və Azərbaycan yenidən öz müstəqilliyinə qovuşacaq».
«ƏSİR DÜŞƏN SOVET ADAMI… VƏTƏN XAİNİDİR…»
Nəsiman Yaqublu ikinci bir obyektiv səbəbə də diqqət çəkir: «Müharibədə onlar əsir düşürdülər. Stalinin verdiyi 271 nömrəli əmr bu insanların geriyə qayıtmağına imkan vermirdi. Həmin əmrdə yazılmışdı ki, əsir düşən sovet adamı vətən xainidir… geriyə qayıdarsa, güllələnməlidir! Üçüncü səbəb ayrı-ayrı millətlərdən olanlara silahlı birliklər yaratmaq icazəsi verilməsi idi. Bu insanlarda ümid yaranırdı ki, öz silahlı dəstələrimizlə gələcəkdə vətəni xilas edə biləcəyik. Digər bir məqam – sovet ordusunda dözülməz vəziyyət vardı – silah çatışmırdı, bir silahı 50-60 adama verir və tapşırırdılar ki, kim ölsə, onun silahını başqası götürsün… Belə eybəcərliklərin üstünü açmağın vaxtı gəlib çatmışdı. Onlar bunu görür və etiraz edirdilər. Düdənginski də belə insanlardan, belə şəxsiyyətlərdən biri idi».
DÜDƏNGİNSKİ NECƏ LEGİONERLƏRİN BAŞÇISINA ÇEVRİLDİ…
Aparıcının: «2-ci Dünya Savaşında Fətəlibəyli necə legionerlərin başçısı oldu» sualı belə cavablandı: «İlk vaxtlar almanların əsirlərə münasibəti yaxşı olmayıb, çoxunu qırıb məhv edirdilər. Hitler istəmirdi ki, özünə problemlər yaratsın, axı 1941-ci ilin dekabrında ABŞ və Böyük Britaniya rəsmi şəkildə SSRİ-ni müdafiə etməyə, həm texnika, həm də ərzaqla təmin etməyə başlamışdı. Hitlerin ordusu artıq Moskvanın 25 km-nə gəlib çıxmışdı. Və bu dövlətlər düşünürdülər ki, SSRİ-dən sonra sıra onlara gələ bilər… Həmin vaxt Hitlerin çevrəsində ağıllı insanlar vardı. Onlar ciddi proqramlar hazırlayırdılar. Məqsəd bu insanlardan – əsirlərdən necə faydalanmağın yolunu tapmaq idi. Onların sayı bəzi mənbələrdə 3.5 milyon, bəzilərində 5.5 milyon göstərilir. O zaman Hitlerə təklif olunub ki, bu adamlardan könüllü birliklər yaradılsın. Əvvəllər onlara «xivi»lər deyirdilər – alman dilində bu söz «könüllü dəstələr» deməkdir».
«BAKI FATEHİ» – NURU PAŞA ALMANİYADA!
Nəsiman bəy tədricən bu birliklərin legioner statusu aldığını bildirir: «O dövrdə Türkiyədən gələn tanınmış türk generalları Nuru Paşa Killigil və Emir Erkilet Paşa əsirlikdə olan türk xalqlarından ibarət qoşun yaratmaq fikrindəydilər. Onlar Almaniya hökuməti və Şərq Nazirliyi ilə danışıq apardılar. Bu danışıqlarda əsas rolu Şərq Nazirliyindəki Qafqaz bölməsinin başçısı Fon Mende oynayıb. Onun işə qatılmasıyla türk xalqlarından olan əsirlərə legioner statusu verildi və hərbi birliklər yaradıldı. Əvvəllər bu birlikləri nömrələyirdilər, amma Azərbaycan legionerləri bu birliklərə ad verirdilər. Məsələn, «Cavad xan», «İgid», «Aslan» və s».
ƏSİRLƏRLƏ İŞ PROQRAMI
Verilişin bələdçisi daha sonra alman hökumətinin əsirlərlə iş proqramı hazırladığına diqqət çəkdi: «Burada 3 istiqamət əsas götürülürdü. Birincisi, hərbi birliklərin yaradılması, ikincisi, onların təbliğati işləri idi, yəni qəzet-jurnal çapı. Üçüncüsü, radioda təbliğat. Bir radio yaratdılar – əks-təbliğat radiosu. Verilişin adını «Leninçi» qoysalar da, məqsəd sovet təbliğat sistemini dağıtmaq idi. Radiostansiya bütövlükdə «Qafqaz» radiosu adlanırdı. Ayrı-ayrı bölmələrdə müxtəlif dillərdə verilişlər hazırlanırdı. Onlar qəzet-jurnal çap edirdilər. Məsələn, Azərbaycan legionerlərinin ilk çap etdiyi qəzet 1942-ci ildə «Azərbaycan» qəzeti oldu – Məcid Musazadənin redaktorluğu ilə. Bir qədər sonra azərbaycanlılar milli nəşriyyatlarını yaradıb kitab çap etməyə başladılar. Təbii ki, bu insanlara rəhbərlik edəcək şəxs, bu işləri bir araya gətirən qurum lazım idi».
«HİTLERLƏ DANIŞIĞA GETDİ…»
Nəsiman Yaqublu o dövrdə Rəsulzadənin Almaniya hökuməti ilə danışılar apardığını bildirir: «Rəsulzadə Azərbaycan Milli Komitəsini yaratmışdı və danışıqların da bir predmeti vardı – Azərbaycanın müstəqilliyi. Amma Hitler: «Mən heç bir komitə tanımıram və heç bir müstəqillik qəbul etmirəm» deyərək Rəsulzadə ilə danışıqlara getmədi. Belə olan halda Rəsulzadənin Almaniyadakı siyasi fəaliyyəti qeyri-mümkün oldu və o, Rumıniyaya yerləşdi. Amma Fətəlibəyli-Düdənginskli Almaniya dövləti ilə razılığa getdi…».
“Almanlarla əməkdaşlığa razılaşdıqdan sonra Fətəlibəyli-Düdənginski Azərbaycanın müstəqilliyi məsələsini birbaşa qoymadı.”
Bu sözləri tarixçi alim Nəsiman Yaqublu söylədi.
BERLİNDƏ ÜÇRƏNGLİ BAYRAQ DALĞALANIR – 1943-CÜ İL!..
Onun sözlərinə görə, bu, keçici xarakter daşıyırdı: “Bir qədər ötəndən sonra Fətəlibəyli Sovet İttifaqından olanlar arasında azərbaycanlı legionerlərin Milli Azərbaycan qurultayını keçirdi. 1943-cü il noyabrın 6-da qurultayın təntənəli açılışı oldu. Almaniya dövləti qurultaya təbrik və nümayəndələr göndərmişdi. Eyni zamanda digər xalqların təmsilçiləri də bu qurultayda iştirak edirdi. Əsas məruzəçi Fətəlibəyli idi. O dedi: biz çar valilərinə, bolşevik girovluğuna dözmədiyimiz kimi, hər hansı bir millətin hakimiyyətinə də dözməyəcəyik. Azərbaycanı azərbaycanlılar idarə etmiş və yenə onlar idarə edəcəklər!”. Qurultay Azərbaycanın müstəqil yaşaması barədə ayrıca sənəd qəbul etdi. Berlində “Kayzeroff” otelində keçirilən qurultayda Azərbaycanın üçrəngli bayrağı dalğalanırdı…”.
ƏSİRLƏRİ GÜLLƏLƏYİRLƏR!
Nəsiman Yaqublu II Dünya Müharibəsinin başa çatmasıyla Fətəlibəylinin daha bir missiyasının üzə çıxdığına diqqət çəkdi:
“Əsirləri xilas etmək lazım idi. 1945-ci ildə Yaltada keçirilən konfransda Stalin ABŞ və Böyük Britaniya qarşısında belə bir məsələ qoydu ki, hər bir dövlət əsirləri məxsus olduğu ölkəyə qaytarsın. Bu, Krım-Yalta sazişinin 11-ci maddəsində nəzərdə tutulmuşdu. Sonradan məlum oldu ki, Stalin bu adamları geri alıb güllələyir… Geri qayıdanların sağ qalan çox az hissəsini də Sibirə göndərirdilər. Amma Amerika və Böyük Britaniya dövlətləri əsirləri öldürmədi. Bir qədər sonra ABŞ Konqresində və Senatda çox ciddi dinləmələr oldu.
Ruzveltin həyat yoldaşı Eleonora Ruzvelt konqresdə sərt bəyanatla çıxış etdi. Bildirdi ki, biz bu əsirləri sovetlərə verməməliyik. O xanımın təşəbbüsündən sonra Avropada əsirlərə münasibət dəyişdi. Yəni bu illərdə Fətəlibəyli-Düdənginski həmin hadisələrin mərkəzində dayanırdı”.
QORXMAZ!
Araşdırıcı Düdənginskinin çox qorxmaz insan olduğunu deyir: “Azərbaycanlıları xilas etmək üçün əvvəlcə çox sayda hərbi birlikləri Şimali İtaliyada yerləşdirdi. İtaliya dövləti ilə danışıqlar apardı. Vatikana gedib Roma Papası ilə görüşdü. Bir qədər sonra Qüds müftisi ilə danışıqlara başladı. 600-ə yaxın azərbaycanlının Misirə getməsinə icazə almağı bacardı. Eşidəndə ki ora göndərilən azərbaycanlıları Fələstin cəbhəsinə cəlb ediblər, Misirə gedib onları geri götürdü, “bu insanlar bura savaş üçün deyil, xilas üçün gəliblər” – deyərək onları Türkiyəyə yola saldı. Türkiyəyə gedib legionerlərin yaşayışı ilə maraqlandı. Almaniya və ABŞ rəsmiləri ilə danışıqlar aparmağa başladı. Və Düdənginskini fəal işə cəlb edən, sonralar ABŞ-ın prezidenti olan Duayt Eyzenhauerin başçılığı altında SSRİ-yə qarşı psixoloji müharibə proqramı hazırlandı”.
“AZAD AVROPA”, “AMERİKANIN SƏSİ” RADİOLARI YARANDI
Nəsiman Yaqublu sözügedən proqramın 1949-cu ildə Nyu-Yorkda hazırlandığını bildirir: ”Bir qədər keçəndən sonra bu proqram əsasında Avropadakı mühacirlərlə danışıqlar başlandı. Azərbaycanlılardan, özəlliklə Düdənginski və Ceyhun Hacıbəyli ilə. Onlar psixoloji savaş proqramın tərkib hissəsi olan bir neçə sahəyə cəlb edildilər.
İlk növbədə vəsait ayırıb radio-təbliğat işini gücləndirmək nəzərdə tutulurdu. Elə bunun nəticəsində 50-ci illərin əvvəllərində “Azad Avropa” və “Amerikanın səsi” radioları fəaliyyətə başladı. Bir qədər sonra “AzadlıqRadiosu” efirə çıxdı. İlk adı “Qurtuluş” idi. Sonra “AzadlıqRadiosu” oldu”.
“DANIŞIR AZADLIQ RADİOSU! HƏMVƏTƏNLƏR!”…
Nəsiman bəy Düdənginskinin bu radioya cəlb edilən ilk şəxslərdən olduğunu deyir: “AzadlıqRadiosunun ilk verilişlərinin materialları arxivimdə var. Baxdıqca heyrətə gəlirəm. Bir adam bir radionun işini tək görüb. Nə qədər enerjili olub! Xəbərlər hazırlayıb, verilişlər hazırlayıb:
“Danışır Azadlıq radiostansiyası! Həmvətənlər! Nəhayət, bizim özümüzün xüsusi səsimiz var! Stalin polis terroru bizi öz evimizdə susmağa məcbur etsə də, xaricdə qorxmadan və maneəsiz danışa bilirik… Azadlığa olan daimi inamımız xalqımızın qəlbində sönmədi. Bizim birinci vəzifəmiz azadlığa olan iradəmizi yaşatmaqdır!” – AzadlıqRadiosunun Azərbaycan redaksiyası 1953-cü il martın 6-da ilk efirinə bu sözlərlə başlayıb. Və Əbdürrəhman Fətəlibəyli həmvətənlərinə o vaxtlar AzadlıqRadiosunun yerləşdiyi Münhendən üz tutub”.
“AZƏRBAYCAN” DƏRGİSİ
Araşdırıcı bildirir ki, bu illərdə Düdənginskinin gördüyü ən böyük işlərdən biri “Azərbaycan” adlı dərgini nəşr etməsi olub:
“Onlar bu dərgini Ceyhun Hacıbəyli ilə birgə nəşr etməyə başladılar. Jurnal rus və Azərbaycan dillərində çıxırdı. Burada Düdənginskinin məqalələrinə daha çox yer ayrılırdı. Onun fəallıq göstərdiyi 3-cü sahə də vardı. Bu da, ABŞ-ın o vaxtlar Münhendə yaratdığı “SSRİ-ni Öyrənmə İnstitutu” idi. Çox böyük institut idi və orada çox sayda insanlar çalışırdı. Fətəlibəyli-Düdənginski bu institutun aparıcı işçilərindən biri olub”.
“AZƏRBAYCANLILARIN DA… LİDERİNİ ÖLDÜRDÜLƏR”
Nəsiman Yaqublu bu işlərin diqqətdənkənar qalmadığını bildirir: “Bir daha təkrar edirəm ki, Abo Düdənginski bu ilərdə çox fəal çıxış edirdi və bütün bu çıxışlar sovet dövlətinə qarşı mübarizəyə yönəlmişdi. Mən bir sənəd tapmışam. O sənədə əsasən demək olar ki, Düdənginskiyə artıq Stalinin sağlığında – 1953-cü ildə ölüm hökmü kəsilmişdi…1954-cü ildə sovet hökuməti bu cür insanlara qarşı böyük əməliyyat apardı. Azərbaycanlıların da, ukraynalıların da liderini öldürdülər. Bir neçə nəfərə qarşı da qəsd törətdilər, amma öldürə bilmədilər, ciddi xəsarət yetirdilər. Və bu qəsdlərin hamısı o insanların fəaliyyəti ilə bağlı idi”.
“ƏMƏLİYYATI HƏYATA KEÇİRMƏK LAZIMDIR!”
Nəsiman bəy Münhendəki qətlə belə aydınlıq gətirdi: ”1954-cü ildə Azərbaycandan Mikayıl İsmayılov adlı bir şəxsi göndərdilər. Bu adam əski legionçu olub və Düdənginski ilə bir taburda vuruşub. Müharibə qurtarandan sonra İtaliyada yaşayıb, sonra İtaliyadakı SSRİ səfirliyinə müraciət edib və Azərbaycana qayıdıb. Düşünüb ki, artıq hər şey bitib, ona heç nə etməyəcəklər. Lakin geri qayıdandan sonra SSRİ-nin Məxfi İdarəsi onun ailəsini girov götürüb və qarşısında şərt qoyub ki, Düdənginskini öldürməlisən! O da Almaniyaya gəlib, Düdənginski ilə görüşüb, çünki onlar tanış idilər. Və bir müddət Münhendə yaşadıqdan sonra Mikayıl fikrini dəyişib, Düdənginskini öldürmək istəməyib. Bu zaman SSRİ-dən göndərilən bir xanım ona xatırladıb ki, əməliyyatı həyata keçirmək lazımdır. Yoxsa ailənizi başqa tale gözləyəcək… Mənbələrdə göstərilir ki, o, istəmədən, məcburən bu qətli törədib.
Düdənginskini öldürəndən sonra Azərbaycana qayıdıb və bir qədər sonra yaşadığı bağda onu asaraq izi itirdilər”.
60 İL ÖNCƏ… MÜNHENDƏ QƏTL…
Nəsiman bəy qatilin izi azdırdığını da vurğuladı: “1954-cü il noyabrın 20-də onlar şəhərdə yeyib-içirlər, sonra Mikayıl ”dostunu” kirayə yaşadığı evə aparır və öldürür.
Öz paltarını ona geyindirib aradan çıxır. Elə ona görə də, Düdənginskini başqa bir adla dəfn edirlər. Bir həftədən sonra görürlər ki, AzadlıqRadiosunun Azərbaycan xidmətinin baş redaktoru yoxdur, işə çıxmır. Axtarış nəticəsində bir qədər əvvəl şəhərdə naməlum adamın dəfn olunduğunu öyrənirlər. Onu qəbirdən çıxarıb tədqiqat aparanda ölənin kimliyi üzə çıxır… Daha sonra İsmayıl Əkbər Azərbaycan xidmətinin başçısı oldu”.
MƏHKƏMƏ – ÖLDÜRƏN KİM, ÖLƏN KİM…
Nəsiman Yaqublu bu qətlin dünyada əks-səda doğurduğunu söyləyir: “Almaniyada böyük məhkəmə quruldu. Bu materiallar, indi söylədiklərimiz alman mətbuatında geniş yer aldı. Təbii ki, ABŞ öz işçisini diqqətdənkənar qoymazdı. Və tədqiqat hər şeyi açıqladı – öldürən kim olub, nə üçün öldürülüb və s… Abo Düdənginskinin başına gələn bu faciədən sonra həyat yoldaşı Leyli xanım və oğlu Əli bəy ABŞ-a getdilər. O vaxtdan bəri onların haqqında dəqiq məlumat yoxdur. Ancaq onu deyirlər ki, Leyli xanım rəhmətə gedib. Oğlu Əli bəy son illərədək sağmış. Əli bəy 1939-cu il doğumlu olub…”.
“O, YENİ TİPLİ LİDER İDİ!”..
Verilişin bələdçisi Düdənginskini XX əsr Azərbaycanının yetişdirdiyi ən görkəmli şəxsiyyətlərdən sayır: ”Mən həmişə demişəm və indi də təkrar edirəm: O yeni tipli bir lider idi. Bir tərəfdən hərbçi jurnalist, bir tərəfdən siyasətçi, bir tərəfdənsə sırf hərbçidir. Onun hərbi bacarığı ilə jurnalistlik bacarığı yalnız bir nöqtədə birləşir – o da Azərbaycanın müstəqilliyi və azadlığıdır!”. (azadliq.org)