Hökumətyönlü deputat etiraf etdi ki, hakimiyyəti müdafiə edənlər nifrətlə qarşılanır
Etiraf edək ki, bu ölkədə hakimiyyətdən daha çox, hakimiyyətə satılımışlar nifrətlə qarşılanır. Elə bir şəxs tapmaq mükün deyil ki, mövqeyini, əqidəsini, təşkilatını satıb, hakimiyyətə pənah aparsın və cəmiyyətdə hörmətlə qarşılansın. Eyni zamanda hakimiyyətə yarınmaq üçün real müxalifətin ünvanına təhqirlər yağdıranlar da ikrahla qarşılanır. Bugünə qədər Azər Həsrət, Etibar Hüseynov, Hafiz Hacıyev və bu qəbildən olan insanlar haqqında müsbət fikir söyləyən, onları müdafiə edən adam görmüsünüzmü?
Əlbəttə ki, yox. Əslində bu adamlar özləri də başa düşürlər ki, cəmiyyətin nifrətini daşıyırlar. Amma onlar belə yaşamağa qərar veriblər və maddiyyat seçimini ediblər.
Indi bu satılmışlar Milli Şuranı, AXCP-ni hədəf seçiblər və öz aləmlərində gözdənsalma kampaniyası aparırlar. Son olaraq Taleh Şahsuvarlı və Qüdrət Həsənquliyev “duet”i yaranıb və bu adamlar 15 mart mitinqini aşağılamaq, Cəmil Həsənlini gözdən salmaq üçün “dərdləşməyə” başlayıblar.
Amma yenə də Qüdrət Həsənquliyev qaş düzəltdiyi yerdə göz çıxarıb. Belə ki, Cəmil Həsənli haqqında kompromat axtarışına çıxanda, özünü də ifşa edib. Hakimiyyətin müxalifət partiyasının sədri bildirib ki,ÿCəmil Həsənli deputat olduğu zaman hakimiyyəti müdafiə edib, Heydər Əliyevi, Ilham Əliyevi müsbət qiymətləndirib. Daha sonra bildirib ki, Cəmil Həsənliyə cəmiyyət saymazlıq nümayiş etdirib.
Əvvəla, Cəmil Həsənli deputat olanda da öz mövqeyini açıq şəkildə bildirib, cəbhədaşlarına şər-böhtan atmayıb və hakimiyyətin iyrənc kampaniyalarında iştirak etməyib. Prezident seçkilərində isə öz mövqeyini bir daha ortaya qoydu və hökumətin 9 namizədinə qalib gəldi.
Məsələnin ikinci tərəfi daha maraqlıdır. Qüdrət Həsənquliyev etiraf edir ki, Ilham Əliyevi tərif etmək, bu hakimiyyətin müdafiəçisi rolunda çıxış etmək insanı gözdən salıb. Göründüyü kimi, Qüdrət Həsənquliyevin Cəmil Həsənliyə qarşı “kompromat”ı YAP hakimiyyəti ilə bağlıdır. Hökumətin müxalifət partiyasının sədri də başa düşür ki, bu hökumətə yarınmaq, onun sözçüsü rolunda çıxış etmək, Ilham Əliyevi öymək ikrahla qarşılanır. Ən azı öz təcrübəsindən yaxşı bilir ki, insanlar əqidəsini dəyişənlərə “ölü” kimi baxır. Ona görə də öz adlarını özgələrinə qoyurlar və özlərinə qarşı olan nifrəti ləyaqətli insanlara qarşı yönəltmək istəyirlər.
Asılı olmağın, gözükölgəliliyin ən pis tərəfi də budur. Insan özü düşərgəsini dəyişdiyi, mandata satıldığı, komandasına xəyanət etdiyi halda başqalarını ittiham etmək məcburiyyətində qalır.
Əslində, Qüdrət Həsənquliyevə təşəkkür düşür. Ona görə ki, bu hakimiyyətin nə qədər nifrət qazandığını etiraf etdi.
S. Novruz