Milli Şuranın sədri 10 noyabr mitinqilə bağlı yaranmış sualları cavablandırdı
«Mitinqlə bağlı ayrı-ayrı partiya və siyasi qurumlara xüsusi dəvət göndərilməsi məqsədəuyğun sayılmayıb, o cümlədən Islam Partiyasına»
Məlum olduğu kimi, noyabr ayının 10-na Demokratik Qüvvələrin Milli Şurası Bakıdakı “Məhsul” stadionunda mitinq keçirmək haqda qərar verib. Bu məqsədlə Bakı Şəhər Icra Hakimiyyətinə müraciət edilib. Milli Şuranın sədri professor Cəmil Həsənli mitinqlə bağlı “Azadlıq”ın suallarını cavablandırıb.
– Cəmil müəllim, öncə mitinqin noyabr ayının 10-na, həftənin birinci gününə təyin edilməsinə aydınlıq gətirmənizi istərdik. Cəmiyyətdə sual yaranıb ki, niyə məhz bazar ertəsi?
– Bəli, mitinq ayın 10-na, həftənin birinci günü günorta saat 3-ə təyin edilib. Amma nəzərə almaq lazımdır ki, mövcud qanunvericiliyə görə, qarşıdakı həftənin birinci günü, yəni noyabr ayının 10-u qeyri-iş günüdür. Noyabr ayının 9-u, yəni Dövlət Bayrağı günü bazar gününə təsadüf etdiyindən, mövcud qaydalara görə, vətəndaşlara əlavə istirahət günü verilir və bu da noyabrın 10-na düşür. Bu səbəbdən heç bir narahatçılıq yoxdur.
– Bəs mitinqə hazırlıq işləri necə gedir?
– Bu gün, noyabr ayının 5-də (dünən – red.) Milli Şuranın Koordinasiya Mərkəzində 10 noyabr mitinqinə hazırlığın gedişi müzakirə edildi. Bəri başdan deyim ki, Milli Şuranın mitinqində iştirak etmək arzusunda olanlar çoxdur və biz mitinqin çoxminli olacağına əminik. Bildiyiniz kimi siyasi məhbus məsələsi və insan haqlarının vəziyyəti çox böhranlı həddə çatıb. Bu gün onların sayı 100-dən çoxdur. Hətta antidemokratik rejimlər kimi uzun müddət düyanın hədəfində olan nə Belarusda, nə də Rusiyada belə vəziyyət yoxdur. Bu durum ölkəmizin adına, onun demokratik ənənələrinə ləkədir. Ona görə də məqsəd və məramımız siyasi məhbusları, vicdan məhbuslarını müdafiə etmək, onlara dəstək verməkdir. Insan hüquqları ilə bağlı ölkəmizdə yaranmış ağır durumu diqqət mərkəzinə gətirmək, ictimaiyyətin diqqətini buna cəlb etmək, demokratik dəyişiklik istəyimizi, Avrointeqrasiya arzumuzu ifadə etmək mitinqin başlıca qayəsi olacaq. Bütün bunlar Azərbaycan xalqının böyük bir hissəsinin istək və arzusudur. Mitinqə hazırlığın çıxış nöqtəsini də məhz bu ideyalar təşkil edir. Əslində, mətbuatda, saytlarda, sosial şəbəkələrdə mitinqi zəruri edən səbəblər haqqında çox maraqlı müzakirələr gedir və bu müzakirələr özü də mitinqin çoxminli olacağına bir təminatdır.
– Son günlər mətbuatda siyasi partiyaların, o sıradan Islam Partiyasının, bir sıra cəmiyyət və təşkilatların mitinqə dəvət edilməsi, çıxışçıların dairəsi, mitinqin təhlükəsizliyi ilə bağlı çoxlu suallar yaranıb…
– Mitinqlə bağlı cəmiyyəti, mətbuatı və hətta müxtəlif dairələri maraqlandıran sualların böyük bir hissəsini Koordinasiya Mərkəzinin toplantısında müzakirə etdik və bütün bu məsələlərə münasibətdə Milli Şuranın mövqeyini müəyyənləşdirdik. Biz ötən dəfə, oktyabr ayının 12-də olduğu kimi 10 noyabr mitinqini də Milli Şuranın dinc, dünyəvi, çağdaş dünya dəyərlərinə uyğun mitinqi kimi keçirməyə qərar vermişik. Koordinasiya Mərkəzinin toplantısında, ayrı-ayrı partiya və siyasi qurumlara xüsusi dəvət göndərilməsi məqsədəuyğun sayılmayıb, o sıradan Islam Partiyasına. Kim özünü siyasi məhbusların müdafiəsində görmək istəyirsə, siyasi mülahizələrlə həbs edilmiş insanlara dəstək vermək istəyirsə, buyursun gəlsin, öz vətəndaş mövqeyini ifadə etsin. Milli Şura olaraq biz siyasi, dini, milli və etnik mənsubiyyətindən asılı olmayaraq bütün siyasi məhbusları müdafiə edirik. Elə bu məramla da siyasi, dini, milli və etnik mənsbiyyətindən asılı olmayaraq fəal vətəndaş mövqeyi olan hər kəsi mitinqə dəvət edirik.
– Cəmil müəllim, ötən mitinqdə təxribat xarakteri daşıyan IŞID-in bayrağını qaldırmağa təşəbbüs edildi, bu dəfə Milli Şuranın mitinqini hansı təxribatlar gözləyə bilər?
– Milli Şuranın 12 oktyabr mitinqində IŞID-in bayrağını qaldırmağa cəhd hakimiyyətin uğursuz təxribatı idi. Biz bu təxribatın hansı niyyətlə, hansı hakimiyyət orqanının törətdiyin bilirik. Lakin qarşıdakı mitinqdə belə təxribat hallarına digər formalarda cəhd edilə biləcəyini də istisna etmirik. Biz dinc və dünyəvi mitinq keçiririk, tələblərimiz, hədəflərimiz, şüarlarımız insan haqlarına sayğılı münasibətə, siyasi məhbuslarsız Azərbaycana hədəflənib. Bunun xaricində hansısa bir siyasi, dini qrupların müxtəlif dövlətlərin bayraqlarını qaldırması, ekstremist dini təmayyüllərin, simvollarını nümayişinə cəhd etməsi, şübhəsiz ki, təxribat kimi qiymətləndiriləcək. Biz hesab edirik ki, məramımız azad, müstəqil, demokratik Azərbaycan olduğu üçün, başımızın üzərində də Azərbaycan bayrağı dalğalanmalıdır.
Bəyim