“Bakıda mənə senzura qoyublar…”
«Hansısa universitetə gedəndə mənə deyirlər ki, Rusiya haqqında danışma»
Fevralın 3-də “Atlas” Araşdırmalar Mərkəzinin rəhbəri Elxan Şahinoğlunun “Maydandan Maydana” kitabının təqdimatı olub. Tədbirdə Ukraynanın Azərbaycandakı səfiri Aleksandr Mişenko çıxış edib. O, Azərbaycan nümayəndə heyətinin Avropa Şurası Parlament Assambleyasının qış sessiyasında Rusiyanın səsvermə hüququndan məhrum edilməsi ilə bağlı səsvermədə qərarın əleyhinə çıxmasına etirazını bildirib.
Ukraynalı səfir Azərbaycanın tutduğu mövqeyin düzgün olmadığını deyib və “Putin kimi hərbi xuntanı dəstəkləməkdə” ittiham edib.
Bu isə toplantıda qalmaqal yaradıb. Iştirakçılardan bəziləri səfirin dediklərini narazılıqla qarşılayıb.
Ancaq Elxan Şahinoğlu “Azadlıq” radiosuna deyib ki, tədbirdə qalmaqal yaşanmayıb, sadəcə sərt fikir mübadiləsi olub:
“Təhqir səslənmədi, qalmaqal olmadı, bunu sərt polemika adlandırmaq olar. Səfir Azərbaycan nümayəndə heyətinin addımından çox narazı idi. Ola bilsin qeyri-diplomatik ifadələr işlətdi. O özü də bunu etiraf etdi. Tədbirə gələn ekspertlərdən Azərbaycanın mövqeyini müdafiə edən də oldu, bitərəf qalan da.
Səfiri narahat edən odur ki, niyə nümayəndə heyəti yekdilliklə bu qərarın əleyhinə səs verib? Axı bitərəf qalanlar da ola bilərdi. Bu məqamda mən də onunla razıyam. Səfir həm də onu dedi ki, ikili standartlardan şikayətlənən Bakı özü ikili standart aparır…”
“Minval.az” səfirin çıxışından bəzi məqamları verib:
“Azərbaycan Ermənistanla birgə AŞPA-da Rusiyanın lehinə səs verdi. Niyə? Işə bax ki Ermənistan bitərəf qaldı, bununla daha yumşaq davranmış oldu. Azərbaycan yenə ikili standartlardan narazıdır. Doğrudur. Təcavüzlə üzləşən ölkəni qırağa itələyib, təcavüzkarla razılaşmaq olmaz. Təcavüzkar xoşbəxtdir, məmnundur.
Ədalət Azərbaycan tərəfdədir, amma Ukraynanın mətləbə nə dəxli? Sizin deputatlarla danışanda soruşuram, Ukraynanın bu işlərə nə qarışacağı var? Belədisə, gəlin AŞ PA-nın gələn sesisyasında biz də Azərbaycan əleyhinə səs verək. Siz yenə bizi dəstəkləməyəcəksiniz. Bəs sonra? Bu yol deyil.
Mən hər zaman ölkələrimizin gücünü birləşdirməyi təklif etmişəm. Bəli, Ukrayna Azərbaycan probleminə yetərincə diqqət ayırmayıb….
Mənə deyirlər ki, Ukraynanın ərazi bütövlüyü haqda qətnamə olsaydı rəsmi Bakı mütləq Kiyevi dəstəkləyərdi. Cürbəcür nağıllar danışırlar, danışıqlar üçün əlyeri qalmalı olduğunu deyirlər. Biz demirik ki, gəlin Qarabağ ətrafındakı 7 rayonu unudaq”.ÿ
Səfir həmçinin deyib ki, yerli KIV-ə Putinin işğalçı siyasəti haqda yumşaq yazmaq barədə göstəriş verilib:
“Mən çıxıb deməliyəm ki, Bakıda mənə senzura qoyublar? Hansısa universitetə gedəndə mənə deyirlər ki, Rusiya haqqında danışma. Ölkəsi işğal olunan Ukrayna səfiri nədən danışmalıdır bəs?”