Bu gün AzadXeber.az saytının baş redaktoru Nicat Əliyevin məhkəmə prosesi keçirilib. AzadXeber-in verdiyi məlumata görə, Sabunçu Rayon Məhkəməsində baş tutan məhkəmə prosesinin hakimi Anar Qasımov olub.
Nicat Əliyevin kamerasından tapılan mobil telefonla bağlı baş tutan məhkəmə prosesində baş redaktorun cəza müddəti 2 ay artırılıb. Bununla da, ona verilən həbs müddəti 10 il 2 aya qədər uzadılıb.
Xatırladaq ki, 2012-ci may ayının 20-də Avroviziya mahnı müsabiqəsi ərəfəsində saxlanılan Nicat Əliyevə qarşı Cinayət Məcəlləsinin (CM) 234.1-ci (Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) maddəsi ilə ittiham irəli sürülmüşdü. 2013-cü il yanvarın 26-da baş redaktora qarşı CM-nin 167-2.2.1-ci (qabaqcadan əlbir olan bir qrup şəxs və ya mütəşəkkil dəstə tərəfindən müvafiq razılıq olmadan dini təyinatlı ədəbiyyatı, əşyaları və dini məzmunlu başqa məlumat materiallarını istehsal etmə, satış və ya yayma məqsədi ilə idxal etmə, satma və ya yayma), 281.2-ci (bir qrup şəxs tərəfindən hakimiyyətin zorla ələ keçirilməsinə, zorla saxlanılmasına və ya Azərbaycan Respublikasının konstitusiya quruluşunun zorla dəyişdirilməsinə və ya ərazi bütövlüyünün parçalanmasına yönələn açıq çağırışlar etmə, habelə bu cür məzmunlu materialları yayma) və 283.2.3-cü (mütəşəkkil dəstə tərəfindən milli, irqi, sosial və ya dini nifrət və düşmənçiliyin salınmasına, milli ləyaqətin alçaldılmasına, habelə milli, irqi və ya dini mənsubiyyətindən asılı olaraq vətəndaşların hüquqlarının məhdudlaşdırılmasına və ya üstünlüklərinin müəyyən edilməsinə yönələn hərəkətlər, aşkar surətdə və ya kütləvi informasiya vasitələrindən istifadə olunmaqla törədildikdə) maddələri ilə yeni ittihamlar irəli sürülüb. Fevralın 15-də Nəsimi Rayon Məhkəməsində hakim Şahin Abdullayevin sədrliyi ilə keçirilən prosesdə Nicat Əliyevin istintaq müddətinin yenidən 2 ay uzadılması barədə qərar çıxarılıb.
9 dekabr 2013-cü ildə Bakı Ağır Cinayətlər Məhkəməsi Nicat Əliyevin 10 il, digər saxlanılan şəxslər – Nəsirov Elvin və Ceyhun Səfərliyə 9 il, Valeh Abdullayevə 8 il, Camalov Qorxmaz və Hüseynov Elimxana 7 il, Hüseynov Samirə 6 il, Əliyev Əliyə 4 il, Tofiqli Emin və Məmmədov Səfərə isə 3 il 6 ay müddətinə azadlıqdan məhrum edilməsi barədə hökm oxuyub.