Jurnalistlərə qarşı fiziki zor və kobudluq oldu; redaksiyanın videokamerası sındırıldı
Aprelin 27-də Bakıda metronun “20 Yanvar” stansiyasnın qarşısında Nəqliyyat Departamentinin müfəttişləri “Azadlıq” qəzetinin əməkdaşı Xaliq Qarayevə fiziki zor işlədib, əlindəki videokameranı alaraq sındırıb, daha sonra özləri ilə aparıblar.
Hadisə barədə azadliq.info-ya danışan X.Qarayev bildirib ki, saat 12 radələrində “20 Yanvar” metrostansiyası qarşısından işə gələrkən orada nəqliyyat müfəttişlərinin bir nəfər taksi sürücüsünə qarşı zorakı davranışının şahidi olub və üzərindəki videokameranı işə salaraq xəbər hazırlamaq istəyib. O, taksi sürücüsünə vəsiqəsini göstərməklə özünü təqdim edib və hadisənin başvermə səbəbini soruşub. Bu zaman taksidə oturan nəqliyyat müfəttişi cəld maşından enərək ona hücum edib. Həmin müfəttişə tsaksinin yanındakı digər iki müfəttiş də qoşulub. Müfəttişlərdən yalnız biri uniformada olub.
Xalid Qarayev
Əməkdaşımız deyir ki, nəqliyyat müfəttişləri özlərini əsl qoçu kimi aparıblar. Onlar əməkdaşımızı yerə yıxıb vurmağa başlayıb, kamersını zərbə ilə sındırıblar. Əməkdaşımıza sındırılmış kamerasını belə götürməyə imkan verməyiblər.
Nəqliyyat qoçuları Xalid Qarayevi döydükləri məqamda “Azadlıq” qəzetinin digər əməkdaşı, siyasət şöbəsinin müdiri Seymur Həzi təsadüfən əraziyə gəlib və baş verənlərə müdaxilə etməyə çalışıb. O, vəsiqəsini göstərməklə özünü təqdim edib və X.Qarayevi nəqliyyat qoçularının əlindən almaq istəyib. Lakin qoçu-müfəttişlər ona da kobudluq göstərib, “Azadlıq” qəzetinin ünvanına nalayiq sözlər işlədiblər.
Seymur Həzi
Hadisə ilə bağlı Nəqliyyat Nazirliyinin mətbuat xidməti və aparat rəhbərliyinə dəfələrlə zəng etməyimizə, hətta mesaj göndərməyimizə baxmayaraq, sorğumuza cavab ala bilməmişik.
***
Media Hüququ İnstitutu “Azadlıq” qəzetinin peşə fəaliyyətini yerinə yetirən əməkdaşlarının Nəqliyyat Nazirliyinin müfəttişləri tərəfindən döyülməsini, jurnalistlərin peşə alətlərinin əllərindən alınmasını kəskin pisləyir.
“Azadlıq” qəzetinin əməkdaşları Xaliq Qarayev və Seymur Həzi “20 Janvar” metro stansiyası yaxınlığında Nəqliyyat Nazirliyinin müfəttişlərinin taksi sürücülərinə qarşı zorakı davranışlarını lentə köçürərkən təzyiqə məruz qalıblar. Peşə fəaliyyətini yerinə yetirən jurnalistlər müfəttişlər tərəfindən döyülüblər. Jurnalistlərə məxsus video kameranı yarasız hala salan müfəttişlər kameranı özləri ilə aparıblar.
MHİ peşə borcunu yerinə yetirən jurnalistlərə basqıların Cinayət Məcəlləsinin 163-cü maddəsi üzrə məsuliyyət yaratdığını qeyd edir. Təəssüflər olsun ki, 2012-13-cü illərdə jurnalistlərə qarşı yol verilən 50-dən artıq basqı olayı ədalətli araşdırılmayıb, jurnalistlərə təzyiq edənlər cəzalandırılmayıb. MHİ cinayət məsuliyyəti yaradan belə hadisələrin ədalətli araşdırılmamasının daha qorxunc olduğunu, son illərdə baş verən basqıların heç birinin ədalətli araşdırılmadığını vurğulayır. Belə olaylar peşə fəaliyyətini yerinə yetirən jurnalistləri döyənlərin jurnalistin peşə fəaliyyətinə mane olmağa görə məsuliyyətə cəlb olunmamasının nəticəsidir. Cəzasızlıq mühiti qanunsuz əməllərə yol verənləri bunu xəbərləyən jurnalistlərə qarşı daha amansız rəftara həvəsləndirir.
Media Hüququ İnstitutu peşə borcunu yerinə yetirən jurnalistlərə qarşı qanunsuz hərəkətləri kəskin pisləyir. Jurnalistlərə qarşı törədilən belə hərəkətlər insanların məlumat axtarmaq, almaq və yaymaq azadlığına çox ciddi qorxular yaradır. Media Hüquqı İnstitutu əlaqədar qurumları jurnalistlərin döyülməsi, peşə alətlərinin əllərindən alınması olayını ciddi və operativ araşdırmağa, qanunsuzluq edənlərin cəzalandırılması üçün gərəkli ölçülər götürməyə çağırır.
***
AXCP “Azadlıq” qəzetinin əməkdaşları Xaliq Qarayev və Seymur Həziyə qarşı Nəqliyyat Nazirliyi müfəttişlərinin zorakılığı ilə bağlı bəyanat verib. Bəyanatda jurnalistlərin peşə fəaliyyətlərini yerinə yetirərkən fiziki zorakılığa məruz qaldıqları, redaksiyanın texniki avadanlığının (videokamera) sındırılaraq götürüldüyü xatırladırır və bu, müstəqil mətbuata dövlət qurumlarının növbəti basqısı kimi qiymətləndirilir.
Azərbaycan hakimiyyətinin azad sözün qənimi kimi ad çıxardığını, buna görə də beynəlxalq söz azadlığını müdafə təşkilatlarının ölkə başçısı İlham Əliyevi mətbuatın düşmənləri siyahısına saldığını qeyd edən AXCP daha sonra diqqəti bilavasitə “Azadlıq” qəzetinə qarşı rəsmi aqressiyaya yönəldir. Partiya xatırladır ki, buna qədər “Azadlıq” qəzetinin əməkdaşları bir neçə dəfə döyülüb, onların həyatına sui-qəsd təşkil olunub və bu cinayətlərin heç birinin üstü açılmayıb. Qəzetin bir neçə əməkdaşı həyatlarına yaranan təhlükəyə görə ölkəni tərk etmək məcburiyyətində qalıb. Qəzet redaksiya binasından zorla çıxarılıb, dəfələrlə yüksək məbləğli məhkəmə cərimələrinə məruz qalıb. Hazırda da qəzetin bank hesabına yüksək cərimələrlə əlaqədar həbs qoyulub.
AXCP bütün bunları hakimiyyətin “Azadlıq” qəzetini susdurmaq, fəaliyyətini dayandırmağa məcbur etmək üçün çabaları kimi qiymətləndirir və son hadisəni də qəzetə qarşı bu cür rəsmi münasibətin təzahürü sayır.
AXCP qəzet əməkdaşlarının döyülməsi faktının “Azadlıq” radiosu işçilərinə qarşı yeni təhdid və şantajla eyni vaxta təsadüf etməsinə də diqqət yönəldərək bunu ölkədə müstəqil medianın, azad sözün bütövlükdə təhlükə altında qalmasına əlavə dəlil hesab edir.
AXCP bəyan edir ki, hakimiyyət müstəqil mediaya qarşı düşmən münasibətini davam etdirməklə prezident seçkisinə 6 ay qalmış yerli və beynəlxalq ictimaiyyətə öz mahiyyətinin dəyişməzliyi haqda neqativ mesaj verir. Hakimiyyət bütün bunlarla nümayiş etdirir ki, ölkədə azad sözü boğmaq niyyətindən əl çəkməyib.
“Hakimiyyəti həm cəmiyyətimiz, həm də onun özü üçün yaxşı perspektivlər vəd etməyən bu aqressiv siyasətindən imtin etməyə çağırır və konkret halda “Azadlıq” qəzetinin əməkdaşlarına qarşı sonuncu zorakılıq faktının araşdırılmasını, günahkarların məsuliyyətə cəlb olunmasını tələb edirik”, deyə bəyanatda bildirilir.