Maliyyə Nazirliyinin ləğv olunmuş Milli Təhlükəsizlik Nazirliyinin keçmiş fəaliyyəti dövrü ilə bağlı apardığı maliyyə yoxlamaları başa çatıb. Bu haqda Gununsesi.info-ya daxil olan məlumatda bildirilir ki, sabiq nazir Eldar Mahmudovun nazirlikdə korrupsiya əməllərinə yol verməsi bu yoxlamalara səbəb olub.
Məlumatda qeyd olunur ki, Maliyyə Nazirliyinin yoxlamalara başlamasında əsas məqsəd “mənbələrə” ayrılan milyonların necə talan edildiyini araşdırmaq olub. Yoxlamalar zamanı şübhələr bir daha təsdiqini tapıb. Yoxlamaların nəticəsi ilə bağlı siyasi rəhbərliyin mövqeyindən sonra onun Baş Prokurorluq Yanında Korrupsiyaya Qarşı Mübarizə Idarəsinə təqdim ediləcəyi gözlənilir.
Bu isə sabiq nazir Eldar Mahmudova qarşı korrupsiya ittihamı deməkdir.
Maliyyə Nazirliyinin yoxlamaları ilə bağlı sualı cavablandıran Dövlət Təhlükəsizlik Xidmətinin sözçüsü Arif Babayev bu məsələylə bağlı yoxlamaları aparan quruma müraciət etməyimizi tövsiyyə edib: “Bu məsələ ilə bağlı Maliyyə Nazirliyinə müraciət edin. Qoy, sizin suallarınızı Onlar cavablandırsın”.
Xatırladaq ki, bir neçə gün əvvəl mediada Eldar Mahmudovun və dəstəsinin vətəndaşlara qarşı qanunsuz əməlləri ilə bərabər həm də dövlət büdcəsini talan etməsinə dair xəbərlər yayılıb. Həmin xəbərlərdə deyilir ki, eks-nazir Eldar Mahmudov “mənbələr” adıyla hər il büdcədən 7-8 milyon manat vəsait silib.
Bundan başqa MTN-nin nəzarətində olan QHT və KIV-lər, habelə ayrı-ayrı jurnalistlər üçün nəzərdə tutulan “paketlər” mənimsənilib.
Maliyyə Nazirliyi isə yoxlamalar barəsində açıqlama verməkdən imtina edib: “Nazirlik bu xəbəri nə təsdiq, nə də təkzib edir. Dövlət sirri ilə bağlı olan məsələlər barəsində şərh vermir”.
Bu arada “Azadlıq”a da ilginc məlumatlar daxil olub. Məlumatlarda bildirilir ki, MTN-də yoxlamalar aparılan ərəfədə maliyyə naziri Samir Şərifov barədə “agent” iddiası ilə bağlı ciddi araşdırma aparılıb. Nəticədə bu materialın ortaya çıxmasında Eldar Mahmudov şübhəli bilinib. Bildirilir ki, bir neçə gün əvvəl deputat Zahid Orucun açıqlamalarında əslində bu məsələ nəzərdə tutulub. Qeyd edək ki, Zahid Oruc Eldar Mahmudov və dəstəsinin həbsxanada da fəaliyyətdə olduğunu, şifrəli məlumatlar ötürüldüyünü bildirmişdi.