Yeni rəis daha iki nəfəri azad etdi; Tağı Əhmədovun rəis müavini olan qohumu da yaxın günlərdə postunu təhvil verəcək
“Bakı Metropoliteni” Qapalı Səhmdar Cəmiyyətinin yeni sədri Zaur Hüseynov növbəti dəyişiklik barədə müvafiq əmrlər imzalayıb. Modern.az saytının məlumatına görə, metropolitenin baş mühasibi Larisa Xalafli tutduğu vəzifədən çıxarılıb. O, 1988-ci ildən bu vəzifədə çalışırmış.
QSC sədrinin başqa bir əmri ilə metropolitenin Hərbiləşdirilmiş yanğından mühafizə şöbəsinin rəisi Vidadi Tağıyev də vəzifəsindən azad edilib. V.Tağıyev isə 1999-cu ildən indiyədək şöbə rəisi vəzifəsini tuturdu. Rəis postundan azad edilən V.Tağıyev yanğınsöndürən vəzifəsinə keçirilib.
“Bakı Metropoliteni” QSC-dən verilən açıqlamada hər iki faktı təsdiqləyiblər. Bildirilib ki, sədr Zaur Hüseynovun əmrinə müvafiq olaraq baş mühasibin səlahiyyətlərinin icrası baş mühasibin müavini Həyat Gülmətovaya həvalə olunub.
Digrə əmrlə Rafiq Hüseynqulu oğlu Müvəffəq metropolitenin Hərbiləşdirilmiş yanğından mühafizə şöbəsinin rəisi vəzifəsinə təyin edilib.
“Azadlıq”a daxil olan məlumata görə, keçmiş rəis Tağı Əhmədovun yaxın qohumu olumu Arif Rəsulovun da yaxın günlərdə işdən çıxarılacağı gözlənilir. Arif Rəsulov rəis müavini postunu tutur. Verilən məlumatda bildirilir ki, artıq Arif Rəsulov artıq kabinetindən əşyalarını toplamaqla məşğuldur.
“Bakı Metropoliteni” QSC-dən onu da bildiriblər ki, sədr Zaur Hüseynov qurumun rəhbərliyinə daxil olan şəxslərin iştirakı ilə müşavirə keçirib. Müşavirədə xidmət rəislərinin hesabatlarını dinləyən sədr nöqsanları müzakirə etdikdən sonra müvafiq tapşırıqlar verib.
Tapşırıqlardan biri də metropoliten işçiləri üçün “Bilgəh” istirahət sahəsinin növbəti mövsümə hazırlığı ilə bağlı olub. Zaur Hüseynov oradakı bütün köhnə binaların və avadanlıqların yenilərilə əvəz olunmasının zəruriliyini vurğulayıb.
Xatırladaq ki, “Bakı Metropoliteni”nin yeni rəhbəri Zaur Hüseynov işə başlayandan sonra qısa müddət ərzində metroda bir sıra dəyişiklik edilib, keçidlərdə və stansiyalardakı ticarət ləğv edilib, reklamlar yığışdırılıb.