Əli Kərimli Milli Şuranın vahid namizəd qərarı və ölkədə dəyişiklik imkanlarından danışdı (VİDEO)
Dünən Demokratik Qüvvələrin Milli Şurasının prezidentliyə vahid namizədi bəlli olandan sonra AXCP sədri Əli Kərimli “Azadlıq” radiosunda bu mövzu ətrafında sualları cavablandırıb:
– Milli Şuranın qərarını ağrılı hesab etmək olarmı?
– Xeyr, əksinə, çox uğurlu bir addımdır. Azərbaycan müxalifəti xeyli müddət idi ki, addım-addım bu mərhələyə yaxınlaşırdı. Hökumətin bütün təbliğatı onun üzərində qurulmuşdu ki, Azərbaycan müxalifəti birləşə bilməz. Birləşsə də, vahid namizəd müəyyənləşdirə bilməz. Azərbaycan müxalifəti seçkiyə 3-4 ay qalmış iqtidarın təbliğat tezislərini əlindən aldı. Indi məlum oldu ki, biz birləşə bildik, vahid namizədimizi də nəinki seçdik, həm də yekdilliklə seçdik. Demək olar ki, bütün ictimai-siyasi qüvvələr Milli Şuranın vahid namizədinə dəstək veriblər. Hesab edirəm ki, bu gün qəbul olunmuş qərar doğrudan da tarixi qərardır və yeni dövrün başlanğıcıdır.
Əlbəttə, elə hesab etmirəm ki, bu qərarın qəbulu ilə bizim əsas işlərimiz görülmüş olacaq. Amma yeni bir mərhələnin başlanmasına çox böyük bir təkan olacaq.
– Müsavat partiyası hələ ki, İsa Qəmbərin namizədliyini geri götürməyib, qərarın qüvvədə qaldığını elan etdilər. Qeyd ediblər ki, Rüstəm Ibrahimbəyovun namizədliyi qeydiyyata alınmayana qədər bu qərar qüvvədədir. Bu, ümumi qərardan yayınmadır, yoxsa ümumi bir plandır?
– Bu, Müsavat partiyasının mövqeyidir. Əlahiddə mövqedir və Milli Şuranın digər üzvləri tərəfindən belə qeyd-şərtlər olmayıb. Mən Xalq Cəbhəsi adından mövqe bildirdim. Orada təmsil olunan digər partiyalar və vətəndaş cəmiyyəti nümayəndələri də mövqelərini bildirdilər. Bu mövqelərin mütləq əksəriyyətində xüsusi bir şərt olmadan, Rüstəm Ibrahimbəyovun namizədliyi müdafiə olunmuşdu. Bəlkə də Müsavat partiyasının yanvar ayındakı qərarı Məclisin qərarı olduğuna görə belə bir qərar qəbul olunub. Yaxşı olardı ki, bu qərarı Müsavat partiyasının xüsusi yetkililəri ilə müzakirə edəsiniz. Mən bu qərarı şərh etməyə səlahiyyətli deyiləm.
Mən o məsələyə diqqəti cəlb etmək istəyirəm ki, hər halda, Müsavat Partiyası Milli Şuranın vahid namizədini dəstəklədi. Hamılıqla bu qərara səs verdi və elan etdilər ki, Rüstəm Ibrahimbəyov həm də Müsavat partiyasının vahid namizədidir. Hesab edirəm ki, hazırkı mərhələ üçün bu önəmlidir.
– Rüstəm İbrahimbəyaov Bakıda deyil, gələcəkmi? Nə zaman gələcək?
– Gələcək. Məncə, “Rüstəm Ibrahimbəyov hansı gün bura gələcək” mövzusu bu qədər önəmli olmalı deyil. Önəmli o olmalıdır ki, Rüstəm Ibrahimbəyov seçki kampaniyasında iştirak edəcəkmi? Mən əminəm ki, o gələcək və seçki kampaniyasında iştirak edəcək. O, bu gün (dünən-red.) bəyan edib ki, seçki kampaniyasında iştirak edəcək. Onu da bəyan edib ki, həbsdən də çəkinmir. Deyib ki, gələcəm və həbs olunacağam. Hətta deyib ki, onun həbs olunmaq ehtimalı da bütövlükdə demokratik qüvvələrin xeyrinə işləyə bilər. Bu qədər cəsarətlə ortalığa mövqe qoyub. Rüstəm Ibrahimbəyovun xarakterini, üzərinə götürdüyü məsuliyyətin böyüklüyünü də nəzərə alaraq, belə bəyanatlardan, Milli Şuranın və xalqın böyük etimadından sonra onun Azərbaycana gəlməməsi söhbət predmeti olmalı deyil. Konkret görüşlər var. Bizim özümüzün də marağındadır ki, Rüstəm Ibrahimbəyov bu saat bizdən, xalqdan aldığı mandatla dünya ictimaiyyətinin diqqətini Azərbaycandakı seçkilərə cəlb etsin. Artıq məlumat almışıq ki, Rüstəm Ibrahimbəyov ABŞ-a səfərə dəvət alıb. Baxmayaraq ki, ABŞ-da yenicə səfərdə olmuşdu, amma Konqresdə dinləmələr olacaq və Rüstəm Ibrahimbəyov da o dinləmələrə dəvət olunub. Rüstəm Ibrahimbəyov ora getməsin? Təbii ki, getməyi yaxşıdır. Brüsseldə ciddi bir proqram hazırlanır, orada olmağı lazımdırmı? Lazımdır. Qardaş Türkiyədə ciddi bir proqram hazırlanır. Iştirak edib görüşlər keçirmək lazımdırmı? Lazımdır. Bəlkə gələndən sonra buraxmadılar… Indi düzgün olmazdımı ki, Rüstəm bəy beynəlxalq aləmdə görməli olduğu işlərin hamısını görsün, sonra da gəlsin burda bizimlə bərabər seçki kampaniyasında iştirak etsin və ona rəhbərlik eləsin.
– Yəqin ki, bəzi narahatlıqlara su səpmək üçün Milli Şuranın konkret addımları olacaq. Siz seçkiyə yalnız vahid namizədlə yox, bir komanda ilə getdiyinizi nə ilə sübut edirsiniz?
– Əvvəla, mən Rüstəm Ibrahimbəyova inanıram. Artıq Milli Şura təşkilatlanmağa başlayır. Bizim növbəti sessiyamız yaxın günlərdə olacaq. Bu sessiya təşkilatlanma məsələsinə həsr olunacaq. Həm seçki qərargahı formalaşdıracağıq, həm Icra Aparatının formalaşması başa çatacaq, həm də Milli Şuranın komissiya və komitələri formalaşacaq. Vahid komanda vahid namizədlə bərabər formaya düşəcək.
Növbəti mühüm məqam ondan ibarətdir ki, Milli Şura iki illik keçid dövrünün “Yol xəritəsi”ni hazırlayacaq. Biz prezidentliyə vahid namizədin öhdəliklərini qəbul etdik. Rüstəm bəy də həmin sənədi dərhal imzaladı. Həmin sənəddə prezidentliyə vahid namizəd üzərinə götürdüyü öhdəlikləri konkretləşdirdi. O cümlədən də o öhdəliklərin arasında 2 il ərzində konstitusiya referendumunun keçirilməsi, yeni parlament, yeni prezident seçkilərinin keçirilməsi və vahid namizədin daha heç bir seçkidə iştirak etməməsi ilə bağlı konkret öhdəliklər var. Amma Milli Şuranın özünün qarşıdakı iki illik keçid dövrünü necə təsəvvür etdiyilə bağlı bir “Yol xəritəsi” hazırlayacağıq və yaxın zamanlarda o “Yol xəritəsi” təqdim olunacaq. Bizim platformamız olacaq, vahid komandamız olacaq. Hesab edirəm ki, bu qısa müddətdə Azərbaycan müxalifətinin əldə etdiyi çox mükəmməl birlik modelidir.
– Ceyhun imzalı dinləyici yazır: Milli Şura boş söhbətdir. Azərbaycanda minlərlə adam var ki, heç biri Rüstəm Ibrahimbəyovu tanımır. Əli Kərimliyə üz tutub deyirəm, Ictimai Palatanı yaradıb, “inqilab olacaq” dediniz. Bu məqsədlə mitinqlər etdiniz. Gələn olmadı. Ona görə ki, o aksiyalar hakimiyyətin özünə lazım idi. Hakimiyyət sizdən çox gözəl istifadə etdi. Hər aksiyadan sonra çıxıb utanmaz-utanmaz yeni mərhələdən danışdınız. Misirdə ikinci inqilab baş verir, Avropanı etiraz dalğası bürüyüb. Biz isə hamı lal-dinməz dayanmışıq. Buna səbəb sizin 20 illik iqtidar kimi rəzil siyasətiniz olub. Allah bilir, altınızda milyonlarınız var. Hələ sizin oğlunuzun Londonda kef etməsini demirəm. Siz müxalifət oktyabrdan sonra siyasi səhnədən silinəcəksiniz.
– Xədicə xanım, həmin o haqqında bəhs olunan Misirdə də 30 ildən artıq Mübarəkin diktaturası hökm sürürdü. Misirin də özünün ceyhunları var idi. O zaman Misirdə mübarizə aparan insanlar var idi, onlar meydanlara çıxırdılar, həbs olunurdular, öldürülürdülər, sui-qəsdlərə məruz qalırdılar. Misirin ceyhunları da bax, beləcə mesajlar yazırdılar, rəy yaradırdılar, həmin adamları bəyənmirdilər. 33 il bacarmadılar. Niyə görə? Çünki formalaşmış bir avtoritar rejim idi. Amma bir gün xalq ayağa qalxanda bacardılar. Avtoritar rejimlərlə siyasi partiyaların apardığı mübarizə nəticə verə bilməz. Xalq qoşulmalıdır. Biz də üzərimizə düşəni böyük şərəflə, bütün mərhələlərdə həyata keçirib, mütəmadi olaraq xalqı mübarizəyə dəvət etmişik. Indi xalq özü qərar verməlidir ki, hansı mərhələdə kütləvi şəkildə bu prosesə başlasın. Məsələn, qardaş Türkiyədə son illərdə nə qədər problemlər baş vermişdi ki, cəmiyyətdə narazılıqlar yaradırdı. Bu parkla bağlı hadisə çıxana qədər ondan daha vacib məsələlər var idi, bəlkə də. Amma belə kütləvi etiraz olmamışdı. Deməli, xalq özü müəyyənləşdirir ki, hansı məqamda kütləvi etiraza başlayacaq. O cümlədən Misirdə də, digər ölkələrdə də…
Biz 20 ildir bu, xalqla bərabər xalqdan bir addım öndəyik. Çünki bizim çəkdiyimizi hamı çəkmir ki. Bilirsiniz ki, bunlarla mübarizə aparmaq bizə nələrin bahasına başa gəlir. Biz bu mübarizənin önündəyik. Amma xalq hər gün inqilab etməz, hər gün hərəkat aparmaz. Biz mütəmadi olaraq formada olmağa, bunu təmin etməyə çalışırıq. Xalq nə zaman hamılıqla qalxacaqsa, Azərbaycanda da dəyişikliklər olacaq.
Qaldı ki, mənim oğlumun Londonda oxumağına, oğlum Bristolda təhsil alır. Mən onunla fəxr edirəm. Yeri gəlmişkən, imtahanlarını da çox uğurla yekunlaşdırıb. Hamı kimi, yataqxanada qalır. Mənim oğlumun evi yoxdur, maşını yoxdur. Məktəbə piyada gedir, ictimai nəqliyyatdan istifadə edir və oğlum yaxşı oxuduğuna görə onunla fəxr edirəm. Mən çalışacağam ki, Azərbaycanın bütün gəncləri yaxşı təhsil ala bilsin. Azərbaycanın gəncləri yaxşı təhsil alsa, bizim o can atdığımız dəyişikliklər də daha tez başa gələ bilər. Amma bizim apardığımız mübarizə nələrin bahasına başa gəlir, onu da qərəzsiz dinləyicilərimiz və oxucularımız bilirlər. AXCP-yə qarşı, şəxsən özümə qarşı aparılan hər cür çirkin kampaniyalar, məhrumiyyətləri hamı bilir. Günü bu gün mənim qaynım 15 aydır ki, qurama ittihamla həbsdədir. Faizi ilə bərabər ödənilmiş krediti Azərbaycan hüquq-mühafizə orqanları mənimsəmə kimi qələmə verib 15 aydır ki, onu MTN-in təcridxanasına saxlayırlar. Bu yalnız son illərdə mənim rastlaşdığım məhrumiyyətdir. Biz həm də o ceyhunkimiləri azad etmək üçün bu mübarizədəyik.
– Kamran adlı dinləyici: Biz həmişə sizi meydanlarda görmüşük, uzun illərdir ki, Əli Kərimli, Isa Qəmbər mübarizə aparır. Bəs, niyə indi siz yox Rüstəm Ibrahimbəyov vahid namizəd oldu?
– Kamran bəyin söylədikləri Azərbaycan müxalifətinin nə qədər fədakar olduğunu bir daha sübut edir. Uzun illərdir mübarizə aparan bizik, o məhrumiyyətləri də biz yaşayırıq. Açığı, indi də görüləsi işlərin əksəriyyətini biz görəcəyik. Amma cəmiyyətin müəyyən təbəqəsində belə bir fikir formalaşmışdı ki, “müxalifət partiyaları öz iddialarında çox israrlıdır, öz ambisiyalarında çox israrlıdır, onlar olmasa, kompramis bir variant olsa, onlar birləşsə, biz də qoşularıq”. Hərçənd, mən bu fikirlərlə razı deyiləm. Çünki cəmiyyət düşünməlidir ki, Azərbaycan hakimiyyəti dəyişməyibsə, müxalifət niyə dəyişməli idi? Amma hər halda, müəyyən bir təbəqə belə düşünürdü. Mən bunu da açıq deməliyəm ki, bizim bu jestimiz, namizədliyimizdən geri çəkilib, güzəştə gedib, Rüstəm Ibrahimbəyov kimi müstəqil bir adamın namizədliyinə verdiyimiz dəstək bütövlükdə cəmiyyətin partiya üzvü olmayan kəsiminə, vətəndaş cəmiyyətinə etdiyi bir güzəştdir.
– İslam Qubad adlı dinləyici yazır: Bu rejim sizin zəif işləməyinizdən istifadə edib arzusuna çatıb. Gənclərin əksəriyyətinin savadı yoxdur. Siz bunları seçkiyə necə gətirəcəksiniz?
– Onda gəlin, Özbəkistandakı vəziyyəti də yazaq Özbəkistan müxalifətinin ayağına, Tacikistanda, Şimali Koreyada baş verən hadisələri də yazaq müxalifətin ayağına. Bu diktatorların heç bir günahı yoxdurmu? Günahsız adamları şərləyib həbs etdirənlərin, ölkənin var-dövlətini talayaların heç bir günahı yoxdur? Siz öz vicdanınızı rahatlatmaq üçün mövqe seçmisiniz. Hər şeyi müxalifətin üstünə yıxa bilərsiz. Çünki müxalifəti qınamaq, ittiham eləmək təhlükəsizdir. Amma oğruya demək ki, “sən 19 ildə niyə 48 milyardı bu ölkədən aparmısan”, hər adamın işi deyil. O oğruya “bu ölkənin altı da, üstü də niyə bir ailəyə mənsub olmalıdır” demək çətindir. Amma bunu deyə bilən adamlara siz rahatlıqla istədiyinizi deyə bilirsiz.