Yerli və beynəlxalq ictimaiyyətin təkidli tələblərinə baxmayaraq hakimiyyətin vətəndaş cəmiyyəti fəallarına qarşı repressiyaları davam etməkdədir. İctimai fəllar təqib olunur, qanunsuz olaraq həbsə atılır, saxta ittihamlarla tutulmuş siyasi məhbuslar isə fantastik müddətə ağır həbs cəzasına məhkum edilirlər.
Vətəndaş cəmiyyətinin tanınmış və parlaq nümayəndələrindən biri, hüquq müdafiəçisi Rəsul Cəfərovun 2 ay davam edən məhkəmə prosesində ona qarşı irəli sürülən ittihamların qurama və əsassız olması sübuta yetirilməsinə baxmayaraq məhkəmə siyasi sifarişlə onu 6 il 6 ay müddətinə azadlıqdan mərhum edilməsi barədə hökm çıxarıb.
Hazırda məhkəməsi davam edən digər tanınmış hüquq müdafiəçisi İntiqam Əliyevə qarşı da hakimiyyət oxşar münasibət sərgiləyir. Ona qarşı irəli sürülmüş vergidən yayınmaq, qanunsuz sahibkarlıq fəaliyyəti, vəzifə səlahiyyətlərini aşmaq və s. kimi absurd ittihamların heç biri öz təsdiqini tapmamasına baxmayaraq dövlət ittihamçısı İntiqam Əliyevin 10 il həbs cəzasına məhkum olunmasın istəyib.
Hakimiyyət təkcə ictimai siyasi fəalları həbs etməklə kifayətlənmir, onları həbsxanada belə rahat buraxmır. 2014- cü ilin dekabr ayında 12 saylı CÇM- də döyülərək vəhşicəsinə qətlə yetirilən məhkum Elşad Babayevə qarşı törədilən cinayətə etiraz edən jurnalist- siyasi məhbus Araz Quliyev başda olmaqla bir qrup dustaq 3 ay “kars”- da saxlanıldıqdan sonra bir neçə gün öncə daha sərt rejimli həbsxanaya- Qobustan Qapalı Həbsxanasına göndərilib. Eyni yanaşma ilahiyyatçı alim, vicdan məhbusu Tale Bağırzadəyə qarşı da həyata keçirilib.
Təəssüflə qeyd etmək lazımdır ki, hakimiyyət ictimai-siyasi fəaliyyətinə görə insanların təqib və həbs olunması prosesini davam etdirir. Demokratik Qüvvələrin Milli Şurasının 05 aprel mitinqindən sonra AXCP fəalları Saqif Qurbanov, Türkel Azərtürk və Ruslan Nəsirli şərlənərək həbs olunublar.
Bütün yuxarıda qeyd olunanlar onu göstərir ki, beynəlxalq aləmdən təcrid olunma yolunu tutan, xalq arasında dayaqlarını tamamilə itirməkdə olan Əliyev rejimi xalqın artan sosial- iqtisadi narazılığı müqabilində öz hakimiyyətini qorumaq üçün son ümid kimi repressiyalardan alət kimi istifadə edir, onun siyasətinə etiraz edənlərə təzyiq göstərir, onları həbsə atır, ölkədən sürgün edir. Amma bütün bu çətinliklərə baxmayaraq Azərbaycan xalqı öz haqqı və hüquqları uğrunda mübarizəni ləyaqətlə davam etdirməkdədir.
Demokratik Qüvvələrin Milli Şurası bir daha bəyan edir ki, Azərbaycan xalqının layiqli həyat şəraitinin təmin olunması, vətəndaşlarımızın hüquq və azadlıqlarının qorunması, “siyasi məhbuslarsız Azərbaycan” ideyasının gerçəkləşməsi uğrunda öz mübarizəsini sonadək davam etdirəcək. Demokratik Qüvvələrin Milli Şurası bir daha hakimiyyəti vətəndaş cəmiyyəti fəallarına qarşı apardığı repressiyaları dayandırmağı, şərləyərək həbs etdiyi siyasi məhbusları qeyd şərtsiz azadlığa buraxmağı tələb edir.