Hakimiyyət tanınmış vəkili, çıxışlarından təşvişə düşərək, şərlədi
Həbsə ilk reaksiya AXCP sədrindən gəldi: “Məqsəd cəmiyyəti qorxutmaqdır”
Tanınmış vəkil Qurban Məmmədov həbs edilib. Dünən səhər saat 11.00-da Qurban Məmmədov Nəsimi polisinə çağırılıb. Vəkilin köməkçisi bildirib ki, onun polisə çağırılmasının səbəbi sentyabr ayında baş vermiş avtoqəza ilə bağlıdır: “Həmin qəzada ”stayanşikin” ayağı sınmışdı. Guya araşdırma nəticəsində müəyyən olub ki, həmin qəzada günahkar Qurban Məmmədovdur”.
Axşam saatlarında isə bəlli olub ki, Qurban Məmmədov polisdən Nəsimi Rayon Məhkəməsinə aparılıb. Məhkəmə vəkil barəsində iki ay həbs qətimkan tədbiri seçib.
“Azadlıq” hələ bir neçə ay əvvəl Qurban Məmmədovun həbs oluna biləcəyi barədə xəbər yaymışdı. Vəkil özü də qəzetimizə açıqlamasında belə bir təhlükənin olduğunu təsdiqləməklə yanaşı məsələnin təfərrüatlarını açıqlamışdı. Qurban Məmmədov həmin vaxt demişdi: “Bir məsələyə görə məni narahat edirlər. Söhbət təxminən bir il əvvəl baş vermiş qəzadan gedir. Mən avtomobil dayanacağında maşını saxlayanda oradakı nəzarətçinin səhv komandası nəticəsində başqa bir maşın da dayanacağa girib və nəticədə o, iki maşının arasında qalıb. Yəni, nəzarətçinin diqqətsizliyi və səhv komandası nəticəsində bu hadisə baş verib. Həmin yerdə xeyli sayda müşahidə kamerası var və onunla müəyyən etmək olar ki, günah kimdədir. Buna baxmayaraq mən onu dərhal xəstəxanaya apardım, müalicə etdirdim, hətta işləyə bilmədiyinə görə mən ona 6 ay 300 manat yardım etdim. Bu hadisənin üstündən xeyli müddət keçsə də, bu yaxınlarda məni 20-ci polis bölməsinə dəvət etdilər. Orada Maqsudov Mürsəl Isa oğlu adlı bir şəxs üzümə durdu ki, guya qəzanın şahidi olub və məni ittiham etdi. Lakin bir-iki sual verdikdən sonra aydın oldu ki, bu şəxs öyrədilmiş adamdır. Çünki o deyirdi ki, qəza axşam olub. Halbuki hadisə günorta baş verib. Qısası, mən bildim ki, bunu öyrədiblər ki, üzümə dursun. Blə bir şey var”.
Qurban Məmmədovun həbsinə ilk reaksiya isə AXCP sədri Əli Kərimlidən gəlib. O, hadisə ilə bağlı “Azadlıq”a bunları deyib: “Qurban Məmmədovun həbs olunacağı gözlənilirdi. Bununla bağlı siyasi sifariş var idi. Mətbuatda da bu barədə müzakirələr aparılırdı. Məlumdur ki, Qurban bəy ölkənin ən prinsipial, cəsarətli hüquqşunaslarından, ictimai xadimlərindən biridir. O hüququ pozulan, haqqı tapdanan vətəndaşlara zaman-zaman arxa olub. Təkcə peşəkar hüquqşunas kimi deyil, həm də vətəndaş mövqeyi ilə öndə gedib. Qurban bəy indiki sülalə hakimiyyətinin demokratik yolla dəyişməsindən ötrü açıq və qanun çərçivəsində, həm də olduqca prinsipial siyasət aparan xadimdir. Qurban bəy Azərbaycan hakimiyyəti haqqında əksəriyyətinin dilə gətirməyə ehtiyatlandığı, udduğu bir sıra faktları açıq ifadə etdiyinə görə hədəfə gəlib. Qurban bəy kimilərinin hədəfə alınması cəmiyyətdə qorxu yaratmaq məqsədi daşıyır. Bir az əvvəl biz başqa bir tanınmış vəkil Aslan Ismayılovun, keçmiş daxili işlər naziri Isgəndər Həmidovun, keçmiş müdafiə naziri Rəhim Qazıyevin və Ibrahim Ibrahimlinin zorakılığa məruz qalmalarının şahidi olduq. Qurban Məmmədovun həbsini bu silsilədən daha qəddar bir hərəkət kimi qiymətləndirmək lazımdır. O, heç bir cinayət törətməyib. Onun barəsində sifarişlə cinayət işi quraşdırılıb. Qurban bəy əvvəllər də siyasi məhbus həyatı yaşayıb. Inanıram ki, bu sınaqdan da ləyaqətlə çıxacaq.
Azərbaycan cəmiyyəti də onu müdafiə edəcək. Nəzərdə tutulurdu ki, Qurban bəy həm də Milli Şuranın üzvü kimi fəaliyyət göstərsin. Onun həbsi həm də Milli Şuranın formalaşmasına hakimiyyətin isterik reaksiyasıdır. Hakimiyyət başa düşməlidir ki, bütün avtoritar rejimlər bu mərhələni keçiblər. Opponentələrə qarşı repressiv addımlar, onlara fiziki divan tutmaq və s. Amma bunların heç biri avtoritar rejimlərə kömək ola bilməyib”.
Bəyim Həsənli