Elşad Abdullayevdən yeni sensasiyalar
Fəaliyyəti dayandırılmış Azərbaycan Beynəlxalq Universitetinin rektoru, hazırda Fransada mühacirətdə olan Elşad Abdullayev “Azadlıq”a məktub ünvanlayıb. Həmin məktubda sensasion faktlar əks olunub. Məktubu ixtisarla oxucuların diqqətinə çatdırırıq:
Mahir Abdullayevi sonuncu dəfə harada görüblər?
“Prezidentin razılığı ilə Baş Prokurorluq yanında yaradılan Müstəqil Istintaq Komissiyasının faəliyyətindən 7 ay keçir. Komissiyanın başlıca məqsədi 9 ildən artıqdır ki, oğurlanmış MTN zabiti Mahir Abdullayevin işini araşdırmaq və zərərçəkənin təhlükəsizliyini təmin etməkdir. Amma komissiya MIK-da azərbaycanda adam oğurluğu ilə məşğul olan mütəşəkkil cinayətkar dəstə ilə əlbir fəaliyyət göstərərək Mahir Abdullayevin oğurlanması ilə bağlı cinayət işini qərəzli aparır.
Məsələn, 75 yaşlı ağsaqqal, şahid Məmmədəli Əliyevin mənə təqdim etdiyi məlumat, gizlin çəkilmiş video-faktlar və MTN generalı Hilal Əsədovun, müğənni Mətanət Isgəndərlinin, prodüsseri Ələddinin ona hədə-qorxu gəlməsi barədə ərizəsi cinayət işinin materiallarından çıxarılıb.
Məmmədəli kişinin “günahı” odur ki, o, hadisə barədə olduğu ifadə verib. Bunun üstündə ağsaqqal yaşında başı bəlalar çəkib.
Məmmdəli Əliyev mənə səmimi olaraq bildirmişdi ki, 13 oktyabr 2003-cü il tarixdə səhər saat 10 radələrində Mahirin müğənni Mətanət Isgəndərlinin Bakı şəhəri, Yasamal rayonu, Nizami küçəsi 4-də yerləşən 8 saylı mənzilinə girən görüb. Onun sözlərinə görə, həmin gün Mahirlə danışıblarmış ki, Mətanət Isgəndərlinin evinin yaxınlığında, Nərimanov heykəlinin arxasında banka ev pulu köçürsünlər: “Lakin, Mahir mənimlə görüşmədən yanımdan keçərək tələsik müğənni Mətanət Isgəndərlinin evinə girdi. Mahir icəri girəndən 5-10 dəqiqə sonra MTN-in müavini Hilal Əsədovun qohumu Sənan Ibrahimov müğənni Mətanət Isgəndərlinin evindən tələsik, həyəcanlı şəkildə cıxaraq özünün təzə ag rəngli ”Nissan” maşınına minərək hadisə yerindən uzaqlaşdı, şəkili Eldar isə əks tərəfə qaçdı. Mən də Mahiri 10-15 dəqiqə gözlədikdən sonra işim olduğu üçün hadisə yerindən uzaqlaşdım”.
Şahid ölümlə hədələnib
Məmmədəli kişi bu barədə prezident seçkilərindən sonra, 16 oktyabr 2003-cü il tarixində Mahiri gördüyü haqqında mənə məlumat verib. Həmin gün, mən saat 18:00-da müğənni Mətanət Isgəndərlinin evində oldum. Görüş zamanı Mətanət Isgəndərli çox həycanlı idi və tez-tez ağlayırdı, mənə yalan danışaraq bildirdi ki, 6 aydan çoxdur ki, Mahiri görmürəm. Mahirin yerini Bayıl Xanım, yaxud da Tovuzlu Səadət yaxşı bilirlər. Halbuki, Mahir ilə Mətanət Isgəndərlinin telefon danışıqları təsdiq edir ki, Mahir müğənni Mətanət Isgəndərlinin evindən oğurlanana qədər hər gün ona 20-25 dəfə zəng vuraraq, danışıb . O, qorxudulmuş adam kimi özünü aparırdı. Bizi qonaq otağında qəbul etdi. Diqqəti cəlb edən o idi ki, otaqda bütün stol-stul sındırılmışdı. Mənzildə əlbəyaxa savaş izləri açıq-aşkar görünürdü.
Amma bu gün Müstəqil Istintaq Komissiyasının fəaliyyəti nəticəsində Məmmədəli Əliyevi ölümlə hədələyərək mənim əleyhimə ifadə alıblar.
Xınalıqda “2-ci ”Qarabulaq”
28 oktyarbr 2009-cu ildə isə Məmmədəli Əliyevlə söhbətim olub. Bu söhbətin video yazısı var. Məmmədəli Əliyev həmin söhbətdə deyirdi:
“Elşad müəllim, Əli Nağıyev (o zaman milli təhlükəsizlik nazirinin müavini olub, hazırda Korrupsiyaya Qarşı Mübarizə Idarəsinin rəis müavini vəzifəsində işləyir) deyir ki, Hilal Əsədovu Ramiz Mehdiyev bir günə salıb ki… Bu gün Ramiz Mehdiyev Hilal Əsədovu qəbul edib, yaman günə qoyub. Ramiz Mehdiyev Hilal Əsədova bildirib ki, Elşad Abdullayev mənə ərizə göndərib. Bu nə deməkdir, sən adam oğurluğu ilə məşğulsan! Sən bu respublikanın təhlükəsizlik generalısan, amma adam oğurlayıb satırsan, bundan ötrü Qubanın Xınalıq kəndində dağa yaxın təzə çəkilmiş yolun üstündə restoran saxlayırsan, sənin bu ölkədə yaşamağa haqqın yoxdur. Bu nə deməkdir Hilal Əsədov?!
Raniz Mehdiyev Qubada Xınalıq kəndinin dağa yaxın yerdə Hilal Əsədova məxsus həmin restoranı yoxlatdırıb. Orada 3 çılpaq qız və 3 oğlanı birlikdə tutublar. Sən demə, bu müğənni qızların əli ilə Bakıdan pullu adamları aparıb videosunu çəkib hədə-qorxu gələrək küllü miqdarda pul tələb edirlərmiş. Əsil “Qarabulaq” Hilal Əsədovun Qubanın Xınalıq kəndindəki restoranıdır. Hilal Əsədovun restoranının həyətində 3 ədəd böyük fontan qurdurub, restoranı ediblər əxlaqsızlıq yuvası”.
Mən orada Məmmədəli Əliyevə sual vermişəm ki, deyilənə görə, Xınalıqdakı həmin restoran Hilal Əsədova yox, Əli Nağıyevə məxsusdur. O isə cavabında deyib: “Yox elə deyil. Əli Nağıyevin restoranının adı ”Nazlı”dır. Oranı naxçıvanlı Məhəmməd işlədir. Hilal Əsədovunku Xınalıqda, dağa yaxın yerdədir.
MTN generalı həmkarını ittiham edib
Ramiz Mehdiyev Hilal Əsədova deyib ki, sənin adamların müğənni Mətanət Isgəndərli və Sənan Ibrahimov bildiriblər ki, biz Hilal Əsədovun tapşırığı ilə Mahirin oğurlanması işində iştirak etmişik.
Hilal Əsədov Ramiz Mehdiyevə deyib ki, bunları Əli Nağıyev öyrədib. Ramiz Mehdiyev isə əsəbləşərək bildirib ki, sən nə danışırsan, Elşad Abdullayev mənə yazılı ərizə göndərib, hər şeyi də konkret adı ilə açıq yazıb, bütün ərizələrində sənin adını çəkib. Sən nə danışırsan?! Əli Nağıyev qapı-qapı gəzərək caamatın yaxasından yapışır ki, gəlin, Hilal Əsədovun əleyhinə yazın?! Bu nə deməkdir?!
Ramiz Mehdiyev nazir Eldar Mahmudovu, Əli Nağıyevi və Hilal Əsədovu qəbul edəcək. Əli Nağıyev deyir ki, Hilal Əsədov Ramiz Mehdiyevin yanından ölü çıxdı, bir neçə gündür əlini başına tutub dilxor-dilxor fikirləşir”.
Elşad Abdullayev daha sonra yazır ki, sonradan MTN-nin generalı Akif Çovdarov Məmmədəli Əliyevə hədə qorxu gəlib. Ondan Mətanət Isgəndərlinin əleyhinə verdiyi ifadəni geri götürməyi tələb edib. Məmmədəli Əliyev də ifadəni geri götürməyə məcbur olub. Məmmədəli Əliyev isə bundan sonra da təhlükəsizliyini təmin edilməsi üçün Ilham Əliyevə və Eldar Mahmudova ərizə yazıb. Elşad Abdullayev Məmmədəli Əliyevin ərizələrini də məktuba əlavə edib. Məmmədəli Əliyev həmin ərizələrdə yazır ki, onu təhdid edirlər. O, bu məsələdə Mətanət Isgəndərlikdən, onun prodüsserindən şübhələnir.