“Eurovision” xalqın qələbəsidirsə, bəs ITV niyə xalqın deyil?

“Eurovision”da Azərbaycandan gedənlərin qələbəsinə hələ də isterik, eyforik, vətənşivənlik janrında reaksiyalar davam edir. Və bu isterika, bu eyforiya, bu vətənşivənlik əsl dartışılması gərəkən mövzuları unutdurub.

Məsələn, heç kim çıxıb demir: balam, “Eurovision”un təşkilatçısı kimdir? Avropa Yayım Birliyi deyilmi? Avropa Yayım Birliyində ölkələrində ictimai yayımı həyata keçirən, həyata keçirməli olan telekanallar, o cümlədən, bizim ITV birləşməyibmi? Bizim ITV də ictimai yayımdan çox, hakimiyyətin yalanlarının yayımçısı deyilmi? Ictimaiyyətdən çox, irticanın yayımçısı deyilmi? Elə isə Azərbaycanın “Eurovision”da qələbəsi necə legitim sayıla bilər? Yalançı “ITV” ilə qazanılan qələbə necə həqiqi ola bilər?

Ümumiyyətlə, “Eurovision”un qeyri-ciddiliyini elə təkcə bundan görmək olar – onu Avropa Yayım Birliyinin təşkil etməsindən. Azərbaycanı bir kənara qoyaq, təsəvvür edin ki, hətta Belarusun “Ictimai Televiziyası” da onun üzvüdür. Bundan biabırçı mənzərə təsəvvür etmək çətindir. Müxalifətin yerli-dibli ləğv edildiyi, alternativ fikrin kökündən qazılıb atıldığı bir ölkədə “Ictimai Telekanal”ın olması mümkündürmü? Yalnız Lukaşenkonu göstərən bir telekanal necə “Ictimai telekanal”dır? Amma kimə deyirsən, Belarusda o var, guya mövcuddur, üstəlik, onu Avropa Yayım Birliyi utanmaz-utanmaz öz sıralarına qəbul edib. Indi özünüz fikirləşin ki, bu, nə qədər mənasız, düşük birlikdir.

Amma Azərbaycanda istəyirlər ki, belə bir mənasız, düşük birliyin təşkil etdiyi müsabiqəni biz göyün yeddinci qatına qaldıraq, orada qalib gəldiyimizə görə özümüzü dünyanın xoşbəxti hesab edək. Hoppanın gedin işinizlə məşğul olun. Mənə “Eurovision”dakı qələbədən əvvəl həqiqi, gerçək bir Ictimai Televiziya lazımdır. O yoxdursa, olmayan bir şeyin təşkilatçılığı ilə hansısa şou çempionluğunun mənə nə dəxli var, mənə xeyri nədir? Belə çıxır ki, sabah Ismayıl Ömərovun özü də öz yalançı “ITV”-sinin xətti ilə gedib Nobel mükafatı alsa, mən sevincimdən burada dombalaq aşmalı, özümü dünyanın xoşbəxti hesab etməliyəm? Niyə? Xeyir ola?

Bu gün yalançı “ITV”-nin xətti ilə qazanılan qələbədən başı dumanlanan, bundan toy-bayram düzəldənlər indiyədək bircə dəfə papaqlarını qarşılarına qoyub fikirləşsəydilər ki, bu “ITV” niyə bizim deyil, niyə ictimaiyyətin deyil, niyə xalqın dərdlərindən çox, rejimin yalanlarını göstərir, yəqin indi biz daha böyük, daha vacib qələbələri qeyd edirdik. Amma kimə deyirsən, 7-dən 77-yə hər kəs xalqın olmayan bir telekanalın vasitəsilə qazanılan birinciliyin “bütün xalqın qələbəsi” olmasından dəm vurur. Telekanal özü xalqın deyil, amma onun vasitəsi ilə qazanılan qələbə xalqındır? Belə məntiq ola bilərmi? Uşaq başı aldadırsınız burada? Bizə “Eurovision”dakı qələbəni yox, ITV-nin özünü verin!

Və sonda: “Eurovision” qaliblərinin Bakıdakı mətbuat konfransında onlardan “müxalifət liderləri ilə də görüşərsinizmi?” deyə soruşub jurnalistlər, əvəzində də “əlbəttə, görüşərik” cavabı alıblar. Indi bu cavabdan bizim müxalifət düşərgəsində dəhşət sevincək olublar, sanarsan ki, müxalifətə mitinq keçirmək üçün Bakının mərkəzində yer verilib.

Əvvəla, “Eurovision” qaliblərindən soruşulması gərəkən ən vacib sual bu olmalı idi: “Sizi ”Eurovision”a seçən, hazırlayan, aparan telekanalın adının “Ictimai” olması nədir, ora müxalifət liderlərinin buraxılmaması nə?”.

Ikincisi də, bu gün onlar müxalifət liderləri ilə də görüşə biləcəklərini deyirlər və siz də dəhşətli dərəcədə məmnun qalırsınız, amma mən sizin bu məmnun sifətinizi bir də onları təntənə ilə YAP-a üzv eləyəndə görmək istəyərdim…