«İran prezidentinin Ermənistana dəmir yolu çəklişi təşəbbüsü cavabsız qalmamalıdır»
Aprelin 8-də Azərbaycanın xarici işlər nazirinin müavini Xələf Xələfov Tehranda İranın rabitə və informasiya texnologiyaları naziri Mahmud Vaizi ilə görüşüb, ikitərəfli əlaqələrin inkişafına dair müzakirələr aparıb. Bu barədə İRNA agentliyi xəbər verir. Görüşdə Azərbaycanın XİN rəhbərinin müavini Xələf Xələfov Tehranda İranın rabitə və informasiya texnologiyaları naziri Mahmud Vaizini Azərbaycan və İran dövlətlərarası müştərək iqtisadi komissiyanın yeni sədri seçilməsi münasibətilə təbrik edib. X.Xələfov deyib ki, iki ölkə arasında əlaqələrin inkişafı üçün lazımi potensial var. X.Xələfov vurğulayıb ki, İ.Əliyevin Tehrana səfəri ilə iki dövlət arasındakı əlaqələrdə yeni səhifə açılacaq.
Görüşdə M.Vaizi bildirib ki, İran öz qonşuları, xüsusi ilə Azərbaycanla əlaqələrin inkişafına böyük önəm verir. Azərbaycanla İran arasında münasibətlər demək olar ki, hər zaman gərgin olaraq qalıb. Xüsusilə İranın Ermənistanla iki tərəfli əlaqələri Tehranla Bakı arasında gərginlik mənbəyi olaraq qalmaqdadır. Bu münasibətlərdə daha bir maraqlı mərhələ hazırda yaşanır. İran rəhbərlərinin Azərbaycana səfərlərindən bir neçə dəfə imtina etməsindən sonra 2013-cü il prezident seçkiləri ərəfəsində hakimiyyət təmsilçilərindən Ramiz Mehdiyev, Əli Həsənov, Allahşükür Paşazadənin Tehrana səfərləri reallaşdı. Bəlli məqsədlə gerçəkləşən səfərlərin sonuncusu Kəmaləddin Heydərov tərəfindən reallaşdırılıb. Bundan başqa İ.Əliyevin də İrana səfəri planlaşdırılır. Amma bu səfəri önəmli edən İran prezidentinin bu yaxınlarda səsləndirdiyi layihədir. Söhbət İran Culfasından başlayan və Azərbaycan ərazisini keçməklə Ermənistana çəkiləcək dəmir yolu xəttindən gedir. Həmin dəmir yolu xəttinin bitəcək nöqtəsi isə Avropadır. O zaman İran dövlətinin başçısının bu təşəbbüsü Azərbaycan təmsilçiləri tərəfindən etiraz qarşılanaraq rəsmi səfərlər zamanı müzakirə predmeti edilməlidir.
X.Xələfovun səfəri zamanı bu məsələnin müzakirə edilib-edilmədiyini dəqiqləşdirmək üçün XİN-lə əlaqə saxlasaq da, sualımıza cavab ala bilmədik.
Politoloq Hikmət Hacızadə isə hesab edir ki, İranın bu tip təşəbbüsləri cavabsız qoyulmamalıdır. Azərbaycanın beynəlxalq arenada İranın bu tip addımlarına qarşı cavab tədbirləri görməli olduğunu düşünən H.Hacızadə vurğuladı ki, ölkəmiz Ermənistanın işğal faktorunu qabardaraq İranın işğalçı siyasəti dəstəklədiyi məqamını qabartmalıdır: «Azərbaycan əlində olan təzyiq rıçaqlarından istifadə edərək İran dövlətinə, ictimaiyyətinə təzyiq etməlidir ki, bu cür proyektlər gerçəkləşməsin. Bu tip addımların ikitərəfli münasibətlərə ciddi ziyan vura biləcəyi qabardılmalıdır. Azərbaycan rəsmiləri, dövlət başçısı bu məsələni İran tərəfi ilə görüşü zamanı müzakirə predmeti etməlidir».
Xəyal
