Özbəkistan prezidenti İslam Kərimov Çexiyaya rəsmi səfərini təxirə salıb. Səfər fevralın 20-22-də olmalıydı. Bu barədə Çexiyanın Xarici Işlər Nazirliyi məlumat yayıb.
30-dan çox hüquq müdafiəçisi bundan əvvəl Özbəkistanda insan haqlarının pozulmasına görə səfərə etiraz olaraq Çexiya Prezidenti Milosh Zemana açıq məktub göndərmiş, Zeman isə onları ikiüzlülükdə günahlandırmışdı.
Çexiya prezidentinin xarici siyasət məsələləri üzrə müşaviri Hynek Kmonicek Azadlıq Radiosuna müsahibəsində səfərin təxirə salınmasının bahar bayramlarına görə proqramın dəyişməsi ilə bağlı olduğunu, amma münasib vaxt tapılacağını deyib.
Islam Karimov 25 ildir ki, hakimiyyətdədir. O 2005-ci ildə Əndicanda etirazlar yatırılarkən 200-dək nümayişçinin öldürülməsindən sonra Avropaya cəmi 2 dəfə səfər edib. Avropa Birliyi ölkələri buna görə, Özbəkistan hakimiyyətinə qarşı sanksiyalar tətbiq edib.
