Bakının Xətai rayonunda “Radioquraşdırma” zavodunun yaxınlığında, Ramiz Quliyev küçəsi 6 ünvanında yerləşən “LUKoil” yanacaqdoldurma məntəqəsində partlayış baş verib.Partlayış nəticəsində 2 nəfər ölüb, 1 maşın yanıb.
Dövlət Yanğından Mühafizə Xidmətinin məlumatına görə, hadisə yeraltı çəndə qaz sızması nəticəsində baş verib. Bakı şəhər Təcili və Təxirəsalınmaz Tibbi Yardım Stansiyasından “Trend”ə bildiriblər ki, hadisə saat 16:20-da baş verib. Hadisə yerinə təcili tibbi yardım briqadası cəlb olunub.
Məlumatlara görə, partlayış təmir (qaynaq) işləri aparılarkən baş verib. Təmir işləri aparan ustalardan biri – Şamxal Orucov hadisə yerində, digəri – Həsrət İmamverdiyev isə çatdırıldığı Neyrocərrahiyyə Xəstəxanasında dünyasını dəyişib. Başqa bir məlumata görə, ölənlər yanacaqdoldurma məntəqəsinin yaxınlığında su borusu çəkən fəhlələr olub.
Partlayış zamanı yanan isə “Mitsubishi” markalı 10 PK 441 dövlət nömrə nişanlı avtomobildir.
Neyrocərrahiyyə xəstəxanasının baş həkimi Kabus Dadaşovdun “musavat.com”un əməkdaşına verdiyi məlumata görə, bir nəfər yüngül xəsarət almış yaralı Həşim Turabov artıq evə buraxılıb.
YDM-nin işçilərindən biri deyib ki, obyekt bir aydır işləmir. Yəni, partlayış benzindən baş verməyib.
