Bir gündə ardıcıl dörd partlayış baş verdi; dörd nəfər dünyasını dəyişdi
Fevralın 13-də Azərbaycanda dörd partlayış baş verib. Bunlardan ikisi paytaxtda, daha ikisi isə bölgələrdə qeydə alınıb. Partlayışlardan ikisi ölümlə nəticələnib.
İlk partlayış səhər saatlarında paytaxtda metronun “Azadlıq prospekti” stansiyasının yaxınlığındakı parkda baş verdi. Daha sonra partlayış xəbərləri Xətai rayonunda yerləşən “LUKoil” yanacaqdoldurma məntəqəsindən, Biləsuvar rayonundan və Şəki şəhərindən gəldi.
Partlayış baş verən obyekt icra başçısınındır?
“Azadlıq prospekti” metrostansiyası yaxınlığındakı partlayış yarımçıq tikilidə baş verib. Tikili uçub, bundan başqa partlayışın gücündən yaxınlıqdakı binaların, iaşə obyektlərinin və “Şahənşah” şadlıq sarayının pəncərələri sınıb. Partlayış anında yaxınlıqdakı dayanacaqda dayanmış 13 nömrəli avtobusa da ziyan dəyib.
Məlumatlara görə, hadisə nəticəsində 4-ü qadın və 1-i kişi olmaqla, ümumilikdə 5 nəfər yaralanıb. Onlar xəstəxanaya çatdırılıb.
İlkin versiyaya görə, partlayışa tikilinin zirzəmisində qaz sızması səbəb olub. Hadisə yerinə dərhal yanğınsöndürən maşınlar və təcili yardım briqadaları cəlb olunub.
Partlayış zamanı əzilən 13 saylı marşrut avtobusunun Mübariz adlı sürücüsü hadisəni “Azadlıq” radiosuna belə təsvir edib: “Avtobusu dayanacaqda saxlamışdım. Birdən baş verən partlayışdan avtobusların şüşələri qırıldı. Bir qadın sərnişinin qolu sındı, təcili yardım apardı”.
Avtobusun üstünə isə mişar daşı düşüb.
Partlayışdan ziyan görmüş binanın sakini Rahib Qasımov jurnalistlərə deyib ki, sakinlər yarımçıq tikilidə qaz sızmasından narahatlıqlarını bir neçə dəfə ərazidəki fəhlələrə bildiriblər. Onlar binada xüsusi aparatla yoxlama aparıldığının da şahidi olublar.
“İşdə idim, uşaq zəng etdi ki, partlayış olub. Mənzilimin pəncərələri qırılıb”, – deyə sakinlərdən Naza Həsənova bildirib.
Partlayışın təsiri əsasən Süleyman Sani Axundov küçəsindəki 1b və 3b binalarında hiss olunub. Binaların bizimlə söhbət edən sakinləri də pəncərələrinin şüşələrinin sındığını bildiriblər: “Səs-küydən hamı bayıra qaçdı. Əvvəlcə elə bildik metroda partlayış olub. Sonra dedilər ki, parkın üstündəki tikilidir. Dəhşətli bir hadisə idi. Yenə yaxşı ki, uşaqlar məktəbdə olan vaxt partlayış baş verib. Evdə olsaydılar, çox pis olardılar”.
Ərazidə yaşayanlar qorxu içində olduqlarını, problem həll edilməsə, yenə də bu cür olayın baş verəcəyini deyirlər: “Panika içindəyik. İndiyə qədər belə halla qarşılaşmamışdıq. Ciddi tədbir görülməlidir. Dəfələrlə aidiyyəti qurumlara məlumat vermişdik ki, bədbəxt hadisə baş verəcək. Diqqət yetirmədilər”.
“Axar.az”ın məlumatına görə, partlayış baş verən yarımçıq tikili Binəqədi rayonun keçmiş icra başçısı Alı Qocayevə məxsusdur. Saytın yazdığına görə, obyektin hansı məqsədlə ucaldıldığı bəlli deyil: “Bir müddət əvvəl Bakı Şəhər İcra Hakimiyyətinin başçısı Hacıbala Abutalıbovun qərarı ilə obyektin tikintisinin tamamlanması dayandırılıb”.
Onu da qeyd edək ki, Alı Qocayev hazırda Samux rayon icra hakimiyyətinin başçısıdır.
“LUKoil”də partlayış
Bakıda ikinci partlayış xəbəri Xətai rayonu, Ramiz Quliyev küçəsi 6 ünvanında yerləşən “LUKoil” yanacaqdoldurma məntəqəsindən gəldi.
Yanacaqdoldurma məntəqəsində təmir işləri aparılan zaman partlayışda iki nəfər dünyasını dəyişib, bir nəfər isə yaralanıb. Ölənlərin ikisinin də fəhlə olduğu bildirilir. Onlar yanacaqdoldurma məntəqəsinin yaxınlığında su borusu çəkirlərmiş.
Partlayış zamanı “Mitsubishi” markalı 10 PK 441 dövlət nömrə nişanlı avtomobil yanaraq, yararsız hala düşüb.
“KamAZ”ın partlaması iki nəfərin həyatına son qoydu
Biləsuvarda da güclü partlayış hadisəsi baş verib. APA-nın məlumatına görə, hadisə saat 16 radələrində şəhərin Heydər Əliyev prospektindəki köhnə “Kimya Birliyi” kimi tanınan idarənin həyətində baş verib. Naxçıvan Muxtar Respublikasının Kəngərli rayon sakini Cəfərli Şaiq Həsən oğluna məxsus yanacaq daşıyan qoşqulu “KamAZ” markalı avtomobildə qaynaq işləri aparılması çənin partlamasına səbəb olub. Partlayış nəticəsində iki nəfər – sürücü Şaiq Cəfərli və qaynaqçı, Biləsuvar rayon sakini Poladov Əjdər Ziyad oğlu hadisə yerindəcə dünyasını dəyişiblər. Bir nəfər Biləsuvar rayon sakini, 1970-ci il təvəllüdlü Təzəxan Poladov isə yaralı halda Biləsuvar Mərkəzi Rayon Xəstəxanasına yerləşdirilib. Onun vəziyyətinin qənaətbəxş olduğu bildirilir.
Şadlıq sarayında partlayış
Daha bir partlayış Şəkidə qeydə alınıb. APA-nın məlumatına görə, işıq tranformatoru partlayıb. Saat 15 radələrində Şəki şəhəri Sabit Rəhman küçəsində Alxasov Elşada məxsus şadlıq evinin transformatorunda qısaqapanmadan yanğın baş verib. Hadisə yerinə Fövqəladə Hallar Hazirliyinin Şəki rayon Dövlət Yanğından Mühafizə Xidmətinin texnikası və canlı qüvvəsi cəlb edilib. Qısa müddət ərzində transformatorda baş verən yanğın məhdudlaşdırılıb. Yanğın nəticəsində transformatorun şitləri yanaraq yararsız hala düşüb. Yanğın zamanı xəsarət alan olmayıb.
Azərbaycanda terror aktları başladı?
Partlayışların ardıcıl baş verməsi və ölümlə müşayiət olunması Azərbaycanda terror aktı ehtimalının irəli sürülməsinə səbəb olub.
Daxili İşlər Nazirliyinin Mətbuat Xidmətinin rəis müavini Ehsan Zahidov Azərbaycanda bir gündə 4 nəfərin ölümü, 6 nəfərin xəsarət alması ilə nəticələnən 4 güclü partlayışın terror olması ehtimalı haqda “axar.az”ın sualına belə cavab verib: “Baş verən partlayışlarla bağlı araşdırmanı biz aparmırıq”.
O bildirib ki, partlayışlarla bağlı araşdırma aparmaq səlahiyyəti hələlik Fövqəladə Hallar Nazirliyindədir: “Bizdə bununla bağlı təbii ki, məlumat var. Amma hələlik bu işlərlə bağlı əsas söz Fövqəladə Hallar Nazirliyindədir. Onlar araşdırma aparıb nəticəni bildirəcəklər. Yalnız bundan sonra həmin partlayışların hansı səbəbdən baş verdiyi aydınlaşacaq”.
Bununla bağlı Fövqəladə Hallar Nazirliyilə əlaqə saxlamaq cəhdləri baş tutmayıb.
MTN-nin ictimaiyyətlə əlaqələr şöbəsindən isə “axar.az”ın sualına belə cavab verilib: “Bu barədə yalnız sabah açıqlama verə bilərik”.
Xatırladaq ki, yanvarın 28-də “Meşə qardaşları” və “Ceyşullah” terror təşkilatları Azərbaycanda terakt törədəcəkləri ilə bağlı məlumat yaymışdılar.
Ramin DEKO
