Türkiyəli diplomat jurnalistin deportasiya olunmasına münasibət bildirdi
“Türk hakimlər polisə ”əl-Qaidə” ilə bağlantısı olan şəxsləri həbs etmə qərarı verdi, Ərdoğanın təyin etdiyi polis rəisləri isə buna əməl etmədi, Ərdoğanın təyin etdiyi şəxslər əməliyyatların qarşısını aldığından, “əl-Qaidə”nin Türkiyədəki adamları qaçdı”. Bu sözləri “Todays Zaman”ın Türkiyədən deportasiya edilən azərbaycanlı müxbiri Mahir Zeynalov öz “tvitter” səhifəsində yazıb. Jurnalist isə bəyan edir ki, bunlar çalışdığı qəzetdə dərc olunmuş məqalədə əksini tapan fikirlərdir və bu fikirləri heç bir şərh vermədən “tvitter” hesabında yayıb.
Türkiyə baş nazirinin müavini Bülent Arınç Zeynalovun ölkədən deportasiya edilməsinə münasibət bildirərkən “O, dəyərli dostumuzdan soruşmaq istəyirəm. ”Tvitter”dən Türkiyənin baş naziri haqda səsləndirdiyi fikirləri öz ölkəsində, ölkəsinin baş naziri və prezidenti üçün deyə bilərmi? Və ya Türkiyədə işləməyə davam etdiyi təqdirdə Azərbaycan prezidenti və baş naziri ilə bağlı hansısa bir məsələ olsaydı, bir mesaj yaza biləcəkdimi? Türkiyə ilə öz ölkəsinin müqayisəsi mümkündürsə, jurnalist dostumuza bunun üçün bir cəhd etməsini məsləhət görürəm. Söhbət, kiminsə atdığı hansısa tvitdən getmir. Amma orada yazılanlar Türkiyə Cinayət Məcəlləsinə görə cinayət sayılırsa, insan haqlarına, insanın şəxsi həyatına müdaxilə olunursa, Zeynal, Əhməd, Mehmed – kim olursa-olsun, fərqi yoxdur” – deyə bildirib.
Türkiyənin “Yeni Akit” qəzetinin müxbiri Ali Karahasanoğlu isə baş verənlərə belə münasibət bildirib: “Öz ölkənin 78-dən bəri iqtidarda olan rəhbərliyindən soruş – 18 ildir başımızdasan, nə özəlliyin var, daha neçə il təpəmizdə qalacaqsan? Mühakimə edici bir kəlmə yaz. Mən də sənə ”halal olsun” deyim. Görək, bu sualdan sonra cəsədin tapılacaqmı? Öz ölkəsində iqtidara bir kəlmə deyə bilmir, gəlib Türkiyədə köpəksiz kənd görüb”.
Verilən məlumata görə Mahir Zeynalov “Nurçu”du və onun hədəf alınması da bununla bağlıdır. Son günlər Türkiyədə baş verənlərin fonunda bu mülahizəni də ciddi qiymətləndirmək olar.
Istənilən halda azərbaycanlı jurnalistin yazdığı “tvit” aqressiv qarşılandı və böyük səs-küyə səbəb oldu.
Uzun müddət Azərbaycanda fəaliyyət göstərmiş türk diplomatı Turqut Ər jurnalistin deportasiya olunmasını hüquqi əsaslarla əlaqələndirdi: “Hər hansı bir şəxsi yazdığı tənqidi fikirlərə görə Türkiyədən deportasiya edə bilməzlər. Bunun üçün əsas, arqument olmalıdır. Yəqin ki, həmin şəxsin sənədlərində müəyyən problemlər olub, ölkədə qalma müddəti bitib və s. Bu adam vaxtında öz sənədlərini qaydaya salmalı idi. Əcnəbi jurnalistlər üçün xüsusi mətbuat vəsiqəsi olur və bu vəsiqə vaxtında Mətbuat Müdürlüyünə verilməlidir. Yəni onun deportasiya olunma səbəbi kimi, burda işləmək şərtlərini yerinə yetirməməyi olub. Əgər tutarlı səbəb olmasa, Türk qanunlarına görə onu ölkədən çıxarmaq olmaz. Hesab edirəm ki, bu məsələni böyük problemə çevirmək, qalmaqal yaratmağa ehtiyac yoxdur. Qanunsuzluğun ən böyüyü mənə qarşı olub. Mən Azərbaycanda diplomatik vəzifə daşıyırdım. Ancaq, məni siyasi səbəblərlə ölkədən uzaqlaşdırdılar və bunun səbəbi kimi mənim müxalifətlə əlaqələrimi göstərdilər. O, zaman nə Türkiyə, nə də Azərbaycan tərəfindən heç bir reaksiya olmadı. Indiki halda əgər Türkiyə qanunlarına zidd bir addım atılıbsa, mən bunu araşdıraram və qənaətimi söyləyərəm”.
Akif
