Bakı Ağır Cinayətlər Məhkəməsinin keçmiş hakimi barədə «Azadlıq» ilginc faktlar yaymışdı
Ölkə başçısı Ilham Əliyev Bakı Ağır Cinayətlər Məhkəməsinin hakimi Həsən Əkbər oğlu Əliyevin səlahiyyətlərinə vaxtından əvvəl xitam verilməsi haqqında sərəncam imzalayıb.
Buna səbəb kimi Həsən Əliyevin qanunvericiliyin tələblərini dəfələrlə kobudcasına pozması göstərilib.
Həsən Əliyevin əməlləri barədə hələ bir müddət əvvəl Ağdam rayon sakini hazırda həbsdə olan Elman Məmmədovun şikayəti dərc edilmişdi. Elman Məmmədov yazırdı ki, həbs olunmasının baiskarı Həsən Əliyevdir. Onun sözlərinə görə,
uzun müddət Rusiyada işləmiş Səlimov Ramazan Babaəli oğlu adlı Azərbaycana qayıdandan sonra vəzifəyə təyin olunmaq istəyib. Və 2011-ci ildən tanıdığı Elman Məmmədova müraciət edib. Elman Məmmədov isə onu Həsən Əliyevlə tanış edir.
Həsən Əliyev Ramazan Səlimovu vəzifəyə təyin etdirəcəyini bildirir. Bunun üçün Ramazan Səlimov ona 600 min manat pul verir. Bu notarial qaydada təsdiqlənib. Daha doğrusu Həsən Əliyevin Ramazan Səlimova 600 min manat borcu olması barədə notarial qaydada sənəd imzalanır.
Lakin təbii ki, Həsən Əliyev verdiyi vədi yerinə yetirə bilmir. Yəni, Ramazan Səlimovu işə düzəldə bilmir. 600 min manatı isə qaytarmaq istəmir. Əvvəlcə Ramazan Səlimovu həbs etdirməyə çalışan Həsən Əliyev istəyinə nail ola bilmir. Çünki Ramazan Səlimov əlində olan sənədləri hüquq-mühafizə orqanlarına təqdim edir.
Bundan sonra Həsən Əliyev Elman Məmmədovdan yardım istəyir. Ramazan Səlimova 250 min manat qaytarılır. Lakin Elman Məmmədov yardımının qarşılığında həbs olunur. Yəni, Həsən Əliyev işi elə düzüb-qoşur ki, Elman Məmmədov isə bu məsələdə təqsirləndirilən şəxs qismində cəlb olunaraq və ona Azərbaycan Respublikası CM-nin 178.3.2-ci maddəsi ilə ittiham edilərək, barəsində 3 aylıq həbs qətimkan seçilir. Həbs olunmamışdan bir az əvvəl isə Elman Məmmədov qanunsuz olaraq Milli Təhlükəsizlik Nazirliyinə aparılır, qurumun binasının 4-cü mərtəbəsində qəddarlıqla döyülür.
Elman Məmmədovun bu şikayəti “Azadlıq”da dərc olunandan sonra redaksiyamıza məlumat daxil oldu ki, Məhkəmə-Hüquq Şurası Həsən Əliyevin fəaliyyətinə xitam verilməsi barədə qərar çıxarıb. Görünür, bu məlumat əsassız deyilmiş.
Dünən redaksiyamıza daxil olan məlumatda isə deyilir ki, Həsən Əliyevin həbsi məsələsi gündəmə gəlib. Onun yaxın vaxtlarda məsuliyyətə cəlb olunacağı iddia edilir.
