Yatsek Protaseviç: «Sanksiyaların ünvanlanacağı şəxslərin siyahısını Avropa Birliyi hazırlayacaq»
Avropa Parlamenti fevralın sonlarında Ukrayna hökumətinin ayrı-ayrı məmurlarına sanksiya tətbiq edə bilər. Bu barədə Avropa Parlamentinin vitse-prezidenti Yatsek Protaseviç məlumat verib. Onun sözlərinə görə, qətnamənin qəbulundan sonra daha bir neçə həftə gözləmək lazım gələcək. Bu, Avropa ölkələrinin xarici işlər nazirlərinin də müvafiq qərar verməsi üçün lazımdır: «Bu qərar yekdil olmalıdır. Qətnamənin qəbulundan sonra Avropa Birliyi və quruma üzv ölkələr sanksiyaların tətbiq olunacağı şəxslərin siyahısını hazırlayacaq. Sonra məsələ Avropa Birliyinin Xarici işlər nazirləri Şurasının iclasında müzakirə olunacaq. Yekun qərar isə fevralın sonunda veriləcək».
«Real iqtisadi islahatlar başlamasa, heç bir maliyyə yardımı ayrılmayacaq»
Yatsek Protaseviç onu da bildirib ki, Ukrayna real iqtisadi islahatlara başlamasa, bu ölkəyə heç bir maliyyə yardımı ayrılmayacaq: «Maliyyə yardımı ayrılmır ki, onu göyə sovursunlar. Ona görə ayrılır ki, iqtisadiyyata bir faydası olsun. Bu yardımı bir vaxtlar Polşada, Çexiyada olduğu kimi istifadə etmək lazımdır. Həmin vaxt ayrılmış yardım bu ölkələrdə nəzərəçarpacaq irəliləyişlər üçün təkan rolunu oynamışdı. Düzdür, ilk vaxtlar iqtisadi islahatlar olduqca zəif nəticə verirdi. Amma sonradan heyrətləndirməyə başladı».
Protaseviç Ukrayna müxalifətinin köhnə Konstitusiyaya qayıtmaq təklifinə də münasibət bildirib. O qeyd edib ki, əslində 2004-cü ilin Konstitituasiyası tam təkmil deyil. Amma hər şalda indikindən daha yaxışıdır: «Amma son qərarı yenə ukraynalılar verməlidir. Biz bu istiqamətdə sadəcə məsləhət verə bilərik. Bunu ən yaxşı Avropa Şurası edə bilər. Orada işi əsasən bundan ibarət olan Venesiya Komissiyası var».
Füle ilə görüşdə nə müzakirə olunub?
Ukrayna prezidenti Viktor Yanukoviç Avropa Birliyinin genişlənmə və Avropa qonşuluq siyasəti üzrə komissarı Ştefan Füle ilə görüşüb(APA). Ukrayna prezidentinin mətbuat xidmətindən verilən məlumata görə, görüşdə Ukraynada yaranmış böhrandan dialoq vasitəsi ilə çıxış yollarının axtarılması, zorakı və ekstremist hərəkətlərdən vaz keçməsi, habelə insan haqlarının qorunması məsələsi müzakirə olunub. V.Yanukoviç Avropa Birliyinin və Avropa Şurasının Ukraynada yaranmış vəziyyətdən çıxış yollarının axtarılması istiqamətində səylərini yüksək qiymətləndirib. Görüşdə həmçinin proseslərə obyektiv qiymət verilməsinin vacibliyi vurğulanıb.
Yanukoviç teledebatlara hazırdır, Kliçkonun isə şərti var
Ukrayna prezidenti Viktor Yanukoviç müxalif «UDAR» Partiyasının lideri Vitali Kliçko ilə teledebatlara çıxmağa hazırdır. Bunu Ukrayna prezidentinin mətbuat xidmətinin rəhbəri Andrey Lısenko deyib. O bildirib ki, debatlar ümumrespublika telekanallarından birində keçiriləcək. A.Lısenko onu da əlavə edib ki, Yanukoviç-Kliçko debatlarını müvafiq təkliflə çıxış edəcək istənilən dövlət yaxud da özəl telekanallar yayımlaya bilər.
Vitali Kliçko isə bildirib ki, ölkə prezidenti Yanukoviçlə teledebatlara yalnız onun istefaya gedəcəyi təqdirdə hazırdır: “Mən Yanukoviçlə teledebatlarda iştirak etməyə hazıram. Lakin o, əvvəlcə, cəsarətli bir addım atmalıdır. O ölkədəki kəskin siyasi və iqtisadi böhrana görə məsuliyyəti öz üzərinə götürməli və istefa verməlidir. Və prezident kampaniyası çərçivəsində mən hər an Yanukoviçlə debatlarda görüşməyə hazıram”.
Timoşenko prezidenti xəstəxanaya çağırdı
Ukraynanın keçmiş baş naziri Yuliya Timoşenko isə prezident Viktor Yanukoviçi teledebata çağırıb. Bu barədə Ukraynanın müxalif “Batkivşina” partiyasının mətbuat xidmətinin yaydığı xəbərdə bildirilir: “Mən Viktor Yanukoviçə müraciət edirəm. Əgər o, debatlar istəyirsə, mən hazıram”. Timoşenko qeyd edib ki, onun üçün debatların harada keçiriləcəyi önəmli deyil. Buna görə də Y.Timoşenko variantlardan biri kimi hazırda müalicə olunduğu xəstəxanadan videokonfrans təşkil etməyi təklif edib.
“Kommersant”: «Yanukoviç Timoşenko ilə koalisiya yarada bilər»
Ukrayna Prezident Administrasiyasının rəhbəri Andrey Klüyev “Batkivşina” partiyasının lideri Yuliya Timoşenko ilə danışıqlar aparıb. “Kommersant-Ukraina” nəşrinə istinadən verdiyi məlumata görə, danışıqlarda hakim Regionlar Partiyasının “Batkivşina” ilə parlamentdə koalisiyanın yaradılması məsələsi müzakirə olunub. Eyni zamanda danışıqlarda ölkədə yaranmış vəziyyətdən çıxış yolunun axtarılması, habelə Regionlar Partiyası ilə “Batkivşina”nın Ali Radada səylərinin birləşdirilməsinin müzakirə edildiyinə dair məlumat var”, – deyə “Kommersant-Ukraina”nın məqaləsində vurğulanıb. Görüşün ötən həftə Xarkovda baş tutduğu bildirilir. Qeyd edək ki, Y.Timoşenko 2012-ci ilin may ayından Xarkovda xəstəxanada müalicə alır. Lakin Timoşenko vəkili vasitəsilə bu xəbəri təkzib edib və Klüyevlə hər hansı görüş keçirmədiyini bildirib.
