Əliağa Hüseynov: «Rail Rzayevin düşməni ordumuzun möhkəmliyini istəməyənlər idi»
“Mərhum Rail Rzayevin ailəsi onun qatilinin hələ də tapılmamasından narahatlıq keçirir”. Bunu Publika.Az-a açıqlamasında Azərbaycanın sabiq hərbi komissarı, ehtiyyatda olan general-leytenant, Milli Məclisinin deputatı Əliağa Hüseynov bildirib.
Fevralın 11-də mərhumun məzarını ziyarət etdiyini diqqətə çatdıran Əliağa Hüseynov rəhmətlik Rail Rzayevlə dost olduğunu da söyləyib: “O vaxt mən keçmiş Əzizbəyov (indiki Xəzər rayonu) rayonunda hərbi komissar idim, Rail Rzayev isə hərbi hissə komandiri idi. Bizim dostluğumuz o vaxtdan başlayıb. Mən onu bacarıqlı və savadlı şəxs kimi tanımışam. Allah ona rəhmət etsin, onun düşmənlərinin tapılmasına kömək etsin. Ötən gün də mərhumun ildönümü idi, mən də gedib məzarını ziyarət etdim. Rəhmətlik Rail Rzayev həm də mənim qardaşım oğlunun qaynatasıdır”.
Mərhumun qatilinin hələ də tapılmamasına da toxunan Əliağa Hüseynov deyib: “Təkcə mən yox, Rail Rzayevi istəyən hər kəs arzu edir ki, onun qatili tez tapılsın. Rail Rzayevin düşməni ordumuzun möhkəmliyini istəməyənlər idi. Bir generalın-hərbçinin düşməni ancaq ordunu istəməyənlər ola bilər. Hesab edirəm ki, burada da xarici düşmənlərin əli var”.
