Prosesdə Əli Kərimli və AXCP fəalları da iştirak etdi
İsmayıllı hadisələrində təqsirləndirilənlərin işi üzrə məhkəmə prosesi fevralın 11-də davam edib.
Şəki Ağır Cinayətlər Məhkəməsində təqsirləndirilənlərlə bağlı məhkəmə qərarları elan olunub. Ötən il yanvarın 23-də baş verənlərlə bağlı təqsirləndirilənlərin telefon danışıqları, onların izlənilməsi barədə məhkəmə qərarı elan olunub.
Daha sonra prosesdə DİN və MTN-in apardığı müşahidələr yer alıb, onlarla bağlı dinlənmələr keçirilib.
Məhkəmə prosesinə ABŞ səfirliyinin nümayəndələri, AXCP sədri Əli Kərimli, partiyanın Rəyasət Heyətinin üzvləri Sahib Kərimli, Şahin Həsənli və AXCP-nin Şəki rayon şöbəsinin fəalları da qatılıb.
Məhkəmədə narazılıq yaranıb.
“Azadlıq” radiosunun məlumatına görə, vəkillər İsmayıllı rayonunun polis rəisi Nizami Qocayev, Mingəçevir polis rəisi Ələsgər Bədəlov, Bakı şəhər Xəzər rayon Polis İdarəsinin rəisi Azər Muradov və “Azadlıq” qəzetinin o vaxtkı müxbiri Elçin İsmayıllının məhkəməyə şahid qismində gətirilməsi vəsatətini qaldırıb.
Dövlət ittihamçısı bu vəsatəti əsassız sayıb.
Hakimin bu vəsatəti təmin etməməsi məhbusların etirazına səbəb olub. Bildiriblər ki, həyatları həmin şahidlərin deyəcəklərindən asılıdır. Onlar məhkəmənin qərarını özlərinə qarşı haqsızlıq adlandırıblar, göstərilən şahidlərin gətirilməsini tələb ediblər. Bəyan ediblər ki, vəsatət təmin edilməyənə qədər məhkəmə zalındakı dəmir qəfəsdən çıxmayacaqlar.
Müttəhimlərin və vəkillərin etirazlarına, isrtarlı istəklərinə baxmayaraq göstərilən şəxslərin şahid kimi dindirilməsi barədə vəsatət təmin olunmayıb.
Proses fevralın 12-də davam edəcək.
Sahib Kərimli azadliq.info-ya açıqlamasında bildirib ki, AXCP sədri Əli Kərimli fasilədə İlqar Məmmədov və Tofiq Yaqublu ilə söhbət edib. Daha sonra digər İsmayıllı məhbuslarının valideynləriylə görüşüb: “Məhkəmə bitəndən sonra binanın önündə Əli bəyi gözləyən AXCP-nin Şəki rayon təşkilatının sədri Əli Abdullayev başda olmaqla 50-yə yaxın cəbhəçiylə kiçik gəzinti oldu. Yaxınlıqdakı çayxanaların birində oturub söhbət etdik. AXCP-yə yeni qoşulan üzvlər Əli bəyə Milli Şuranın gələcək fəaliyyəti, o cümlədən partiyayla bağlı suallar ünvanladı. Maraqlı diskusiyya oldu”.
Qeyd edək ki, fevralın 10-da Şəkidə keçirlən prosesdə də Milli Şuranın sədri Cəmil Həsənli, AXCP sədrinin müavinləri Gözəl Bayramlı, Əbülfəz Qurbanlı, partiyanın Rəyasət Heyətinin üzvü İlham Hüseynli iştirak edib.
Ramin DEKO
