Almaniya mətbuatı Türkiyənin baş naziri Rəcəb Tayyib Ərdoğanın bu ölkəyə səfəri zamanı kansler Angela Merkelin ona münasibətindən yazıb. Stern nəşrinin yazdığına görə, tərəfdarlarının pop-ulduz kimi qarşıladığı Ərdoğanı Merkel məsafədə saxlayıb. Bunun səbəbi nədir? Axı son illər Türkiyə Almaniya üçün ən əhəmiyyətli ticarət tərəfdaşı olaraq qalmaqdadır. Ərdoğanın hakimiyyəti illərində Türkiyə olan alman şirkətlərinin sayı dörd dəfə artıb. Hər il 5 mln turist istirahətini Türkiyə kurortlarında keçirir. Bundan əlavə, Avropa ilə Türkiyənin strateji tərəfdaşlığının vacibliyi vurğulanır.
Ancaq fevralın 4-də Ərdoğanın Almaniyaya səfəri etiraz aksiyası ilə müşahidə olunub. Berlində bir neçə təşkilat Ərdoğana qarşı aksiya keçirib. Yerli mətbuat isə Ərdoğanın Almaniya səfərinin bu ilin mart ayında keçiriləcək bələdiyyə seçkiləri və avqustdakı prezident seçkiləri ilə əlaqələndirir. Almaniyalı ekspertlər hesab edir ki, Ərdoğan Berlinə Almaniyada yaşayan türklərinin səsinin ardınca gəlib. Hazırda ən azı yarım milyon Türkiyə vətəndaşı Almaniyada yaşayır. Bu ilki seçkilər zamanı türklər Almaniyanın yeddi iri şəhərində səsverməyə qatılacaq. Qeyd etmək lazımdır ki, ölkədən kənarda yaşayan türklərin Ərdoğana dəstəyi böyükdür. Son seçkilərdə Türkiyədə Ərdoğan 50 faiz səs toplamışdısa, Avropada bu göstərici 61 faiz oldu.
Türklər Almaniya siyasətində də fəaldır. 2013-cü ilin parlament seçkilərində etnik türklər parlamentdə 11 yer qazanıb.
Berlinə səfəri zamanı Ərdoğan ölkəsinin AB-ə üzvlü ilə əməkdaşlığından söz açıb və bu quruma ehtiyaclarının olduğunu deyib. Eyni zamanda o AB-nin Türkiyəyə ehtiyac duyduğunu da qeyd edib.
Merkel isə cavabında Türkiyənin quruma üzvlüyünə skeptik yanaşdığını deyib. Merkel Türkiyənin AB-ə üzvlüyünə ehtiyatla yanaşır. Bununla belə kansler Ərdoğanın seçkilərdə mövqeyinə təsir edəcək kəskin ifadələrə də yol verməyib. Almaniyada hesab edirlər ki, Gülən hərəkatı bu ölkədə arzulanan alternativ deyil.
Ancaq müşahidəçilər Merkelin səmimi münasibəti ilə yanaşı Ərdoğandan bir qədər uzaqlaşdığını da qeyd edir. Die Welt nəşri yazır ki, «Merkelin Ərdoğanın şarmına qarşı immuniteti var».
azadlıq.info