Sabiq nazirin hüquqlarını müdafiə Komitəsi onun sona qədər mübarizə aparacağına əmindir
Sabiq səhiyyə naziri Əli İnsanov məhkəmədə elan etdi ki, hakimiyyət onu həbsxanada öldürmək istəyir. Əli İnsanovun müdafiə qrupunun təmsilçilərindən olan Yalçın Qəhrəmanoğlu bu xəbərdarlığı ciddi hesab edir. “Azadliq.info”ya verdiyi açıqlamada Y.Qəhrəmanoğlu bildirib ki, hakimiyyət böyük məmnuniyyətlə yaxasını Əli İnsanovdan bu şəkildə qurtarardı: “Bilirsiniz, əslində bu məhkəmə zamanı göründü ki, Əli müəllimi sındıra bilməyiblər və onu həbsə atanlar bunu edə bilməyəcəklərini birdəfəlik yəqin ediblər. Buna görə də öz saxtakarlıqlarına və şər maşınlarına bəraət qazandıra bilmək üçün onu məhv edə bilərlər. Axı, hər bir məhkəmə iclası zamanı Əli İnsanov hakimiyyəti ittiham və ifşa edən çox ciddi faktlar qoyur ortalığa”.
Y.Qəhrəmanoğlu əlavə edib ki, əslində Əli İnsanovu çoxdan məhv edərdilər, sadəcə olaraq, həm yerli ictimai rəydə, həm də beynəlxalq aləmdə onun şərlənərək həbs edilməsi aşkardır. Buna görə də ona xəsarət yetirilməsi dövlət terroru kimi qiymətləndirilə bilər, bundan qorxurlar.
Bir neçə gün əvvəl yaydığı müraciətdə Y.Qəhrəmanoğlu bəzi mətbuat orqanlarını Ə.İnsanova qarşı qərəzli mövqe tutmaqda günahlandırmış, amma ad çəkməmişdi. Bu sualın cavabında o deyib: “Bilirsiniz, mən günahsız olaraq həbsdə saxlanılan bir adama qarşı qərəzli mövqe tutan mətbuat orqanlarının adlarını çəkmək istəmirəm. Bu qəzetlər onu həbs etdirənlərlə ortaqlıq nümayiş etdirirlər. Amma ölkədə müstəqilliyini qoruyub saxlaya bilmiş media vasitələri Əli müəllimə dəstək verir. Eyni zamanda xüsusilə əlavə etmək istəyirəm ki, Milli Şuranın Əli İnsanovun məhkəməsini ardıcıl olaraq diqqətdə saxlaması həm Əli İnsanovun özünə, həm də onun yaxınlarına ciddi dəstəkdir. Mən Milli Şuranın sədri Cəmil Həsənliyə təşəkkür edirəm. Amma eyni zamanda onu da vurğulamağı vacib sayıram ki, Əli İnsanovun Milli Şuraya münasibəti hər kəsə bəllidir. O, məhkəmə iclasının gedişində Rüstəm İbrahimbəyovu doğum günü ilə bağlı təbrik etməyə macal tapırsa, öz gələcək taleyini müxalifətin bu mərkəzləşmiş gücü ilə bağlamağa qərar vermişdir, deməkdir. Əli İnsanov siyasi məhbusdur. O, indi bütün ölkənin gözü qarşısında Azərbaycandakı diktatura rejimi ilə mübarizə aparır və bu rejimlə mübarizə aparanlarla bir yerdə olduğunun açıq mesajını verir. Razılaşın ki, o da başqaları kimi hansısa şərtlərlə razılaşsaydı, susub dayanar və indi də çoxdan azadlıqda olardı. Amma Əli İnsanov haqsızlıq qarşısında susmur və geri çəkilmir. Məncə, bu, ibrətamiz davranışdır və həm bütövlükdə cəmiyyətə, həm də məhbəsdəki siyasi dustaqlara örnəkdir”.
azadliq.info
