“Yeni Azərbaycan” qəzetinin keçmiş baş redaktoru Alqış Həsənoğlu «Yeni Müsavat» qəzetinə müsahibəsində maraqlı etirafda bulunub. Onun fikrincə, icra başçılarını, xırda məmurları ildə ən azı iki dəfə yığıb insanlarla necə davranmağı, necə çıxış etməyi öyrətmək lazımdır: «Heç bir məmur ona tapşırılan sahənin imkanlarından öz məqsədləri naminə istifadə etməməlidir. Bəzən görürsən bir məmura iş tapşırılır, kurasiya etdiyi sahənin imkanlarından özünün təmtəraqlı imicini formalaşdırmaq üçün istifadə edir. Əlbəttə, bu, yolverilməzdir. Bəzən bizim məmurlar insanlarla davranış qaydalarını, normalarını bilmirlər. Məsələn, Quba hadisələri ona görə baş verdi ki, rayonun icra başçısı Qubanı yağlı tikəyə bənzətdi. Deməli, bu məmur qəssab təfəkküründə olan bir adamdır. Hər şey də ondan başlandı. Sovet dövründə çox yaxşı bir ənənə var idi. İldə iki dəfə rayon rəhbərləri Partiya Məktəbinə – indi onun bazasında Prezident Yanında Dövlət İdarəçiliyi Akademiyası yaradılıb – yığışırdılar, onlara kurslar keçirdilər, onları təlimatlandırırdılar. Hesab edirəm ki, bu ənənəni davam etdirmək lazım. Məmurları ildə ən azı iki dəfə yığıb insanlarla necə davranmağı, vətəndaşlar qarşısında necə çıxış etməyi onlara öyrətmək lazımdır. Sən rayonun, bir elin rəhbəri ola-ola durub deyəndə ki, rayon yağlı tikədir, əlbəttə, bunun çox acı nəticələri olacaq, necə ki, oldu».
Leyla Yunus: «Sovet dövrünün təcrübəsinə qayıtmaq indikindən pis durumun yaranmasına səbəb ola bilər»
Hüquq müdafiəçisi Leyla Yunus A.Həsənovun həqiqətən də ciddi etirafda bulunduğunu düşünür. Amma L.Yunusun fikrincə, A.Həsənovun yaranmış vəziyyətdən çıxış yolu kimi göstərdiyi məqbul sayıla bilməz: «Bəzən sovet dövrü ilə bağlı müəyyən yanlış düşüncələr olur. Sovet dövründə hüquq-mühafizə orqanlarının dəhşətləri ilə üzləşməyənlər həmin dönəmi ideal sayırlar. Elə düşünülür ki, sovet dövrü insanların hüquqları qorunurdu. Hazırda rəhbər strukturlarda təmsil olunan sovet dövrünün kadrları ona görə sovet dövrünə qayıtmaq istəyirlər ki, o zaman ümumi nəzarət həyata keçirmək olurdu. Amma o zaman heç kim bardel tikə bilməzdi. Lakin sovet dövrünün təcrübəsinə qayıtmaq indikindən pis durumun yaranmasına səbəb ola bilər».
Azərbaycanda məmurların insanlarla davranışının aşağı səviyyədə olduğunu deyən L.Yunus bildirdi ki, ən kiçik ranqlı məmurlar belə insanların ləyaqətini alçatmağa çalışırlar: «Hətta MİS müdiri belə ona müraciət edən şəxslərə kinayə ilə yanaşır və imkan düşdükcə onları alçatmağa çalışır. Bütün bunlar sistemin idarəetmə qüsurunun nəticəsidir. Çünki hər bir məmur da özündən ranqca böyük məmur tərəfindən alçaldılır».
Aydın Mirzəzadə: «Alqış Həsənovun dediyi praktika sovet dövrünə aiddir»
YAP Siyasi Şurasının üzvü, millət vəkili Aydın Mirzəzadə bildirdi ki, A.Həsənovun dediyi praktika sovet dövrünə aiddir. Hazırda kadrlara olan münasibət də sovet dövründən fərqlənir: «Bu gün Azərbaycandakı kadr korpusunun hazırlanmasına dair artıq otruşmuş bir praktika var. Azərbaycanda kadrlar böyük həyat təcrübəsinə, biliyə, eyni zamanda göndərildiyi sahə üzrə müəyyən təcrübəyə malik olmalıdırlar. Bu baxımdan praktika özünü doğruldur. Hər hansı kadr özünü doğrultmadıq da isə başaqa biri ilə əvəz edilir».
Xəyal
