Müzəffər Baxışov: «Əgər Nəriman Məmmədov bu vəzifəyə qardaşının əmri ilə təyin olunubsa, bu, qanunsuzdur»
Nəqliyyat naziri Ziya Məmmədov qardaşını işdən çıxarıb. “Qafqazinfo”nun məlumatına görə, bir neçə gün əvvəl nazir qardaşı ilə bağlı əmr verib. Əmrdə bildirilir ki, Nəqliyyat Nazirliyinin tərkibində fəaliyyət göstərən “MMC 85″ adlı qurumun rəhbəri Nəriman Məmmədov vəzifəsindən azad olunsun. Verilən məlumata görə, Nəriman Məmmədov ”Azəryolsevis”in rəhbəri Cavid Qurbanovun müşaviri təyin olunub.
Ziya Məmmədovun digər qardaşı, deputat Elton Məmmədov məsələyə münasibət bildirib. O, AzNews.az-a açıqlamasında bildirib ki, Nəriman Məmmədov xeyli müddətdir ki, həmin vəzifədə çalışıb və onun işdən azad olunmasında qeyri-adi heç nə yoxdur. Deputat deyib ki, Ziya Məmmədov öz qardaşını işindən azad etməyib, sadəcə bir işdən digərinə keçirib: “Nəriman müəllim başqa işə keçirilib. Müvafiq icra hakimiyyətinin rəhbəri necə məsləhət görürsə, o cür də kadr islahatları aparır. Bu cür hallara kimsənin müdaxilə edib, yaxud da təhlil etməsi, bunu ictimaiyyətə başqa yöndə çatdırmaq cəhdləri düzgün mövqe deyil. Belə xəbərləri işə müdaxilə kimi qiymətləndirirəm. Bu, yolverilməzdir”.ÿ
Diqqət çəkən məqam odur ki, qanunvericiliyə görə nazirin öz qardaşını tabeliyində olan quruma təyin etməsi qanunsuzdur.
Hüquqşünas Müzəffər Baxışov bildirdi ki, əgər Nəriman Məmmədov qardaşının əmri ilə bu vəzifəyə təyin edilibsə, 30 gün müddətində tutduğu vəzifədən azad edilməlidir: “Korrupsiyaya qarşı mübarizə haqqında Azərbaycan Respublikasının qanunun 7.1 maddəsinin tələblərinə görə yaxın qohumlar seçkili və qanunvericilikdə nəzərdə tutulan vəzifələr istisna olmaqla bir-birinin tabeliyində ola bilməzlər. Əgər Nəriman Məmmədov qardaşı Ziya Məmmədovun əmri ilə vəzifəyə təyin olunubsa, bu, qanunsuzdur. Vəzifəli şəxsin əmri ilə hər hansı şəxs vəzifəyə təyin olunursa, bu, tabelik sayılır. Əgər Ziya Məmmədovun qardaşı əvvəlki işindən də nazirin əmri ilə çıxarılıbsa, bu da qanunsuzdur və deməli, əvvəlki vəzifəyə də qanunsuz təyin edilib. ”Azəryolservis” Nəqliyyat Nazirliyinin təsis etdiyi qurumdur. Belə olan halda onun bu qurumda müşavir postuna təyin olunması da qanunsuzdur. Qanunun tələbinə görə, həmin şəxslər 30 gün müddətində tutduqları vəzifədən azad olunmalıdır”.
Akif
