Faciəli helikopter qəzasında dünyasını dəyişən Yaşar Əhmədovun ölümündən bir il ötür
Ötən il fevralın 11-də bütün ölkəni yasa qərq edən faciəli helikopter qəzasından bir il ötür. Qəzada düşmən çəpəri, Vətən sipəri olan üç qəhrəman övladımız Hərbi Hava Qüvvələri helikopterinin ekipaj üzvləri – kapitan Əhmədov Yaşar Mail oğlu, baş leytenant Zeynalov Rüstəm Gülhüseyn oğlu və leytenant Zeynalov Bəhruz Novruz oğlu hərbi tapşırığı yerinə yetirərkən həlak oldular.
Qəzada dünyasını dəyişən Yaşar Əhmədovun ailə üzvləri ilə görüşərək, bu faciəli hadisənin ildönümündə onlar üçün bu bir ilin necə keçdiyini öyrənmək istədik.
“Yaşarın yeri hər yerdə görünür”
Kapitan Əhmədov Yaşar Mail oğlu 1970-ci ildə Qazax rayonunun Aslanbəyli kəndində anadan olub. Dörd min əhalisi olan Aslanbəyli kəndi Qarabağ döyüşlərində 23 şəhid verib.
Yaşarın atası Mail müəllim ixtisasca riyaziyyatçı olub, uzun müddət Aslanbəyli kənd orta məktəbində tədris işləri üzrə direktor müavini işləyib. Kəndin sayılıb-seçilən ağsaqqallarından biri idi. Yaşar ölümündən dörd ay əvvəl – 2012-cilin noyabrında atasını çiyinlərində son mənzilə yola salmışdı. Onun ailəsi bu ağır itkinin kədərini üzərindən atmamış dəhşətli bir xəbərlə sarsıldı: bu dəfə Yaşar doğmalarının çiynində son mənzilə yola düşdü.
Mərhum kapitanın həyat yoldaşı Nuriyyə xanımın aradan keçən bir ili həyatlarının ən acı dönəm adlandırır: “Yaşarsız bu bir sanki bir əsr kimi keçdi. Onun yeri hər yerdə hiss olunur. Istiqanlığı, övladlarına doğmalığı, qohum-əqrəbaya mehribanlığı onu hamının sevimlisinə çevirmişdi. Yaşarın yoxluğu ilə barışmaq çox çətindir. Hələ də inana bilmirik ki, o yoxdur. Elə bilirik ki, qayıdıb gələcək”.
Mərhum kapitanın anası Naimə xanım sinəsinə çəkilən oğul dağına rəğmən, mətanətlidir, fəxr edir ki, belə bir vətən qeyrətli, millət təəsübkeşi olan bir övlad böyüdüb: “Bu bir ildə Yaşarı bir an belə, unutmamışam. Balamın o gözəl üzü hər an gözümün qabağındadır, elə bilirəm, hardansa qəfil peyda olacaq, həmişəki kimi boynuma sarılacaq. Tanrı heç bir anaya övlad acısı yaşatmasın. Yeganə təsəllim odur ki, belə bir cəsur oğulun anasıyam. Indi onun qoxusunu övladlarından alıram. Onlar da ataları ilə qürur duyurlar. Bir də istəyirəm, oğluma şəhid adı rəsmiləşsin. Bu bizim dərdimizi az da olsa, yüngülləşdirərdi”.
Yaşar Əhmədovun ailəsinin arzusu
Hazırda mərhum kapitanın ailəsi Hərbi Hava Qüvvələrinə məxsus hərbi şəhərcikdə yaşayırlar. Gündə bir neçə dəfə bu hərbi şəhərciyin yanından havalanan helikopterləri gördüykdə ailə üzvlərinin yaraları sanki yenidən qaynayır. Xanımı və övladları qəhərə boğulur, bir zamanlar həmin helikopterlərin sükanı arxasına keçən Yaşarın yoxluğunun üzüntüsünü daha dərindən hiss edirlər.
Ailə üzvlərinin istəyi onların başqa bir yerdə mənzillə təmin edilmələri, mərhum kapitanın yoxluğunun acısını onlara hər an yaşatmaqda olan bu hərbi şəhərcikdən uzaqlaşmalarıdır.
Bundan başqa, Yaşarın xatirəsinin əbədiləşdirilməsi, ona şəhid statusu verilməsi də ailənin ən böyük istəklərindən biridir.
Yaşar Əhmədov Ukraynanın Poltava vilayətinin Kremençuk şəhərində 1 il 8 ay hərbi təyyarəçilik təhsili alıb. Daha sonra isə təhsilini Azərbaycan Milli Aviasiya Akademiyasında davam etdirib. Burada təhsilini bitirdikdən sonra isə o, Azərbaycanın Hərbi Hava Qüvvələrində peşəkar kadr xidmətə başlayıb. 1998-ci ildə ailə həyatı quran Yaşar Əhmədov, peşəkar hərbi pilot kimi 15 il ərzində ona göstərilən etimadı ən yüksək səviyyədə doğrultmağa çalışıb. Odur ki, ölümündən sonra olsa belə, onun Hərbi Hava Qüvvələrindəki xidmətlərinin qiymətləndirilməsi Yaşarın xatirəsinə ehtiramın bir işarəsi olardı.
Qəhrəmanlara ehtiram borcumuzdur
Yaşar Əhmədovun əmisi Əhməd həkim deyir ki, qardaşı oğlu ilə fəxr edir: “O, öz qohum-əqrəbası üçün həmişə nümunəvi bir oğul idi. Ölümü ilə isə bütün gənclərimizə örnək oldu. Yaşar kimi oğulları olan bir ölkənin torpaqları uzun müddət işğal altında qala bilməz. Elə Yaşarın ən böyük arzusu da Qarabağın azad edilməsi üçün mübarizəyə atılmaq idi. Hər an buna hazır idi. Yaşarın və bütün şəhidlərimizin ruhu onda rahatlıq tapacaq ki, bizim bir qarış torpağımız belə, yağı caynağında qalmasın”.
Əhməd həkimin sözlərinə görə, hələ orta məktəb illərindən hərbi dərslərə həvəs göstərən Yaşar Əhmədov sonadək öz arzularının arxasınca getdi və sonda istəyinə çatdı: “Hərbi təyyarəçi kimi vətən göyləri ona əmanət idi. Göylər üçün doğulmuşdu. Sağlığında cismi, ölümündən sonra isə ruhu göyləri özünə məskən seçdi. Bütün nəslimiz, el-obamız belə bir qeyrətli, cəsur oğulla fəxr edir”.
Yaşarın həlak olduğu helikopter qəzası ilə bağlı cinayət işi açılıb və aradan bir il keçsə də, hələlik bu dəhşətli hadisənin istintaqı başa çatmayıb. Ailə üzvləri həm də bu sarıdan nigarandırlar və cinayət işinin tezliklə başa çatacağına ümid edirlər.
Yaşarın işıqlı xatirəsi isə canını vətən yolunda qıymağa hazır bütün Azərbaycan oğulları kimi, onun doğmalarının, dostlarının, el-obasının, bütün xalqımızın qəlbində əbədi yaşayacaq.
Qəhrəmanlara ehtiram borcumuzdur. Bunu isə yalnız sözdə deyil, əməldə nümayiş etdirməliyik ki, 20 faiz torpaqları işğal altında olan ölkənin gəncliyinin vətənpərvərlik ruhu daha da alovlansın, tariximizə yeni igidnamələr yazılsın.
Ramin
