Subsidiyaların verilməsində korrupsiyanı dövlət başçısı da etiraf edir
Dövlət başçısı Ilham Əliyev bugünlərdə keçirdiyi müşavirədə iqtisadiyyatın müxtəlif sahələri haqda danışarkən kənd təsərrüfatı sektoruna da toxundu, subsidiyaların verilməsində şəffaflığın təmin olunmadığını etiraf etdi:
“Mən bir il əvvəl də bu barədə danışmışam, bu gün də məcburam bu barədə öz fikirlərimi bildirim. Burada biz şəffaflığa nail olmamışıq. Şəffaflıq təmin edilmir və burada oturanlar bilirlər, şəffaflıq nəyə görə təmin edilmir. Bu, mənim sonÿxəbərdarlığımdır. Subsidiyanın verilməsində tam şəkildə nəzarət-uçot sistemi yaradılmalıdır. Kənd Təsərrüfatı Nazirliyinə bu göstərişlər verilib. Yerli icra orqanlarının nümayəndələri də burada öz müsbət rolunu oynamalıdır. Çünki bəzi hallarda subsidiyalar fermerlərə çatmır. Ona görə, konkret təkliflər veriləcək və yeni müvafiq sərəncam da imzalanacaq. Bu, kənd təsərrüfatının inkişafı ilə bağlı çox ciddi, islahatyönümlü sərəncam olacaq. Bütün mərkəzi və yerli icra orqanlarının nümayəndələri ümumi məqsədə xidmət etməlidir. Ümumi məqsəd şəffaflığı yaratmaq, kənd təsərrüfatını inkişaf etdirmək və fermer təsərrüfatlarına yardım etməkdir”.
Belə görünür ki, Ilham Əliyev subsidiyaların verilməsində şəffaflıqın harada pozulduğu, ayrılan vəsaitlərin kimlərin cibinə getdiyi haqda məlumatlıdır. Görəsən, dövlət başçısı kimlərə eyham vurur?
Kənd təsərrüfatı sahəsi üzrə ekspert Vahid Məhərrəmov subsidiyaların alınması proseduru haqda danışaraq bildirib ki, bunun üçün fermer əkinlə bağlı arayışları rayon icra hakimiyyətində yaradılan komissiyalara təqdim edir. Bundan sonra həmin sənədlər Kənd Təsərrüfatı Nazirliyinə göndərilir. Lakin bu prosesdə şəffaflıq olmadığı üçün fermerlər əziyyət çəkir, mütəxəssislər isə harada qüsura yol verildiyini müəyyən edə bilmirlər: “Biz şəffaflığın olmadığını yalnız təxmin edirik. Xatırladım ki, 2007-ci ildən subsidiyaların verilməsi həyata keçirilir. Elə həmin illərdən də şəffaflıq pozulur. Sirr deyil ki, ayrılan subsidiyanın məmurlar tərəfindən mənimsənilməsi faktları var. Vergilər Nazirliyi 3 il öncə yoxlama apararaq belə faktlar aşkar edib. Sahələrin həcmi süni surətdə şişirdilir, belə hallarda ayrılan vəsaitin əsas hissəsi də mənimsənilir”.
Ekspert qeyd edir ki, əkinlə məşğul olmayan insanların belə, subsidiyadan qanunsuz bəhrələnməsi faktları olub. Onlar arayış toplayıb, yuxarı orqanlar da onlara himayədarlıq edib. Bu pozuntular yerli, rayon və nazirlik səviyyəsində həyata keçirilib.
Vahid Məhərrəmov vurğulayır ki, büdcədən ayrılan vəsaitlərdə şəffaflıq olmadan, onun səmərəsindən danışmaq belə yersizdir.
Nigar
