Dekan və müavinlərdən işdən azad edilmək barədə ərizə alınıb
Sumqayıt Dövlət Unversitetində (SDU) bütün dekan və dekan müavinlərinin işdən azad edilmək barədə ərizələri alınıb.
Bu barədə Avropa.info məlumat yayıb. Məlumata görə, buna səbəb SDU-nun bir müddət öncə vəzifəsindən çıxarılmış rektoru Nadir Qəhramanovun, dolayısı ilə sabiq təhsil naziri Misir Mərdanovun kadrlarını ali məktəbdən təmizləməkdir. SDU Nadir Qəhramanovun dönəmində rüşvətxorluğa görə ölkənin ən öndə gedən ali təhsil müəssisələrindən biri sayılırdı. Təhsil naziri Mikayıl Cabbarovun sərəncamı ilə SDU-ya prorektor təyin olunan və rektorun vəzifələrini icra edən BDU-nun keçmiş prorektoru Elxan Hüseynovun gəlişindən sonra isə ali məktəbdə vəziyyət dramatikləşib. Məlumatda deyilir ki, bir müddət öncə, prorektorun nəzarəti altında dokturanturaya imtahan keçirilib. Əvvəlki rektorun dövründə dokturanturaya qəbul olunmaq üçün pul verənlərin hamısı bu imtahandan kəsilib. Imtahanın şəffaf keçdiyi bildirilir. Bir neçə gün öncə isə Elxan Hüseynov SDU-nun bütün dekan və dekan müavinlərindən işdən azad edilmək üçün ərizə alıb.
Əvvəllər BDU-da prorektor vəzifəsində çalışan Elxan Hüseynovun rektor təyin olunmaq üçün prezidentə təqdimatının göndəriləcəyi də bildirilir.
Keçmiş rektor Nadir Qəhrəmanov keçmiş təhsil naziri Misir Mərdanovun kadrı və dostu sayılırdı. Bir müddət öncə, Nadir Qəhrəmanov tutduğu vəzifədən istefa verib.
