Təhsil Nazirliyi Qafqaz Müsəlmanları Idarəsinin (QMI) ölkədə yaranmış dini radikalizm probleminin aradan qaldırılması, insanların dini cəhətdən düzgün maariflənməsi üçün orta və ali məktəblərdə dini dərslərin mütləq şəkildə tədris edilməsi ilə bağlı təklifinə münasibət bildirib.
Təhsil Nazirliyindən Trend-ə bildirilib ki, Azərbaycan Konstitusiyasının 18-ci maddəsinə görə, dövlət təhsil sistemi dünyəvi xarakter daşıyır. Bu mənada məktəblərdə ayrıca dini dərslərin tədrisi məqsədəuyğun sayılmır. Bununla belə, ayrı-ayrı dinlər haqqında, xüsusilə islam dini, görkəmli şəxsiyyətləri, müqəddəs kitabımız Qurani-Kərim və burada insanlara təlqin olunan mənəvi dəyərlər haqqında şagirdlərə məlumatların verilməsi zəruri hesab edilir. Həmin məlumatlar ümumtəhsil məktəblərində tədris olunan “Həyat bilgisi” fənnində və digər fənlərdə nəzərə alınıb.
Xatırladaq ki, QMI sədrinin müavini Fuad Nurullayev Azərbaycanın orta və ali məktəblərdə dini dərslərin tədrisində çox gecikdiyini söyləyib. O qeyd edib ki, əhalisinin əksəriyyətini müsəlmanlar təşkil edən Azərbaycanda problemlərin çoxu gənclərin Islam dinini düzgün anlamaması, yalançı təbliğat səbəbindən yaranır. Bu gün Azərbaycanda insanların dini maariflənməsi üçün kifayət qədər tədris imkanları yoxdur.
Təhsil sahəsi üzrə ekspert Etibar Əliyev hesab edir ki, orta məktəb dərslikləri kifayət qədər yüklənib və yeni bir fənn proqramının tətbiqi şagirdi bir qədər də çətinliyə sala bilər. Bu baxımdan ekspert orta məktəblərdə dini tədrisin əleyhinə olduğunu söyləyir:
“Bir çox ölkələrdə dinin elementar əsasları tədris olunur. Lakin Azərbaycanda indiki şəraitdə bunu mümkün hesab etmirəm. Ümumiyyətlə, orta məktəblərdə tədris olunan bir neçə fənndə din haqqında, dini şəxsiyyətlərimiz barədə sitatlar, dini anlayışlar verilir. Bu baxımdan dinin ayrıca fənn kimi tədrisinə ehtiyac görmürəm”. E.Əliyev qeyd edir ki, şagirdlər üçün dini kitabların yazılması müsbət olar. Bir qədər elmi əsaslandırılmış dini kitabların yazılması zəruridir ki, sinifdənxaric oxu üçün şagirdlər bu ədəbiyyatdan istifadə edə bilər.
Nigar
