Ötən il sentyabrın 17-dən bəri həbsdə olan jurnalist və hüquq müdafiəçisi Pərviz Həşimlinin işi üzrə ibtidai istintaq artıq başa çatıb. Hazırda onun vəkilləri cinayət işinin materialları ilə tanış olur. Bu barədə “Azadlıq”a vəkillərdən Yalçın Imanov məlumat verib.
Vəkil fevralın 6-da Milli Təhlükəsizlik Nazirliyinin (MTN) istintaq təcridxanasında Pərvizlə görüşüb. Yalçın Imanovun sözlərinə görə, jurnalistin vəziyyəti ağırdır: “Pərvizin psixoloji durumu həddindən artıq pisdir. O dərəcədə ki, mən onun durumuna görə çox narahatam. Psixoloji durumu ilə yanaşı, həm də kəskin ürək ağrılarından əziyyət çəkir”.
Pərviz Həşimli MTN-dən Kürdəxanıdakı 1 saylı Bakı Istintaq Təcridxanasında köçürülməsi üçün vəkili vasitəsilə növbəti dəfə Baş Prokurorluğa və Ombudsmana müraciət edib. Vəkil deyir ki, Pərviz Həşimlinin MTN-nin istintaq təcridxanasından Kürdəxanıya köçürülməsi üçün artıq heç bir bəhanə qalmayıb: “Əvvəllər Pərvizin bu barədə müraciətlərini istintaqın davam etdiyi, MTN-dən çıxarsa, istintaq sirrinin yayıla biləcəyi bəhanəsilə rədd edirdilər. Amma artıq bu bəhanə də ortadan qalxıb. Çünki istintaq başa çatıb, istintaq sirrinin yayılmasından artıq söhbət gedə bilməz. Yəni, Pərvizin MTN-dən Kürdəxanıdakı istintaq təcridxanasına köçürülməsinə imkan verməyən heç bir səbəb yoxdur”.
Pərviz Həşimlinin barəsindəki cinayət işi gələn həftə Bakı Ağır Cinayətlər Məhkəməsinə göndəriləcək.
Xatırladaq ki, Pərviz Həşimliyə qarşı qaçaqmalçılıq, silah-sursat saxlama kimi ittihamlar irəli sürülüb. Pərviz isə ittihamları rədd edərək, jurnalist fəaliyyətinə görə həbs olunduğunu bəyan edib. Beynəlxalq təşkilatlar da ona qarşı ittihamları şübhə altına alıb. “Amnesty International” hüquq-müdafiə təşkilatı onu “vicdan məhbusu” kimi tanıyıb.
Aytən
