“Baş Prokurorluq Rafiq Tağının qətli üzrə aparılan istintaqın dayandırılması qərarını gizlədir və bizə verməkdən imtina edir”. Mərhum yazıçı-publisistin ailəsinin vəkili Elçin Sadıqov “Media forum” saytına belə deyib.
Vəkil qeyd edib ki, istintaqın dayandırılması haqda qərarı almaq üçün iki dəfə Baş Prokurorluğa müraciət edib, amma heç bir nəticəsi olmayıb: “Bir dəfə Baş Prokurorluğun Ağır Cinayətlərə Dair İşlər üzrə İstintaq İdarəsinə getdim, müstəntiqlə görüşdüm, qərarı istədim. Müstəntiq dedi ki, məsələni rəhbərliklə müzakirə etməlidir. Amma bir nəticəsi olmadı.
Bizə qəbz formasına dörd kağız gəlib. Orada qeyd olunub ki, vəkil və Rafiq Tağının ailə üzvləri Baş Prokurorluğa gedib qərarla tanış ola bilərlər. Bu isə qanunvericiliyə ziddir. Cinayət-Prosessual Məcəlləsində yazılıb ki, vəsatətə rəsmi cavab verilməlidir”.
Elçin Sadıqov hesab edir ki, Rafiq Tağının qətli üzrə istintaqın dayandırılması qərarında bir sıra qaranlıq məqamlara aydınlıq gətirilib və ona görə də onu mərhumun ailə üzvlərinə, vəkilə vermirlər, gizlədirlər.
Rafiq Tağı 2011-ci il noyabrın 19-da Bakıda bıçaqlanıb və aldığı xəsarətlərdən noyabrın 23-də vəfat edib. İstintaqı aparan Baş Prokurorluğun Ağır Cinayətlərə Dair İşlər üzrə İstintaq İdarəsi 2014-cü il yanvarın 8-də cinayət işi üzrə icraatı dayandırıb.
