Tofiq Yaqublu həbsaxanda ikinci ad gününü qeyd etdi
Müsavat başqanının müavini, vicdan məhbusu Tofiq Yaqublunun 53 yaşı tamam oldu. 1961-ci il fevralın 6-da Borçalı mahalında dünyaya göz açan Tofiq Yaqublu ötən ilin fevralın 4-də İsmayıllı hadisələrinə görə həbs olunub. Artıq ikinci doğum gününü barmaqlıqlar arasında qeyd edir.
Qarabağ qazisi, siyasətçi, jurnalist, futbol azarkeşi və ən ümdəsi gözəl ailə başçısı olan Tofiq Yaqublunu təbrik edənlərin sayı minlərlədir. Kimi sosial şəbəkələr, kimi media, kimi də dost-tanış vasitəsilə vicdan məhbusunu təbrik edib.
Bu günlə bağlı təəssüratlarını “deyerler.org”a bölüşən Tofiq Yaqublunun qızı Nigar Yaqublu bildirib ki, onun yeri hər zaman görünür: “Atam ikinci ildir ki, doğum gününü həbsxanada keçirir. Təbii ki, evdə ailə başçısının olmaması çox üzücüdür. Onun yeri hər zaman görünür. Anamız xəstəxanada, atamız həbsxanada… ailəmiz rəsmən pərən-pərən salınıb. Atam üçün nə dərəcədə ağır bir durum olduğunu anlayıram. Tezliklə atamın azadlığa qovuşmasını istəyirik”.
Müsavat Partiyasının başqanı İsa Qəmbər müavinin doğum gününü belə qutlayıb: “Tofiq bəyin 53 yaşı tamam olur. 1 ildir Tofiq Yaqublu, Yadigar Sadiqov kimi fədakar insanların zindanda mübarizəsini, yüksək ləyaqət və intellektual səviyyədə nitqlərini izlədikcə əfsanəvi Müsavat qəhrəmanlarının Lenin-Stalin ölüm düşərgələrindəki dirənişini xatırlamamaq olmur.
Tofiq bəy özü də, ailəsi də qəhrəmanlıq nümayiş etdirir. Ona azadlıq, Maya xanıma şəfa arzulayırıq”.
AXCP sədrinin müavini Nurəddin Məmmədli əqidə yoldaşına belə təbrik yazıb: “Bu gün vicdan məhbusu, jurnalistikamızın parlaq simalarından biri, bütün həyatını xalqımızın azadlıq mücadiləsinə həsr etmiş və buna görə də hakimiyyətin repressiyasına məruz qalmış Tofiq Yaqublunun doğum günüdür. Mübarizə dostumuzu əlamətdar gün münasibətilə səmimi qəlbdən təbrik edir, tezliklə ədalətin bərpa olunması nəticəsində azadlığa qovuşmasını və uğrunda mübarizə apardığı ideyaların reallaşdığı demokratik Azərbaycanda yaşamaq səadəti arzulayıram”.
Tanınmış vəkil Aslan İsmayılov Tofiq Yaqublunu belə xarakterizə edib: “Vətəndaş mövqeyi, qeyrəti, mübarizliyi çoxları üçün nümunə olan, şəxsiyyətinə hörmət bəslədiyim Tofiq bəyin bu gün doğum gününüdür. Qarabağ döyüşlərində mərdlik göstərmiş, müharibədən sonrakı illərdə də Vətənində yaşayan insanların azad cəmiyyətdə xoşbəxt olmaları üçün vuruşduğuna görə bu gün ad gününü məhbəsdə keçirən Tofiq bəyi təbrik edirəm. Tofiq bəylə münasibətlərimizin uzun keçmişi olmasa da onun mərdliyini qızı Nigarın həbsi zamanı gördüm. Kişi üçün ən ağır durumda olsa da dəyanətini qoruyub saxladı, heç kimdən imdad diləmədi, özünü polad kimi apardı. Onun bu cür soyuqqanlılığına bir az təəccüblənmişdim. Tofiq bəyin həyat yoldaşına yazdığı məktubu oxuyub necə həssas olduğunu gördükcə, Nigarın həbsi zamanı göstərdiyi davranışının hansı əzablar hesabına başa gəldiyini anladım. Həbsdə olduğu müddətdə həyat yenidən onu sınağa çəkdi, yalançı şahidlər üzünə durdu, saxta ittihamlarla saxta məhkəmə quruldu, həyat yoldaşı avtoqəzada ağır xəsarətlər aldı. Bütün bunlara baxmayaraq, Tofiq bəy öz dəyanətini bir daha göstərdi.
Uca Allah bəzən sevdiyi insanları ağır sınaqlara çəkir ki, onun inamını yoxlasın deyiminə inandığımdan, arzu edirəm ki, Tofiq bəy gələcək həyatında çəkdiyi əziyyətlərin bəhrəsini balalarının, nəvələrinin, Vətənin xoş günlərində görsün”.
“Azadlıq” qəzetinin kollektivi də bu təbriklərə qoşularaq Tofiq Yaqubluya uzun ömür, can sağlığı, tezliklə həbsdən buraxılıb ailəsinə qovuşmağı, dostlarının və mübarizə yoldaşlarının arasında olmağı arzulayır.
