Nazirlik deyilənlərə reaksiya verdi
Laçın rayonu, Kalafalıq kənd sakini, hazırda Ağcabədi qış yatağında məskunlaşan Afət Hacıyeva “Azadlıq”a müraciət edib. Müracətdə deyilir:
“18 fevral 2012-ci ildə DIN baş mühafizə polis idarəsinin mayoru kimi özünü təqdim edən Azər Mehdiyev oğlum Ülfət Hacıyevi dələduzluq yoluyla aldadaraq bildirib ki, səni FHN-ə işə düzəldəcəyəm. Bunun müqabilində dövlətə 4500 manat ödəməlisən. Oğlum da işə düzəlmək üçün bu məbləği borc alaraq əmisi Məhyəddin Hacıyevin iştirakıyla Azərə verib. Pulu alandan sonra Mehdiyev oğluma qəbzi bir həftədən sonra alacağını deyib. Oğlum bir həftə sonra qəbzi tələb etsə də o, müxtəlif bəhanələrlə oğlumu aldadıb. Biz sonradan anladıq ki, o, bu yolla çox insanları aldadıb pullarını mənimsəyib.
Hətta FHN yanğından mühafizə idarəsinin əməkdaşları korrupsiyaya düşən zaman mənim və qardaşımın yanına ağsaqqal göndərərək imkayətçi olmamağımızı dedi. Şikayətçi olmasaq pulumuzu tezliklə qaytaracağını da bildirdi. Lakin yanğından mühafizə idarəsi əməkdaşları və eləcə də Tofiq adlı şəxs həbs edilərək cinayət işi bağlanandan sonra A.Mehdiyev bizə birmənalı şəkildə dedi ki, sizə pul verəsi deyiləm, hara istəyirsiniz şikayət edin. Çünki mən pulu ildarə rəisi general Etibar Mirzəyevə vermişəm.
02 dekabr 2013-cü ildən etibarən ardıcıl olaraq bu işlə bağlı prezidentə, baş prokurora və DIN rəhbərinə məlumat vermişik. Lakin heç bir tədbir görülməyib. 20 dekabr 2013-cü ildə DIN əməkdaşı kimi özünü təqdim edən Hikmət Babayev oğlumu və qaynımı izahat almaq üçün DIN-ə dəvət etdi. Onlar 4500 manatı A.Mehdiyevə verdiklərini təsdiqlədilər. H.Babayev əlavə sübut kimi Mehdiyevin səsini telefonla yazdırıb gətirməsini söyləyib. Oğlum dərhal onun tapşırığını yerinə yetirərək Mehdiyevin telefonla səsini yazdıraraq diskə köçürüb ona verib. Həmin telefon danışığında Mehdiyev bir daha təsdiq edir ki, dələduzluq yoluyla 4500 manatı oğlumdan alıb.
Təxminən 8 yanvar 2014-cü ildə Bakının Nizami rayon prokurorluğu tərəfindən mən, oğlum və qaynım prezidentə müraciətlə əlaqədar izahata dəvət edildik. 09 yanvar tarixində Nizami rayon prokurorluğunda olduq və bizi Zəminə Əliyeva adlı prokuror köməkçisi qəbul etdi. Biz bir daha təçsdiqlədik ki, Mehdiyev Azər oğlumdan 4500 manat alıb. Səs yazısını da maddi sübut kimi götürdülər. Lakin heç bir tədbir görülmədi.
A.Mehdiyevin yaxın qohumu R.Usubovun qardaşı Mütəllim Usubovun qəbulunda olub və Mehdiyevə kömək üçün xahiş edilib. Usubov da dərhal DIN Daxili Tədqiqatlar Idarəsinin rəisi Rasim Musayevə və Nizami rayon prokuroru, baş ədliyyə müşaviri Aqşin Ziyadova Azərə kömək etmək üçün xüsusi göstəriş verib. Azər bildirir ki, həmin şəxslərə külli miqdarda pul verərək canını qurtarıb.
R.Musayev 14 yanvar tarixli məktubunda bildirir ki, aparılmış tədqiqatlara görə oğlum və əmisi həmin pulu Tapdıq Nəbiyev adlı şəxsə verib. A.Ziyadovun mənə 15 yanvarda ünvanladığı cavab məktubunda bildirilir ki, oğlum və əmisi 4500 manatı Tofiq Orucova, Tapdıq Nəbiyevə və Ilham Verdiyevə verib, onlar isə həbs olunub.
Adıçəkilən rəsmi şəxslər bu əməli ört-basdır edir. Xahiş edirik həmin işin araşdırılmasında bizə kömək edin”.
DIN-nin mətbuat xidmətinin şöbə rəisi Orxan Mansurzadə isə “Azadlıq”a bildirib ki, nazirliyinin Baş Təhqiqat Idarəsinin rəhbərliyi və əməkdaşları barədə deyilənlərin heç bir əsası yoxdur: “Azər Mehdiyevə gəlincə, o həqiqətən də baş mühafizə idarəsinin mayorudur. Onunla bağlı deyilənlər də böhtandır”.
