Müsavat Partiyasının Milli Şuranı tərk etmək qərarına etiraz olaraq təşkilat sıralarından istefalar davam etməkdədir. Bu gün redaksiyamıza müraciət edən gənc Teymur Məmmədlini də Müsavat Partiyasını tərk etməyə vadar edən səbəb məhz bu təşkilatın qəbul etdiyi məlum qərardır.
Müsavat Partiyasının Binəqədi Rayon təşkilatının üzvü olan T.Məmmədlinin sözlərinə görə, Müsavatın Milli Şura ilə bağlı qəbul olunan qərar ciddi əsası olmayan, düşünülməmiş addım idi: «Müsavat Partiyasından istefamın əsas səbəbi bu partiyanın Milli Şura sıralarını tərk etməsidir. Demokratik qüvvələrin hakimiyyətə real alternativi olan bir təşkilatı hazırkı məqamda tərk etmək yanlış qərar idi. 2013-cü il prezident seçkilərindən sonra Azərbaycanda demokratiya uğrunda mübarizə tam yeni bir mərhələyə qədəm qoydu. Milli Şura yarandığı gündən Azərbaycanda demokratik dəyişiklikləri öz qarşısınıda əsas hədəf seçib. Bu hədəfə nail olmadan, mübarizənin önəmli mərhələsində Milli Şuranı tərk etmək müxalifətə bir zərbə idi».
T.Məmmədli bundan sonrakı siyasi fəaliyyətini isə AXCP sıralarında davam etdirmək arzusundadır: «Müsavatdan ayrıldıqdan sonra siyasi fəaliyyətimi AXCP-də davam etdirmək niyyətindəyəm və bununla bağlı partiyaya müraciət edəcəm. Hesab edirəm ki, məhz AXCP və onun sədri Əli Kərimli demokratiya uğrunda prinsipial, ardıcıl mübarizə aparır. Ona görə bundan sonrakı fəaliyyətimi AXCP sıralarında davam etdirmək istəyirəm. AXCP eyni zamanda hazırda Rəsuladə-Elçibəy yoluna sadiq ən güclü partiyalardan biridir. Ona görə mən bu təşkilatın üzvü olmaqdan qürur duyaram. Mən əqidəsiz insan deyiləm. Sadəcə olaraq öz təməl prinsiplərinə sadiq olmayan təşkilatda qalmaqda istəmirəm».
Hikmət
