Siyavuş Novruzov bunu bilir, amma demir
YAP-çı deputat Siyavuş Novruzov Milli Məclisin dünənki iclasında “Meşə qardaşları” və “Ceyşullah” təşkilatlarının terror hədələri barədə danışıb. Siyavuş Novruzov deyib: “Azərbaycan hüquq-mühafizə orqanlarına qarşı hər hansı terror aktlarının həyata keçirilməsi onu göstərir ki, ölkəmizin ictimai-siyasi həyatındakı sabitliyin hökm sürməsi hansısa dövlətə və təşkilata sərf etmir.
Bunun nəticəsi olaraq da hədə-qorxunun yeni bir üsuluna keçiblər. Hədələməklə məşğul olan təşkilatların arxasında duran dövlətlər, qurumlar bəllidir. Onlar bu istiqamətdə Azərbaycana qarşı təhdidlər, tələblər və şərtlər irəli sürməyə hazırlaşır”.
Lakin Siyavuş Novruzov konkret olaraq hansısa dövlətin və ya qurumun adını açıqlamayıb. Bu isə YAP-çı deputatın söylədiklərinin həqiqət olduğuna şübhələri artırır. Digər tərəfdən Siyavuş Novruzovun bildiyi faktları hüquq-mühafizə orqanlarına təqdim etməsi də bəlli deyil.
Tanınmış hüquqşünas Müzəffər Baxışov “Azadlıq”a bildirib ki, Siyavuş Novruzovu səmimi olduğu inandırıcı görünmür: “Çünki belə məlumatlar Milli Məclisin deputatında yox, Milli Təhlükəsizlik Nazirliyində və digər hüquq-mühafizə orqanlarında olur. Yox əgər Siyavuş Novruzov hardansa bir məlumat əldə edibsə, onu parlamentdə səsləndirməyə ehtiyac yox idi, xəbəri hüquq-mühafizə orqanlarına vermək lazım idi. Konstitusiyaya görə deputat səsləndirdiyi fikirlərə görə məsuliyyət daşımır. Yəni, bu fikirlərə görə Siyavuş Novruzovdan izahat alına bilməz. Görünür, o da buna görə belə fikirlər səsləndirir”.
