Məlahət Zeynalova: «Beyninə oksigen normal şəkildə getmir»
Hazırda həbsdə olan “Xural” qəzetinin baş redaktoru Əvəz Zeynallının səhhətində ciddi problemlər var. Bu barədə “AzNews.az”a baş redaktorun həyat yoldaşı Məlahət Zeynalova məlumat verib.
“Əvəz Zeynallının vəziyyəti yaxşı deyil. Beyninə oksigen normal şəkildə getmir”, – deyə Məlahət Zeynalova bildirib.
Onun sözlərinə görə, baş redaktor burnundan iki dəfə əməliyyat olunub, amma həmin problem davam edir: “O, iki dəfə əməliyyat olunub. Hazırda nəfəs almağında çətinlik yaranıb. Çalışırıq ki, yaxşı bir həkim aparaq, onu müalicə etsin. Orada əməliyyat qeyri-mümkündür. Sadəcə, yaxşı müalicə olunmalıdır, elə bir həkim isə hələlik tapa bilmirik”.
“Məsələ ilə bağlı hər hansı bir quruma müraciət etmək fikriniz varmı?” sualına M.Zeynalova belə cavab verib: “Bu haqda düşünürük. Amma gərək bu məsələdə Əvəz bəyin özü ilə danışaq. Ondan icazəsiz və məsləhətləşmədən heç nə deyə bilmərik”.
Xatırladaq ki, Əvəz Zeynallı 2011-ci ilin oktyabr ayında keçmiş deputat Gülər Əhmədovanın şikayəti ilə həbs edilib. O, rüşvət alma ittihamı ilə 9 il azadlıqdan məhrum edilib.
