Ukraynanın prezidenti Viktor Yanukoviçin oğlu Aleksandr Yanukoviçin biznesi haqda gizlinlər aşkarlanıb. Ukraynanın tanınmış «Korrupsiya Qarşı Mübarizə Mərkəzi» bu barədə araşdırma təqdim edib. Araşdırmanın nəticələri mərkəzin saytında yerləşdirilib. Araşdırmanın maraqlı detallarını diqqətinizə çatdırırıq: «1973-cü ildə anadan olan Aleksandr Yanukoviç ixtisasca diş həkimidir. Aleksandr Yanukoviç hazırda Ukraynanın ən zəngin iş adamlarından biridir. O, siyahıda iş adamı Rinat Ahmetovdan sonra ikincidir. 2013-cü ilin noyabrı üçün «Forbes» jurnalı onun ümumi varidatını 510 milyon dollar qiymətləndirib. Aleksandr Yanukoviçin biznes-imperiyası atası Viktor Yanukoviç Ukraynanın prezidenti olduqdan sonra sürətlə böyüməyə başladı. Aleksandr Yanukoviç biznes fəaliyyətini atasının baş nazir təyin olunmasına iki ay qalmış, 2006-cı ildə “Assets Management Corporation” (MAKO) şirkəti ilə qurmağa başlayıb. Onun biznes maraqları «Ümumukrayna İnkişaf Bankı» və «MAKO Holdinq» şirkəti ilə bağlıdır.
«Ümumukrayna İnkişaf Bankı»
2009-cu il aprelin 3-ü «Donsnabtara» ASC nizamnamə kapitalı 80 milyon qrivna (8 milyon dollar) olan «Ümumukrayna İnkişaf Bankı»nı təsis etdi. 2011-ci ildə isə «Donsnabtara» ASC-nin adı «ÜİB-nin Aktivlərinin İdarə Edən Kompaniya – İvest»ə dəyişdirildi. Qısa müddət şirkətə Valentina Arbuzova rəhbərlik edir. 2011-ci ilin yanvarın 27-dən Aleksandr Yanukoviç ÜİB-nin nizamnamə kapitalının tam sahibinə çevrilir. Maraqlıdır ki, bu mühüm hadisə Aleksandr Yanukoviçin yaxın dostu Sergey Arbuzov Ukrayna Milli Bankının rəhbəri təyin olunandan 2 ay sonra baş verir. Sergey Arbuzovun anası Valentina Arbuzova isə ÜİB yaranandan onun İdarə Heyətinin üzvüdür. Təsis edildiyi zamandan 4.5 il müddətində ÜİB kapitalını 10 dəfə artırır. 2013-cü ildə isə ÜİB ötən illə müqayisədə kapitalını iki dəfə artırıb. Maraqlıdır ki, bütün bu nailiyyətlərdən sonra 2012-ci ildən Serqey Arbuzov baş nazirin birinci müavini postuna təyin edilir.
ÜİB-in kapitalının inkişaf tempi
• 2009-cu il aprel – nizamnamə kapitalı 80 milyon qrivna
• 2010-cu il dekabr – 111.7 milyon qrivna
• 2011-ci il dekabr – 332.2 milyon qrivna
• 2012-ci il dekabr – 409.3 milyon qrivna
• 2013-cü il sentyabr – 799.03 milyon qrivna
ÜİB-nin kapitalı əlavə aksiyaların buraxılması hesabına artırılıb. Bu aksiyaların da hamısını Aleksandr Yanukoviç əldə edib. 2013-cü ilin mayında ÜİB 412 milyon qrivna dəyərində aksiya satışa çıxarır. Bu arada ÜİB 2011-ci ildə 2010-cu illə müqayisədə təmiz gəlirini 17 dəfə artırıb.
Hələlik Aleksandr Yanukoviçin 3 il müddətində öz bankının inkişafına yönələn milyonlarla qrivna vəsaitin iqtisadi mənbəyi haradır. Ehtimal olunur ki, bu vəsaitlər «MAKO Holdinq»in vəsaitləri ola bilər. Eyni zamanda onu da vurğulamaq yerinə düşər ki, bu üç il ərzində ÜİB dövlət tərəfindən çox sərfəli sifarişlər alır:
1. 2012-ci ildə Ukraynanın Mərkəzi Vergi Xidmətinin bütün əməkdaşları dövlət proyekti çərçivəsində əməkhaqqı kartlarını məhz ÜİB-dən alırlar. Məlumdur ki, Ukraynanın Vergi Xidmətinin rəisi cənab Klimenko Aleksandr Yanukoviçin, Sergey Arbuzovun yaxın dostudur. 2013-cü il üçün ÜİB Ukraynanın büdcədən maliyyələşən təşkilatlarda çalışanlara maaş kartı verən ən böyük bankına çevrilir. Bundan başqa bankın digər xidmətlərindən istifadə edilməsi də büdcə təşkilatlarında çalışanlar üçün məcburi xarakter daşıyır.
2. 2013-cü il üçün ÜİB bir sıra dövlət tenderlərini udur. Ölkənin dəmiryolunun inkişafı üçün dövlət xətti ilə kredit verən bank kimi məhz ÜİB seçilir. Kreditin ümumi həcmi 978 milyon qrivna təşkil edir.
«MAKO Holdinq»
Bu şirkət Ukraynada ən uğurlu 20 kompaniyanın dayaq nöqtəsi sayılır. Bundan başqa holdinqin törəmə şirkətləri Hollandiya, İsveçrədə də fəaliyyət göstərir. Bu şirkətlərin bir çoxu Viktor Yanukoviçin prezidentliyi dövründə təsis edilib.
Aleksandr Yanukoviç 2011-ci ildə yaradılan «MAKO Hodinq» QSC-nin yeganə sahibidir. Şirkətin nizamnamə kapitalı 55 milyon qrivnadır. «MAKO Holdinq» eyni zamanda bir sıra enerji, kömür və tikinti şirkətləri üçün ana şirkət sayılır.
1. 2010-cu ildə təsis edilən «Edelveys» şirkəti. 2012-ci ildə «MAKO Holdinq» bu şirkətə 1 560 000 qriven sərmayə qoyub. Nəticədə şirkətin səhmlərinin 99 faizi alınıb. 2010-2012-ci illər ərzində şirkət gəlirlə işləməyib.
2. «Konstruktiv» ASC 2010-cu ildə qeydiyyatdan keçib. Səhmlərin 70 faizi «MAKO Holdinq»ə məxsusdur. 2012-ci ildə sonuncu ASC-yə 248.2 milyon qrivna investisiya qoyub.
3. «MAKO İnvest» ASC 2011-ci ildə qeydə alınıb. Şirkətin nizamnamə kapitalı 5 milyon qrivnadır. Nizamnamə kapitalı «MAKO Holdinq» (50,01%) və Aleksandr Yanukoviç (49,99%) arasında bölünüb. 2013-ci ildə «MAKO Holdinq» «MAKO İnvest»ə 4.04 qrivna sərmayə qoyub.
4. «MAKO Treydinq» ASC 2011-də dövlət qeydiyatına alınıb. Nizamnamə kapitalı 5 milyon qrivnadır. Bu şirkətin də nizamnamə kapitalı «MAKO Holdinq» və Aleksandr Yanukoviç arasında bölünüb.
5. «MAKO Aktiv» ASC 2012-ci ilin martın 1-də təsis edilib. «MAKO Holdinq» şirkətin inkişafına 20 milyon qrivna xərcləyib. Şirkətin səhmlərinin 99 faizi «MAKO Holdinq»ə məxsusdur.
Siyahıda bundan başqa «MAKO Holdinq»ə məxsus daha 5 şirkətin adı var. Onlar «Spasatel» ASC, «Şərqi Biznes Mərkəzi» ASC, “Building Capital Corporation” QSC, «Life Holdinq», «Marinservis»dir. Ümumilikdə şirkətlərin sayı 10-dur.
Donbassk Maliyyə Mərkəzi
ÜİB və «MAKO Holdinq»in Aleksandr Yanukoviçin biznes imperiyasına aid olduğu heç bir şübhə doğurmur. Amma bununla belə xeyli sayda koorporasiyalar da var ki, onların da sahibinin məhz Aleksandr Yanukoviç olduğu ehtimal olunur. Belə şirkətlərdən biri «Donbassk Maliyyə Mərkəzi» ASC-dir. Bu ASC enerji sektorunda fəaliyyət göstərir. Mərkəz ölkə ərazisində kömür mədənlərinin fəaliyyətini koordinə edir. Ölkə ərazisində çıxarılan kömür yerli tələbatla yanaşı və xaricə də ixrac edilir.
Xəyal
