“Azadlıq”da ən az oxunan yazı, “Səs” qəzetinin ən çox oxunan yazısından 10 dəfə çox oxunur
Milli Məclisin ötən gün keçirilən plenar iclasında çıxışı zamanı hakim Yeni Azərbaycan Partiyasının (YAP) icra katibinin müavini, millət vəkili Siyavuş Novruzov səyyar qəzet satışı ilə bağlı müxalifət mətbuatında yayılan məlumatlara münasibət bildirib: “Bu gün Bakıda müasir standartlara cavab verən bir çox köşklər quraşdırılıb. Vətəndaş həmin köşklərdə istənilən qəzeti rahat şəkildə ala bilər. Ona görə də burada heç bir problem yoxdur. Kiminsə qəzeti satılmırsa, bunun problemini köşklərdə yox, məzmunda, mahiyyətdə axtarsınlar. İnsanlar üçün maraqlı nəsə varsa, bunu mütləq tapacaqlar. Ona görə də qəzetləri daha oxunaqlı və maraqlı dərc etmək lazımdır” – deyə Siyavuş Novruzov bildirib.
Deputatın məntiqindən belə çıxır ki, ucqar kənddə yaşayan vətəndaş qəzet oxumaq istəyirsə 30-40 kilometr yolu qət edib mərkəzə gəlməlidir, əgər mərkəzdə də qəzet yoxdursa, paytaxta gəlib qəzet almalıdır. Yəni, köşkün olmamasını bəhanə etməməlidir. Bu absurd fikir haqda deyəcəklərimiz bu qədər.
Ancaq, millətimizin vəkili bununla kifayətlənmir. O, iddia edir ki, qəzetlər oxunaqlı və məzmunlu olmadığına görə satılmır və bunun günahı köşklərdə deyil.
Gəlin, qəzetlərin oxunma sayı ilə bağlı kiçik bir araşdırma edək.
“Yeni Azərbaycan” və “Səs” qəzetinin “Azadlıq” qəzeti ilə müqayisəsinə diqqət yetirin. Xatırladaq ki, birinici 2 qəzet hakimiyyətin ən qatı təbliğatçılarıdır.
“Yeni Azərbaycan” qəzetinin 1 fevral tarixili nömrəsində “Aqrar sənayenin inkişafı ərzaq təhlükəsizliyinin təmin olunmasına xidmət edir” başlıqlı yazı dərc olunub. İlham Əliyevin aqrar sahəyə diqqətindən bəhs edən yazı 4 gün ərzində cəmi 450 dəfə oxunub. “Ölkədə korrupsiya və rüşvətxorluqla mübarizə davam edir” başlıqlı yazıda da İlham Əliyevin bu sahədəki xidmətləri sadalanır. Son 4 gün müddətində bu yazını da 420 nəfər oxuyub. Yaxud, PA rəsmisi Əli Həsənovun “ Azərbaycan dövlətçiliyi möhkəm təməllər üzərində qurulub” başlıqlı açıqlaması son 4 gün ərzində 390 dəfə oxunub. Qəzetin son 4 gün ərzində ən çox oxunan köşə yazısı isə 400-dən yuxarı qalxa bilməyib.
“Səs” qəzetində vəziyyət daha faciəlidir. Təsəvvür edin ki, “Dağlıq Qarabağ münaqişəsinin nizama salınması xarici siyasətimizdə prioritet istqamətdir” başlıqlı məqalədə İlham Əliyevin fikirləri son 4 gün ərzində cəmi 62 dəfə oxunub. Yaxud, “Azərbaycan gəncliyi cəmiyyətin avanqard hissəsidir” başlıqlı yazı dərc olunub. Bu yazıda da hakimiyyətin gənclər siyasətindən geniş söhbət açılır. Ancaq yanvarın 31-də sayta qoyulmuş bu yazı 82 dəfə oxunub. Qəzetdə ən son yazılan köşə yanvarın 24-nə təsadüf edir. Müxalifəti hədəf alan bu yazı 11 gün ərzində 164 dəfə oxunub. Yaxud yanvarın 25-də AXCP sədri Əli Kərimlinin əleyhinə yazılmış yazını 10 gün müddətində 143 nəfər oxuyub. Bu statistikanı davam etdirmək olar. Ancaq, rəqəmlər arasında fərq olmadığı üçün oxucuları yormaq istəmirik.
Sonda “Azadlıq” qəzetində dərc olunan yazıların da bir neçəsinin oxunma sayına nəzər salaq. Ötən gün sayta qoyulmuş “ Milli Şura gənclərin cəriməsin ödəmək üçün marafon keçirir” başlıqlı yazı 5300 dəfə, eyni gündə sayta qoyulmuş “İki günlük qar hökuməti rüsvay etdi” başlıqlı yazı 7500 dəfə, köşə yazarı Şahvələd Çobanoğlunun “Ya tamam yan, Azərbaycan!” yazısı 6300 dəfə, AXCP sədri Əli Kərimlinin “Hara baxır bu ölkənin başçısı” başlıqlı “facebook” statusu qəzetin saytında 17000 dəfə, Natiq Güləhmədoğlunun “Əli Kərimlinin Heydər Əliyevdən etiraf tələbi” yazısı 64000 dəfə oxunub.
Cənab Novruzov, bu rəqəmlər təkcə sizin səsləndirdiyiniz fikirləri yox, həm də YAP-ın 600 min üzvü olduğu haqda saxta rəsmiləşdirmələrinizi ifşa edir. Bu ölkədə sizin siyasətinizi dəstəkləyən qəzeti, jurnalı xalq boykot edib.
Əgər “Azadlıq” qəzetinin satış problemi olsaydı, hakimiyyət metro və əl yayımını yasaqlamaz, “Qasid” firmasının qəzetə 70 min manat borcu olmaz, hər həftə bir məmur “Azadlıq”ı məhkəməyə verməzdi.
Məsləhət görərdik ki, yavaşlayasınız. Bu məqamlarda susmaq, həqiqətən də qızıldır.
İlham
