«Səsyazısı əməliyyatı» ilə bağlı yeni iddialar ortaya çıxdı; «Turan»ın rəhbəri təkzib etdi; Milli Şura bəyanat yaydı
Bir neçə gün öncə Azərbaycanın media orqanlarına “Turan” Informasiya Agentliyinin rəhbəri Mehman Əliyevə Ukraynadan gələn telefon zənginin səsyazısı göndərilmişdi.
Səs yazısında öncə Ukraynada yaşayan politoloq Xaqani Hüseynli Mehman Əliyevlə hal-əhval tutur, sonra Qərb institutlarından birinin Yevgeni adlı ÿtəmsilçisinin onunla danışmaq istədiyini bildirirdi. Dəstəyi alan Yevgeni Mehman Əliyevə bildirirdi ki, Qərb Azərbaycanda ÿinqilabi prosesləri təkamül yolu ilə aparmaq üçün tərəfdaşlar axtarır. Mehman Əliyev cavabında bildirirdi ki, bu məsələni telefonda müzakirə etmək istəmir.
Mahman Əliyev məsələ ilə bağlı mediaya açıqlamasında bunu özünə qarşı təxribat adlandırmışdı.
Dünən “Yeni Müsavat” qəzeti məlumat yayıb ki, məsələ ilə bağlı media quruluşlarına yeni xəbərlər göndərilib.
Zəruri qeyd: “Azadlıq” qəzetinə bununla bağlı hər hansı xəbər göndərilməyib.
“Yeni Müsavat”ın yazdığına görə, xəbəri göndərən mənbə iddia edib ki, Mehman Əliyev Yevgenini tanıyır. Xəbərdə daha sonra bildirilir: “Yevgeni adlı şəxslə Mehman Əliyev uzun müddətdir tanışdır, dəfələrlə beynəlxalq təşkilatlar tərəfindən təşkil olunmuş tədbirlərdə görüşüblər və birgə layihələrdə iştirak edirlər. Hətta Zolotaryov Yevgeni 2005-ci ilin noyabr ayında Mehman Əliyevin dəvəti ilə Azərbaycanda olub.
Sosial şəbəkələrdə apardığımız araşdırmalar nəticəsində öyrəndik ki, Mehman Əliyevin dostu Yevgeni – 12.06.1972-ci ildə Ukraynanın Xarkov şəhərində anadan olmuş Zolotaryov Yevgeniy Vladimiroviçdir. O, “Pora” təşkilatının üzvlərindən biri və Qərbin beynəlxalq donor təşkilatları ilə əlaqəli olan şəxs kimi Ukraynanın siyasi dairələrinə məlumdur. O, Ukraynadakı son hadisələr zamanı öz fəallığı ilə seçilir”.
Qəzet yayılan xəbərlərlə bağlı Mehman Əliyevin mövqeyini öyrənib. O, bildirib ki, bu, ona qarşı hazırlanan təxribatın davamıdır: “Bir daha bildirirəm ki, Yevgeni adlı şəxsi tanımıram. Indi iddia edirlər ki, mən 2005-ci ildə onu Azərbaycana dəvət etmişəm. Bu o qədər də uzaq tarix deyil. Əgər həmin şəxs Azərbaycana gəlibsə Dövlət Sərhəd Xidmətində bu haqda məlumat mütləq olmalıdır. Əgər keçibsə, həm də iddia edildiyi kimi, onu Bakıya mən dəvət etmişəmsə, bunu sənədlərlə sübut eləsinlər. Hamısı cəfəngiyyat, ucuz provokasiyadır”.
Mehman Əliyev onu da deyib ki, telefon danışığının səs yazısı yayılandan sonra da Xaqani Hüseynli ilə əlaqə saxlayaraq baş verənləri aydınlaşdırmağa cəhd etməyib: “Artıq mənə bəllidir ki, telefonda danışmaq mənim üçün problemlidir. Ancaq açıq görünür ki, ortada bir provokasiya var. Mən onu da bilmirəm ki, Xaqani Hüseynlinin burada rolu nədir, bu münasibət nə deməkdir”.
Bu arada Milli Şura Mehman Əliyevə qarşı təxribatla bağlı bəyanat yayıb. Bəyanatda deyilir:
“Azərbaycan hakimiyyəti tənqidi mövqedə olan ictimai fəallara, gənclərə, müxalifət nümayəndələrinə və jurnalistlərə qarşı repressiv fəaliyyətini gücləndirməkdədir. Həbslər, hədələr və böhtan kampaniyaları yenə də davam edir. Bu arada tanınmış jurnalist və vətəndaş cəmiyyətinin nüfuzlu nümayəndəsi Mehman Əliyevə qarşı böhtan kampaniyasına cəhd edilmişdir.
Mehman Əliyevə gələn müəmmalı zəngdən sonra onunla edilən telefon söhbəti dinlənilmiş, qeydə alınmış və səs yazısı anonim şəkildə KIV-lərə paylanılmışdır. Daha sonra bu söhbət Qərb ölkələrinin köməyi ilə Azərbaycanda hakimiyyət dəyişikliyi yaratmaq planının qurulması kimi qələmə verilmişdir. Halbuki səs yazısına qulaq asanlar da görürlər ki, söhbətdə Mehman Əliyev tərəfindən qanuna və mənəviyyata zidd heç bir fikir səsləndirilməyib. Mehman Əliyev mətbuata açıqlamasında bu zəngin ona şübhəli göründüyünü və söhbəti davam etdirməkdən imtina etdiyini də açıqlayıb. Bəlli olur ki, cəmiyyətdə böyük nüfuz və etimad sahibi olan bir şəxsi gözdən salmaq üçün təxribat planlaşdırılıb, lakin düşünülmüş plan uğursuzluqla başa çatıb və daha sonra bundan ləkələmə cəhdi kimi istifadə edilib. Halbuki vətəndaşların telefon danışıqlarını dinləmək, yazmaq və yaymaq qanunsuz bir əməldir və dövlət bu cür cinayətlərə qarşı mübarizə aparmalıdır.
Mehman Əliyev uzun illər sabit və güzəştsiz demokratik mövqeyi ilə seçilən bir ictimai xadimdir. Onun peşəkar və müstəqil jurnalist mövqeyi isə cəmiyyətdə örnək kimi göstərilir. Ictimaiyyətin ən fərqli təbəqələrində çox böyük etimada və nüfuza sahibdir. Həmçinin Demokratik Qüvvələrin Milli Şurasının üzvüdür və qurumun rəhbərliyində təmsil olunur. Biz hesab edirik ki, bu amillər antidemokratik hakimiyyəti narahat edir və Mehman Əliyevə qarşı qaralama kampaniyasının səbəbi də bunlardır.
Milli Şura Mehman Əliyevə qarşı təxribatı və böhtan kampaniyasını pisləyir, ona qarşı qanunsuz addımları dayandırmağı tələb edir”.
