«Azərbaycan Dəmir Yolları»nın rəhbəri Arif Əsgərovu devirməyə çalışırlar
“Azərbaycan Dəmir Yolları” Qapalı Səhmdar Cəmiyyətinin rəhbəri Arif Əsgərovun vəzifədən çıxarılması gündəmə gəlib. Bu barədə redaksiyamızda daxil olan məlumatda deyilir ki, son vaxtlar Arif Əsgərovun adının müxtəlif qalmaqallarda hallandırılması və bütün bunların ictimailəşdirilməsi onun “vurulmasına” hesablanıb. Məlumata görə, hakimiyyət daxilindəki müxtəlif qruplaşmalar artıq dəmir yolunu ələ keçirmək üçün fəaliyyətə başlayıblar.
Nəqliyyat naziri Ziya Məmmədov isə bunun qarşısını almaq üçün çabalar göstərməkdədir. Nəqliyyat nazirinin Arif Əsgərovu himayə etməsinin səbəbi dəmir yolu ilə bağlı iri layihələrin planlaşdırılmasıdır. Məsələ burasındadır ki, Bakı Dəmir Yol Vağzalanının köçürülməsi və dəmir yolunun özəlləşdirilməsi planı var. Ziya Məmmədov bu layihələri əldən vermək istəmir. Çünki həm Bakı Dəmir Yol Vağzalının köçürülməsi, həm də dəmir yolunun özəlləşdirilməsi iri pulların ələ keçirilməsi deməkdir. Bundan başqa dəmir yolu daşınmaları da külli miqdarda pulun dövr elədiyi bir sahədir.
Yeri gəlmişkən, bir müddət əvvəl məlumat yayılmışdı ki, Azərbaycan Dəmir Yolları Fransa şirkətlərindən birinə veriləcək.
