Qaz və işıq kəsildi; yollar buz bağladı; nəqliyyatın hərəkəti iflic oldu…
Sumqayıtda sakinlər yeməyə çörək də tapmır
Cəmi iki gün yağan qar və şaxtalı hava ölkədəki gerçək vəziyyəti bütün çılpaqlığı ilə insanlara nümayiş etdirdi. Yollar buz bağladı, ictimai nəqliyyat fəaliyyətini dayandırmağa məcbur oldu, yüzlərlə sərnişin küçələrdə qaldı. Vətəndaşlar işə gedə bilmədilər. Paytaxtın mərkəzi yollarında qartəmizləyən maşınlar işləsə də, yollara duz səpilsə də, əksər ərazilər nəzarətsiz qaldı. Qarlı-şaxtalı günlərdə təbii qaz və elektrik enerjisinin kəsilməsi isə əhalini lap acınacaqlı duruma saldı.
“İsinmək üçün küçədə ocaq qalayıb, çay qaynadırıq”
Abşeron rayonunun bir neçə qəsəbəsində də elektrik enerjisi və qazın verilməsində problemlər yaranıb. Həmçinin Suraxanı rayonunun sakinləri də soyuq günlərdə işıqsız və qazsız qaldıqlarını bildirirlər. Suraxanı rayonu, Hövsan qəsəbəsində yaşayan Vahid Həsənov “anspress”ə deyib ki, soyuqdan donan sakinlər küçədə ocaq qalayıb çay qaynadırlar: “Hövsan donur. Gecə yatanda işıq da vardı, qaz da. Səhər tezdən oyandıq ki, evin içində donuruq. Paltolarımızı geyinib yorğanın altına girmişik. Indi isinmək üçün küçədə ocaq qalayıb, çay qaynadırıq”.
Sakinlər problemin həlli üçün aidiyyəti orqanlarla telefon bağlantısı yarada bilmədiklərindən şikayətlənirlər.
Qaradağ sakinləri də donur
Qar Qaradağ rayonunun sakinlərinə də baha başa gəlib. Rayonun Korgöz qəsəbəsi fevralın 1-dən 2-nə keçən gecə saat 2-dən etibarən qazsız qalıb. Eləcə də Qızıldaş və Şahqar qəsəbələrinə də təbii qazın verilməsində fasilələr yaranıb.
Qaradağ rayonu qaz-istismar idarəsinin baş mühəndisi Tağı Abbasov “anspress”ə açıqlamasında qaz verilişində yaranan problemi Qaradağ-Sumqayıt qaz kəmərində sızıntı əmələ gəlməsilə əlaqələndirib. O, alternativ qaz kəmərlərindən istifadə edilərək, səhər saat 12:00-dan etibarən qazın verilməsinin bərpa olunduğunu bildirib.
Ancaq vətəndaşlar Tağı Abbasovun dediklərini yalan olduğunu söyləyiblər. Qazın bərpa edilmədiyini, hələ də qazsız qaldıqlarını deyiblər.
Sumqayıtlılar da işıq, qaz və çörəkdən məhrumdur
Eyni hal Sumqayıtda da yaşanır. Şəhərin 5-ci və 6-cı kvartallarında yaşayan sakinlər şaxtalı havalar başlayandan qazın və işığın fasilələrlə verildiyi bildirir. Xüsusilə Corat qəsəbəsində vəziyyət heç yaxşı deyil.
Yanvarın 2-nə keçən gecədən Sumqayıt şəhərində əhaliyə verilən təbii qaz ümumiyyətlə kəsilib. Hələlik hadisənin başvermə səbəbləri məlum deyil. Bir neçə gündür elektrik enerjisindən məhrum olan minlərlə insan qazın kəsilməsi üzündən bütün gecəni soyuqdan donub.
Sumqayıt sakinləri onu da qeyd ediblər ki, qar düşəndən bəri çörək sarıdan da çətinlik çəkiblər. Son iki gündə mağazalarda çörək tapmaq müşkülə çevrilib: “Qaz, işıq da vermirlər ki, heç olmasa, evdə özümüz bişirək”.
Sumqayıtda yaranan problemlə bağlı Sumqayıt şəhər Qaz Idarəsinin baş mühəndisi Teymur Vəliyev “anspress”ə deyib ki, gecə saat 1 radələrində Qaradağ magistralından Sumqayıta gedən qaz kəmərində naməlum səbəbdən nasazlıq yaranıb. Nəticədə şəhərin təbii qazla təminatında fasilələr yaranıb.
“Hadisə yerinə mütəxəssisləri göndərdik. Nasazlıq aradan qaldırılıb. Artıq Sumqayıtda təbii qazın verilişi bərpa olunub. Çalışacağıq ki, bundan sonra problem yaranmasın”, – deyə Teymur Vəliyev bildirib.
“Azəriqaz” Istehsalat Birliyinin mətbuat xidmətinin rəhbəri Araz Ağayev də ANS-ə bildirib ki, Qaradağ magistralından Sumqayıta gedən qaz kəmərində naməlum səbəbdən yaranan nasazlıq Abşeron və Qaradağ rayonlarına qazın verilməsində problem yaradıb. Abşeronda rayonunda problem artıq aradan qaldırılır, Qaradağın Buta qəsəbəsində isə qazın verilişi yaxın saatlarda bərpa ediləcək. Bundan başqa, Suraxanı və Sabunçu rayonlarının bir hissəsində hələ qazın verilməsində problemlər qalmaqdadır.
Hər il qar yağanda bu fəlakətlə üz-üzə qalırıq
Bakıxanov qəsəbəsi Yaşar Əliyev küçəsinin sakinləri də qazsız qalıb. Ümidlərini elektrik enerjisinə bağlayan vətəndaşlar deyirlər ki, onlara Sabunçu rayonunda qəzanın baş verdiyini bildiriblər.
15 min əhalisi olan Qobu qəsəbəsi də bir neçə gündür ki, işıqsız qalıb.
“Qarın əlindən bayıra çıxmaq olmur. ”Bakılektrikşəbəkə” gücləndirilmiş iş rejiminə keçdiyini açıqlayıb. Ancaq 3 gündür evlərimizdə işıq yoxdur. Hər il qar yağanda bu fəlakətlə üz-üzə qalırıq. Televizora çıxıb yalan danışırlar ki, heç bir problem yaşanmır, qaz, işıq, su var”, – deyə qəsəbə sakinləri məmurların xalqı aldatdığını bildirib.
Binəqədi rayonunda, o cümlədən Biləcəri, Novxanı qəsəbələrində də sakinlər çoxsaylı problemlərlə üzləşiblər: “Evdə donuruq, vəziyyətimiz ağırdır. Neçə gündür qaz verilmir. Elektrik enerjisi ilə isinirik. Gecələr işıqların verilməsində fasilələr yaranır, bu lap dözülməz hala gətirib. Hər yerə şikayət etmişik, ancaq heç bir faydası yoxdur. ”Qəza baş verib” deyirlər. Əgər qəza olubsa, bunu 3 günə həll edə bilmirlər? Başqa vaxt hər şeyin yaxşı olduğunu söyləyirlər”.
Sürücülər də qiyməti qaldırıb
Qarın yağması ictimai nəqliyyata da ciddi təsir göstərib. Yolların buzlu olmasından ehtiyatlanan avtobus sürücülərinin əksəriyyəti işə çıxmır. Çıxanların da çoxu qaranlıq düşən kimi fəaliyyətini dayandırır. Belə olan halda, işdən bir qədər gec çıxan əhalinin ümidi qalır taksilərə. Taksi sürücüləri də belə havada, buzlu yollarda avtomobil idarə etməyin riskli olduğunu əsas gətirərək, qiyməti qaldırırlar. Adi günlərdə Sumqayıta adambaşı 2-3 manata aparan taksilər qar düşəndən sonra qiyməti 8-10 manata qaldırıblar.
“Qarda, şaxtada maşın sürmək təhlükəlidir. Kim yola çıxırsa, həyatını riskə atır. Bundan başqa, qarda maşın benzini çox ”içir”. Ona görə də məcburuq ki, qiymətləri qaldıraq. Əlbəttə, biz əhalinin də vəziyyətindən xəbərdarıq. Amma bizi də başa düşmək lazımdır. Yollarda maşın sürüşüb kiçik bir qəza olsa, onu düzəltdirmək üçün külli miqdarda pul lazımdır. Həm də 3-4 gündən sonra havalar yaxşılaşacaq, yollar düzələcək və biz də həmişəki qaydada, həmişəki qiymətlərlə işləyəcəyik”, – deyə sürücülər bildiriblər.
Taksi sürüclərilə yanaşı, marşrut avtobuslarında da qiymət artımına rast gəlmək olar. Xırdalandan metronun “20 Yanvar” stansiyası istiqamətində hərəkət edən avtobuslar adi günlərdə sərnişinləri 20 qəpiyə mənzil başına aparsalar da, qarlı günlərdə qiyməti 40-50 qəpiyə qaldırıblar.
Ramin DEKO
