«Ümid edirik, Ukraynada daha legitim hakimiyyət formalaşacaq…»; AB Ukrayna hökumətinə sanksiya tətbiq etməyə hazırlaşır
Ukraynada havalar həddən artıq şaxtalı keçdiyindən müxalifət dünən hər bazar günü təşkil etdiyi ənənəvi «xalq yığıncağını» təxirə salmalı olub. Əvəzində isə Milli Müqavimət Qərargahının təşkilatçılığı ilə «məlumatlandırıcı mitinq» keçirilib. Aksiyanın məqsədi müxalifət liderlərinin Münhen təhlükəsizlik konfransında iştirakı ilə bağlı Maydanı məlumatlandırmaq olub. Qeyd edək ki, həmin konfransa “UDAR” Partiyasının lideri Vitali Kliçko və “Batkivşina” fraksiyasının lideri Arseni Yatsenyuk qatılmışdı. Onlar həmçinin Münhendəki «Avromeydan»da Avropada yaşayan ukraynalılar qarşısında çıxış etmişdilər. Yerli vaxtla saat 13-də başlayan aksiyadan yarım saat əvvəl bütün dini konfessiya təmsilçilərinin iştirakı ilə dualar oxunub. 9 dərəcəlik şaxtaya baxmayaraq, Maydana yenə minlərlə etirazçı toplanıb.
Ukraynada yaşanan gərginliyə ABŞ prezidenti Barak Obamadan maraqlı reaksiya gəlib. Obama budəfəki açıqlamasında ölkədə yaranmış böhrandan çıxış yolları ilə bağlı daha açıq və konkret mesajlar verib. Prezident bildirib ki, ABŞ Ukraynada daha legitim hakimiyyətin formalaşmasına ümid edir: «Ukrayna hakimiyyət başa düşməlidir ki, insanlar öz talelərini müəyyənləşdirmək prosesində iştirak etmək istəyirlər».
«İnsanları artıq köhnə qaydalara idarə etmək olmaz»
Ukraynadakı vəziyyəti qiymətləndirən Obama qeyd edib ki, hazırda həm hökumət, həm də müxalifətlə danışıqlar aparırlar: «Biz ilk növbədə ifadə azadlığının məhdudlaşdırılmasına qarşı çıxırıq. İkincisi, müxalifətə və insanlara meydanlarda demokratik prosesə hazırlıq üçün imakan yaratmaqla hakimiyyəti yenidən formalaşdırmağın yolu tapılmalıdır. Bu, daha legitim və vahid hakimiyyətin yaranmasını təmin edəcək. Düzdür, bu asan olmayacaq. Amma biz bu hədəfə çatmaq yolunda danışıqların baş tutmasına çalışmalıyıq. Ukraynalılar Avropaya və Qərbə daha azad iqtisadiyyata keçid yolunda tərəfdaş kimi baxırlar. Göründüyü kimi, onlar Rusiya ilə güclü tarixi əlaqələrə və dərin biznes münasibətlərinə malikdilər. Bunları qurban vermək olmaz. Amma onu da bilmək lazımdır ki, artıq dövlətlərin sadə insanları köhnə qaydadarla idarə etməsi, onların ümidlərini doğrultması çətindir. İnternet, smartfon, «Google» və informasiya texnologiyaları əsrində insanlar öz talelərinin müəyyənləşdirmək prosesində iştirak etmək istəyirlər. İndi informasiyanı əvvəllər olduğu kimi, məhdudlaşdırmaq olmur. Ümid edirəm ki, Ukrayna hakimiyyəti bunu qəbul edəcək və hər şey sülh yolu ilə həllini tapacaq. Güc tətbiqi məni həmişə narahat edib. Müsbət nəticəyə nail olmaq üçün biz Ukrayna hökuməti ilə davamlı danışıqlar aparırıq».
Eşton: «Ukraynadakı vəziyyət fevralın 10-da Avropa Birliyində müzakirə olunacaq»
Avropa Birliyinin xarici işlər və təhlükəsizlik siyasəti üzrə ali nümayəndəsi Ketron Eşton Ukraynadakı vəziyyətdən ciddi narahat olduğunu bir daha dilə gətirib və bildirib ki, gələn həftə (bu həftə-red:) hökumət, müxalifət və vətəndaş cəmiyyəti ilə danışıqları davam etdirəmək üçün Kiyevə səfər edəcək: «Ukraynadakı siyasi böhran Avropa Birliyinin Xarici İşlər Komitəsinin fevralın 10-da keçiriləcək iclasında müzakirəyə çıxarılacaq. Avropa Birliyi ölkələri problemin dinc yolla həlli üçün bütün mümkün vasitələri işə salacaqlar».
«Batkivşina» Partiyasının sədr müavini Qriqori Nemır isə bildirib ki, həmin iclasda Avropa Birliyi Ukrayna hökumətinə qarşı sanksiyaları da müzakirəyə çıxaracaq. O, bu məlumatı İsveçin Xarici işlər naziri Karl Bildtlə söhbət zamanı öyrəndiyini bildirib: «Söhbət zamanı Bildt dedi ki, bu məsələ 10 fevral iclasının əsas müzakirə mövzularından biri olacaq».
Nuland bu həftə Ukraynaya gəlir
ABŞ dövlət katibinin müavini Viktoriya Nuland dünən Ukraynanın həbsdə olan keçmiş baş naziri Yuliya Timoşenkonun qızı Yevgeniya ilə görüşüb. Münhen təhlükəsizlik konfransında keçirilən görüşdə tərəflər Ukraynada yaranmış böhranı və ondan çıxış yollarını müzakirə ediblər. V.Nuland bildirib ki, ABŞ və Avropa Birliyi Ukraynadakı etirazçılara güc tətbiqini dayandırmaq, problemin dinc yolla həllinə nail olmaq üçün tədbirlər görmək, həmçinin hökumət, müxalifət və vətəndaş cəmiyyəti ilə danışıqları davam etdirmək fikrindədir. O həmçinin bildirib bugünlərdə yenidən Ukraynaya səfər edəcək. Öz növbəsində Yevgeniya Timoşenko Nulanda anasının ölkədə yaranmış böhrandan çıxış yolları ilə bağlı fikirlərini çatdırıb. Yuliya Timoşenko hesab edir ki, prezident Yanukoviçin müxalifət və xalqa təklif etdiyi bütün kompromiss təklifləri onun avtoritar təzyiqlərini daha da artırmaq üçündür. Ona görə də hazırkı şəraitdə danışıqları sanksiyalarsız başlatmaq mümkün deyil. Keçmiş baş nazirin fikrincə, Ukrayna hakimiyyətinə sanksiyalar tətbiq edilməli, həmçinin erkən parlament və erkən prezident seçkiləri keçirilməlidir.
Görüş zamanı Nuland və Y.Timoşenko Ukraynada insan haqlarının pozulması və etirazçılara cüc tətbiqi faktlarını araşdırmaq üçün beynəlxalq komissiyanın yaradılması məsələsini də müzakirə ediblər. Dövlət katibinin müavini Y.Timoşenkoya dəstək mesajını da çatdırıb.
Azarovun ölkədən nə qədər pul çıxartdığı araşdırılır
Ukraynanın sabiq baş naziri Nikolay Azarovun tutduğu vəzifədən azad olunduqdan dərhal sonra xüsusi təyyarə Avstriyaya getdiyi barədə məlumat vermişdik. O da bildirilir ki, hazırda Azarov oğlunun yanında, Vyanadadır və orada uzun müddət qalmaq niyyətindədir. Xəbər yayılanda sabiq baş nazirin mətbuat katibi məlumatı nə təsdiq, nə də təkzib etmişdi. Müxalifət isə məsələnin bu cür qeyri-müəyyən qalmasından narazıdır. Deputat Nikolay Tomenko hesab edir ki, keçmiş baş nazirin ölkəni tərk etdiyi ilə bağlı məlumatın nə dərəcədə həqiqətə uyğun olduğu barədə ictimaiyyətə məlumat verilməlidir: «Əgər bu məlumat doğrudursa, Azarovun gömrük yoxlamasından keçdiyini və deklorasiyada ölkədən çıxardığı pulun məbləğini göstərən materiallar bizə təqdim edilməlidir. Söhbət ondan gedir ki, mətbuat Azarovun Avstriyada uzun müddət və ya həmişəlik qalacağını iddia edir. Mətbuat dəfələrlə onu da yazıb ki, Azarovun ailəsi Vynada təkcə evə yox, həm də çoxsaylı əmlaka sahibdir. Əgər yeni hakimiyyət formalaşsa və köhnə hakimiyyətin büdcə vəsaitlərindən necə istifadə etdiyi araşdırılmağa başlansa, o zaman bu təhiqiqata ilk cəlb olunacaq şəxslərdən biri də Azarovdur. Bunun üçün bizim əlimizdə bütün lazımi materiallar olmalıdır».
Ukrayna Assosasiya müqaviləsini bağlamaq istəyir
Ukrayna Avropa Birliyi ilə Assosasiya müqaviləsi bağlamaq istəyir. «Ria Novosti»nin məlumatına görə, Ukrayna Avropa Birliyini Assosasiya müqaviləsi üzrə texniki danışıqlar aparmağa çağırıb. Amma danışıqlarda Rusiyanın da iştirak etməsini tələb edib. Bu barədə xarici işlər naziri Leonid Kojara Münhen Təhlükəsizlik konfransında bildirib. “Artıq Avropa Birliyi və Ukraynanın bir masa arxasında oturmaq və Assosasiya müqaviləsini necə həyata keçirəcəyimizi müəyyən etmək vaxtı gəlib çatıb. Biz həm də istəyirik ki, eyni masa arxasında Rusiya nümayəndələri də otursun. Siyasi səviyədə yox, texniki səviyyədə. Çünki Rusiya yalnız onun iştirakı ilə həll edilə biləcək bir sıra problemlərin məntiqli həllinə yaxınlaşmaq imkanına malikdir”.
Gültəkin
