«Fövqəlnazir»in keçirdiyi müşavirədə ona qarşı olan iri məmurlar hədəfə alındı
Fövqəladə hallar naziri Kəmaləddin Heydərov geniş müşavirə keçirib. Tikintidə Təhlükəsizliyə Nəzarət Dövlət Agentliyinin inzibati binasında baş tutan müşavirə digər məmurların keçirdiyi müşavirədən bir sıra cəhətləri ilə fərqlənib. Əvvəla, bu müşavirədə “hər şey yaxşıdır” ritorikası arxa plana keçib. Əsasən nöqsanlardan danışılıb. Ikincisi, müşavirədə bir sıra dövlət qurumları ünvanlı tənqid olub.
Yəni, “bəzi qurumlar”, “bəzi dövlət idarələri” kimi ümumi anlayışlardan istifadə olunmayıb, konkret adlar çəkiilib.
Məsələn, Tikintidə Təhlükəsizliyə Nəzarət Dövlət Agentliyinin rəisi Cəbrayıl Xanlarov deyib ki, Nəqliyyat Nazirliyinin sifarişçisi olan “Azəryolservis” ASC və “Azərbaycan Dəmir Yolları” QSC, “Azərenerji” ASC, “Azərsu” ASC, “Bakı Elektrikşəbəkə” ASC, Bakı şəhər Icra Hakimiyyəti, Dövlət Neft Şirkəti, “Meliorasiya və su təsərrüfatı” ASC, Metropoliten, bundan başqa özəl müəssisələr, xüsusilə Bakı, Sumqayıt və Gəncə şəhərlərinin və Abşeron rayonunun ərazisində yerləşən otellər, ticarət mərkəzləri, istirahət mərkəzləri, izibati binalarda nöqsanlara yol verilib.
Dövlət Yanğın Nəzarəti Xidmətinin rəisi Israil Əliyev isə neft-qaz, energetika, səhiyyə, təhsil, mədəniyyət və turizm nazirliklərinin obyektlərində, kütləvi istirahət obyektlərində və otellərin bir qismində, metropolitendə yanğın təhlükəsizliyi qaydalarının pozulmasına yol verildiyini açıqlayıb.
Sənayedə Işlərin Təhlükəsiz Görülməsi və Dağ-mədən Nəzarəti Dövlət Agentliyinin rəisi Səfər Qurbanov neft-qaz çıxarma, emal və xidmət sahələrində, tikinti materialları istehsalı üçün icra hakimiyyətləri tərəfindən ayrılan ərazilər, kimya sənayesi, magistral boru kəmərlərində, lift təsərrüfatında pozuntulara yol verildiyini qeyd edib.
Kəmaləddin Heydərov isə müşavirəyə yekun vuraraq, pozuntulara yol vermiş hüquqi və fiziki şəxslər barəsində fəaliyyəti dayandırılmaqla Tikinti Məcəlləsi və digər aidiyyəti normativ aktlarla nəzərdə tutulmuş tədbirlərin görüləcəyini vurğulayıb.
Müşavirədə adıçəkilən dövlət qurumlarının bir çoxunun rəhbərləri hakimiyyətdəki odioz məmurlar qrupuna daxildir. Buna baxmayaraq ki, Kəmaləddin Heydərov onların adının çəkilməsindən çəkinmədiyini nümayiş etdirib. Bu həm də adıçkəilən qurumların rəhbərlərinin Kəmaləddin Heydərovun rəqibləri sırasına daxil olması ilə bağlı ola bilər. Cavid Qurbanov (“Azəryolservis”), Rövnəq Abdullayev (ARDNŞ), Hacıbala Abutalıbov və digər yuxarıda adı sadalanan qurumların rəhbərləri “fövqəlnazir”ə əks cəbhədə təmsil olunurlar. Ona görə də Kəmaləddin Heydərovun bu müşavirəsini onlara qarşı açıq şəkildə savaş elan edilməsi kimi də dəyərləndirilə bilinər.
