3 gün əvvəl Bakıda 24 yaşlı qızın özünü yandırmasında təqsirli bilinən şəxs tutulub. Bu barədə APA-ya Baş Prokurorluğun mətbuat xidmətinin rəhbəri Eldar Sultanov məlumat verib. Onun sözlərinə görə, həmin iş üzrə cinayəti törətməkdə şübhəli bilinən şəxs artıq saxlanılıb. Cinayət işi üzrə istintaq hərəkətləri davam etdirilir.
Xatırladaq ki, yanvarın 30-da Bakı şəhərində yaşayan Lənkəran qeydiyyatlı sakin Məleykə Bayramlı Səbail rayonu ərazisində özünü yandırmaqla intihara cəhd edib. O, yanıq xəsarətləri ilə 5 saylı klinik xəstəxanaya yerləşdirilib. Hazırkı vəziyyəti stabil ağır kimi qiymətləndirilir.
Baş Prokurorluğun bundan qabaq yaydığı məlumatdan aydın olur ki, Məleykə Bayramlı Lənkəranda Milli Təhlükəsizlik Nazirliyinin Mühafizə Taborunda müddətli həqiqi hərbi xidmətdə olmuş Əli Həbibli ilə sevgi münasibətində olub və hətta nişanlanıb, amma sonradan aldadılıb. Buna görə də o, intihar etmək istəyib.
