Fevralın 2-nə keçən gecə saat 02:00 radələrində Şəki bazarında yanğın baş verib. Yanğın qısa müddət ərzində geniş ərazini bürüyüb. Baş vermiş yanğın səbəbindən sahibkarlara külli miqdarda ziyan dəyib.
“Xəzər” TV bildirir ki, Şəki bazarında bir dükanda başlayan yanğın qısa müddət ərzində bazarın geyim malları olan hissəsini öz cənginə alıb. Dərhal hadisə yerinə FHN-in Şəki Yanğından Mühafizə Hissəsinin yanğınsöndürən texnika və canlı qüvvəsi cəlb olunub. İlkin məlumatlara əsasən, alov təxminən 1200-1500 kvadratmetr ərazini bürüyüb.
Yanğının güclü olması səbəbindən hadisə yerinə ətraf rayonların, yəni Qax, Oğuz, Qəbələ və Mingəçevirin yanğınsöndürənləri və texnikası cəlb olunub. Hadisə zamanı bazar ərazisində təxminən 100-ə yaxın sahibkara külli miqdarda ziyan dəyib.
Bəzi sahibkarlar isə dükanlardan mallarının yarısını da olsa xilas edə biliblər. Ərazidə geyim, qızıl və məişət avadanlıqları olan dükanlar yanıb. Hadisə zamanı əraziyə şəhər rəhbərliyi də gəlib. Şəki Rayon İcra Hakimiyyətinin başçısı əraziyə baxış keçirərək öz tapşırıqlarını verib.
Ümumilikdə hadisə yerinə 15-ə yaxın yanğınsöndürən avtomobil cəlb olunub. Yanğınla əlaqədar olaraq ətraf ərazidə elektrik enerjisi və mavi yanacağın verilişi müvəqqəti olaraq dayandırılıb. Saat 2 radələrindən başlayan yanğın 5 saatlıq mübarizədən sonra saat 7 radələrində tamamilə söndürülüb. İlkin ehtimallara görə, hadisəyə səbəb elektrik naqillərində baş vermiş qısaqapanma olub. Faktla əlaqədar müvafiq orqanlar tərəfindən araşdırmalar aparılır.
