Müzəffər Baxış: «İttiham olunan şəxsin sözünün kəsilməsi, mikrofonun söndürülməsi qanun pozuntusudur»
Keçmiş səhiyyə naziri Əli İnsanovla bağlı Apelyasiya Məhkəməsində keçirilən son məhkəmə iclasları əvvəlki məhkəmə proseslərindən fərqlənirdi. Əli İnsanov keçən məhkəmədə olduğu kimi dəmir barmaqlıqlar arasında deyil, qapalı şüşə kabinədə oturduldu və yalnız mikrofon vasitəsilə məhkəmə zalı ilə əlaqə yaradırdı. Mikrofon təkcə ona söz verildikdə işə salınır, lazım olanda dayandırılırdı. Mikrofonu idarə edən düymə isə hakimin əlinin altında idi. Hakim bu vürsətdən istifadə edərək Əli İnsanov danışanda bir neçə dəfə mikrofonu söndürüb və zaldakılar onun nə dediyini eşidə bilməyib. Məhkəmədə ittiham olunan şəxsi şüşə qəfəsdə saxlamaq və onun çıxışlarını kəsmək nə dərəcədə qanunauyğundur?
Hüquqşunas Müzəffər Baxış dünyanın bütün ölkələrində şüşə qəfəsdən istifadə olunduğunu deyir. Artıq Azərbaycan məhkəmələrində də içində mikrofon qurulan şüşə qəfəslər yerləşdirilir. Bu, beynəlxalq standartlara uyğun bir haldır. Amma ittiham olunan şəxsin sözünün kəsilməsi, mikrofonun söndürülməsi qanun pozuntusudur: «Təqsirləndirilən şəxs kimi ona tam imkan verilməlidir ki, öz fikirlərini ifadə etsin və özünün bütün mülahizələrini, fikirlərini, dəlillərini, sübutlarını məhkəməyə təqdim etsin. Əgər məhkəmə onun danışmağına imkan vermirsə, deməli hakimlər qanunu kobud şəkildə pozurlar. İttiham olunan şəxsin öz işinin araşdırılması ilə bağlı dediyi bütün fikirlər, dəlillər, sübutlar hakimlər tərəfindən dinlənilməlidir və digər sübutlarla birgə araşdırılıb ona qiymət verilməlidir. Ancaq şüşə qəfəs beynəlxalq standartlara uyğun məsələdir. Təqsirləndirilən şəxsin təhlükəsizliyini təmin etmək üçün seçilən bir məkandır. Dəmir qəfəslər bəzən tənqidə məruz qalır. Ona görə də son dövrlərdə keçirlər şüşə qəfəsə. Burda heç bir problem yoxdur».
Fizzə
